Read Paite Chin GENESIS 49 Bible Online

GENESIS 49 - Paite Chin bible

GENESIS 49

¹Huan, Jakob in a tapate a sam a, hichibang in a gen hi. “Ni nanungte a na tung ua thil hongtung dingte k’on hilh theihna ding in hong kikhawm un.

²Nou Jakob tapate aw, hong kikhawm unla, Ngaikhia un; na pa uh Israel thu ngai un.

³Reuben, nang ka tapa masa, ka thilhihtheihna, ka hatna gah masapen na hi. Sanpen na leh thuneihpenna nang a ahi.

⁴Himahleh tui bang a kiplou na hi, tungnun penna na neikei ding; na pa lupnapi ah na kal ziak in. Huai ah ka lupna a kal in na hihbuah hi,

⁵Simeon leh Levi unau ahi ua, a namsaute uh sisan suahna vanzat ahi.

⁶Ka kha aw, nang zaw a kikupna uah va kigolh ken. Ka thupina, nang zaw a kikhopna uah telken. A heh un mi a that ua, a genhak un bawngtal thagui a sattat uhi.

⁷A hehna un hamsia dong hen, hangsantak ahi ngal ua. A thangpaihna un leng hamsia dong hen, hinsetak ahi ngal ua. Jakob ah amau ka kikhen sak dia, Israel ah ka hihdalh ding hi.

⁸Judah, nang na unaute’n a honphat ding uh. Na khut na doute ngawng ah na nga dia; na tapate na ma ah a kun ding uhi.

⁹Judah humpinelkai nou ahi. Ka tapa, na sakeih na paitouh santa. Na kun a, humpinelkai bang in na bok a, humpinelkainu bang in na kualsuk hi. Kua’n ahia hon thou sak ngam ding?

¹⁰Lalchiang Judah a kipan a mangkei ding, Vaihawmpa chiang a khekal a kipan a mangkei ding. Shiloh a hongpai mateng; namchih in amah thu a mang ding uhi.

¹¹A sakolnou grepgui ah a khih dia, a sabiltung nou grepgui hoih chi ah a khih ding hi. A puansilhte uain in a sawp dia, a puan grep sisan in a sawplai ding hi.

¹²A mitte uain in a san ding ua, a hate nawitui in a ngou ding uhi.

¹³Zebulun tuipi gei ah a teng dia, longkhawlna luipiau ahi dia; a gamgi Zidon ah ahi ding.

¹⁴Issakar sabiltung hattak ahi a, vangik nih kal a kual hi.

¹⁵Khawl hoih in a thei a, gam leng hoih in a thei; Huchi in van paw ding in a liangzang a niamsak a, kuli nna sem in sikha in a hong omta hi.

¹⁶Dan in Israel nam lak a khat bang in a mite vai a hawmsak ding.

¹⁷Dan lamlian gei a gul, lampi a gulgial, a tung a tuang mi thalkiak ek khop a sakol khe tu nakpa ahi ding.

¹⁸Aw TOUPA, na hotdamna ka ngak gige hi.

¹⁹Gad, gal in a sual dia, himahleh aman a khetul lam uah amau a sual zaw ding hi.

²⁰Asher, a nek a hoih dia, Kumpi nekte a piangsak ding hi.

²¹Naphtali zukpi khah ahi. Thu hoih pipi a gen zel hi.

²²Joseph hiang gahnuamtak ahi, tuikhuk kiang a hiang gahnuamtak; a hiang nawnsawnte’n bang a tuam uhi.

²³Thalkapmite’n amah nakpitak in a hihgenthei ua, a kap ua, a simmawh uhi.

²⁴Himahleh, amah thalpeu khauhtak in a om gige a, a ban thate Jakob Mihatpa in a hatsak leh belamchingmi, tua Israel suangpi hatsak ahi.

²⁵Na pa Pathian, nang hon panpih dingpa, Bangkim hihtheipa, tunglam van vualzawlnate, nuailam a om gige tui thuktak vualzawlnate, nawite leh sul vualzawlnate, nangmah hon vualzawl dingpa ngei hihhat in na om hi.

²⁶Na pa vualzawlnate hon suangtute Vualzawlna sang in tangtawn tangte tawpkhawk pha in a thupizawta hi. Hiaite Joseph lu tung ah a om dia, a unaute a kipan hihtuam a ompa sip ah a om ding hi.

²⁷Benjamin nge duhgawl bang in, zingsang in a sa matte a ne dia, nitaklam in a gallak a hawm ding” a chi hi.

²⁸Huaite tengteng Israel nam sawmlehnihte ahi uh. Huai thute leng amaute vualzawlna a kiang ua a pa uh thugen ahi. Vualzawlna a tanding gun bangzel un a vualzawl chiat hi.

²⁹Aman a tate thugou a siah a, a kiang uah, “Ka chipihte kiang a pi a om ding ka hita. Hit mi Ephron lou a kawkhuk ah kei hon suangtute kiang ah honvui un.

³⁰Kanan gam a Mamre ma a Makpelah lou a kawkhuk, Abraham in kivuina mun dia Hitmi Ephron a kipan lou toh a lei ah.

³¹Huai ah Abraham leh a zi Sarah a vui ua; huai ah Isak leh a zi Rebekah a vui ua; huai mah ah Leah ka vui hi.

³²Lou leh asung a kawkhuk om Hit suante a kipan a lei ahi” a chi hi.

³³Jakob in a tapate kiang a thugou a siah khit in a khete lupna ah a nga tou a, a kha a khahta a, a chipihte kiang ah pi in a om samta hi.