Read Paite Chin GENESIS 50 Bible Online

GENESIS 50 - Paite Chin bible

GENESIS 50

¹Huan, Joseph in a pa mai a si a, a kah a, a tawp hi.

²Joseph in a sikha damdawi siamte a pa luang muattheilou a bawl ding in thu a pia hi. Huchi in damdawisiamte’n Israel luang muattheilou in a bawlta uhi.

³A luang bawlna in ni sawmli a zang ua, muattheilou a bawlna in ni hiai zah a lutnak hi. Ni sawmsagih sung teng Aiguptate’n amah a sun uhi.

⁴Amah a sunnite uh a beinung in, Joseph in Pharo inkuante a houpih a, “Na mitmuh ua deihsakna ka muh leh hehpih in Pharo bil a zak ding in, ‘Ka pa’n, ngai in, si ding ka hita.

⁵Kanan gam a ka han dia ka tohsa ngei ah na honvui ding ahi,’ chi’n, a hon kichiamsak hi. huaiziak in, tuin hehpih in ka pa hon pawtousak inla, hon va vuisak in, Huchi in ka hongpai nawn ding, a chi, chi’n, hon gensak un” a chi hi.

⁶Pharo in, “A hon kichiamsak bang in na pa va pawtou ve” a chi hi.

⁷Joseph a pa vui ding in a va hohtou hi. Pharo sikha teng, a inkuan lak a upate leh Aigupta gam upa tengteng leh,

⁸Joseph inkuanpih tengteng leh, a unaute leh, a pa inkuanpihte, a kiang ah a va hohtou uhi. A ta neu chikchikte uleh a belamhonte uleh a bawnghonte kia uh Gosen gam ah a nusia uhi.

⁹A kiang uah kangtalaite leh Sakol tungtuang mite leng a hohtou ua, huchi in pawl lianpi ahi uhi.

¹⁰Jordan luigal a Atad phual a tung ua, huai ah nakpitak in a kah ua, ni sagih sung a pa sunna a nei uhi.

¹¹Hiai gam mi Kanante’n, Atad phual a a misun uh a muh un, hiai Aiguptate misi sunna thupitak ahi, a chi uhi. Huaiziak in huai mun Abel mizraim a sa ua, huai Jordan luigal a om ahi.

¹²A tapate’n a thupiak bang in a hihsak uhi.

¹³A tapate’n Kanan gam ah a zawnglut ua, Abraham in kivuina mun dia, Hitmi Ephron a kipan a lou toh a lei Mamre ma a Makpelah lou a kawkhuk ah a vuita uhi.

¹⁴A pa a vui khit in Joseph leh a unaute leh a pa vui dia a kiang a hohtou tengteng Aigupta gam ah a pai kiknawnta uhi.

¹⁵Joseph unaute’n a pa uh sih a ngaihtuah ua, “Joseph in hon mudah dia, a tung a i thil hihkhelh tengteng phu i tung uah kim sipsip in a honla kha ding e” a chi uhi.

¹⁶Joseph kiang a hilh ding in mi a sawl ua, “Na pa’n a sih ma in hichi’n thu a pia hi.

¹⁷Joseph kiang ah, ‘hehpih in na unaute tatlekna leh a gitlouhna uh ngaidam in. Na tung ah thil hoihlou a hihta ngal ua. Tuin hehpih in na pa Pathian sikhate tatlekna ngaidam in,’ a chi, chi’n vagen un” a chi hi. A kiang a a gentak un Joseph a kap hi.

¹⁸A unaute leng a va hoh ua, a ma ah a khupboh chiat uh. “Ngai in, na sikhate ka hi uh” a chi uhi.

¹⁹Joseph in a kiang uah, “Lau kei un. Pathian sik a om ka hi ahia?

²⁰Nou zaw ka tung ah thil gilou hih lungsim na pu ua; himahleh tuni in mi tampi hing leh dam a humbitna dia thil hoih suahsak Pathian lungsim ahizaw hi.

²¹huaiziak in, tuin lau kei un. Nou leh na ta neu chik chikte uh ka honvak ding” a chi hi. Huchi in, amau a lungmuan a, kamsiam tak in a houpih hi.

²²Joseph, amah leh a pa inkuanpihte toh Aigupta gam ah a teng ua, Joseph kum za leh sawm a dam hi.

²³Joseph in Ephraim ta, tusawn thum chiang a mu hi. Manasseh tapa Makir tate leng Joseph pheitung ah a khanglian uhi.

²⁴Joseph in a unaute kiang ah, “Si ding ka hita hi. Himahleh Pathian in a hongveh ngeingei dia, hiai gam a kipan hon pikhia in, Abraham, Isak leh Jakob kiang a kichiam a, piak a chiam gam ah a hon pitou ding” a chi hi.

²⁵Joseph in Israel suante a kichiam sak a, “Pathian in a hongveh ngeingei dia, ka guhte hiai a kipan na zawngtou ding uh ahi” a chi hi.

²⁶Huchi in Joseph kum za leh sawm a upa a hih in, a sita hi. A luang muattheilou in a bawl ua, Aigupta gam ah hankuang sung ah a koih uhi.