Read Paite Chin GENESIS 5 Bible Online

GENESIS 5 - Paite Chin bible

GENESIS 5

¹Hiai Adam suante tuanna laibu ahi. Pathian in mi a siam ni’n Pathian batpih in amah a bawl hi.

²Pasal leh numei in amau a siam a; amau a vualzawl a, amau siam a a om ni un a min uh Adam, a sa hi.

³Adam in kum za leh sawmthum a hih in amah mah bang, a kibatpih ngei tapa a nei a; a min Seth a sa hi.

⁴Seth a neih nung in Adam kum za giat a damlai a; tanu leh tapate a neilai hi.

⁵Adam damsung tengteng kum za kua leh sawmthum ahi a; huchi in a sita hi.

⁶Seth in kum za leh nga a hih in, tapa Enos a nei hi.

⁷Enosh a neih nung in Seth kum za giat leh sagih a damlai a, tanu leh tapate a neilai hi.

⁸Seth damsung tengteng kum za kua leh sawmlehnih ahi a; huchi in a sita hi.

⁹Enosh in kum sawmkua a hih in tapa Kenan a nei hi.

¹⁰Kenan a neih nung in Enosh kum za giat leh sawmlehnga a damlai a, tanu leh tapate a neilai hi.

¹¹Enosh damsung tengteng kum za kua leh nga ahi a, huchi in a sita hi.

¹²Kenan in kum sawmsagih a hih in, tapa Mahalaleel a nei hi.

¹³Mahalaleel a neih nung in Kenan kum za giat leh sawmli a damlai a, tanu leh tapate a neilai hi.

¹⁴Kenan damsung tengteng kum za kua leh sawm ahi a; huchi in a sita hi.

¹⁵Mahalaleel kum sawmguk leh nga a hih in tapa Jared a nei hi.

¹⁶Jared a neih nung in Mahalaleel kum za giat leh sawmthum a damlai a, tanu leh tapate a neilai hi.

¹⁷Mahalaleel damsung tengteng kum za giat leh sawmkua leh nga ahi a, huchi in a sita hi.

¹⁸Jared in kum za leh sawmguk leh nih a hih in tapa Enok a nei hi.

¹⁹Enok a neih nung in Jared kum za giat a damlai a, tanu leh tapate a neilai hi.

²⁰Jared damsung tengteng kum za kua leh sawmguk leh nih ahi a, huchi in a sita hi.

²¹Enok in kum sawmguk leh nga a hih in, tapa Methusel a nei hi.

²²Methusel a neih nung in Enok kum za thum sung Pathian toh a tonkhawm ua, tanu leh tapate a neilai hi.

²³Enok damsung tengteng kum za thum leh sawmguk leh nga ahi.

²⁴Pathian toh Enok a tonkhawm ua, amah a omta kei a; Pathian in a lata hi.

²⁵Methusel in kum za leh sawmgiat leh sagih a hih in tapa Lamek a nei hi.

²⁶Lamek a neih nung in Methusel kum za sagih leh sawmgiat leh nih a damlai a, tanu leh tapate a neilai hi.

²⁷Methusel damsung tengteng kum za kua leh sawmguk leh kua ahi a, huchi in a sita hi.

²⁸Lamek in kum za leh sawmgiat leh nih a hih in tapa a nei hi.

²⁹Hiai ngeingei in TOUPA hamsiat khum leitung ziak a i nasepna leh khut a i sepgimna ah a hon lungmuan ding, chi’n, a min Noah a sa hi.

³⁰Noah a neih nung in Lamek kum za nga leh sawmkua leh nga a damlai a, tanu leh tapate a neilai hi.

³¹Lamek damsung tengteng kum za sagih leh sawmsagih leh sagih ahi a; huchi in a sita hi.

³²Noah kum za nga a upa ahi. Noah in Shem, Ham leh Japheth a nei hi.