Read Paite Chin GENESIS 6 Bible Online

GENESIS 6 - Paite Chin bible

GENESIS 6

¹Huan, hichi ahi a, leitung ah mite hong pung ua, tanute a honnei uhi.

²Pathian tapate’n mite tanute melhoih in a mu ua; a deihlam chiat uh zi in a nei uhi.

³TOUPA’N, “Ka Kha in mi tangtawn in a sual nilouh kei ding, amau lah sa ahi ngal ua. Himahleh kum za leh sawmnih a dam ding uh” a chi hi.

⁴Huailai in miliante lei ah a om ua; huai nung in leng Pathian tapate’n mite tanute a luppih ua, amau toh tate a neih zel lai un, huaite mah nidanglai a mihat, mi minthangte ahi uh.

⁵TOUPA’N lei ah mi gitlouh dan thupi ahi chih leh a lungtang lunggel dan gilou ngen ahi ngitnget chih a mu hi.

⁶Leitung a mi a bawl ziak in TOUPA a kisik a, lunggimna’n a neih loh hi.

⁷TOUPA’N, “Ka mi siam leitung a kipan ka hihmang mai ding. Mite, sate, ganhingte leh tung a leng vasate tan in; ka bawl ziak in ka kisik” a chi hi.

⁸Noah in bel TOUPA mitmuh in hehpihna a mu hi.

⁹Noah suan hiaite ahi uh. Noah midik ahi a, a dam tonpihte lak ah gensiatbei ahi. Noah Pathian toh a tonkhawm hi.

¹⁰Noah in tapa thum Shem, Ham leh Japheth a nei hi.

¹¹Pathian mitmuh in lei a sekhinta a, lei hiamgamna in a dim khinta hi.

¹²Pathian in lei a en a, ngai in, a sekhinta a; sa tengteng in leitung ah a omdan uh a hih sekhinta uhi.

¹³Pathian in Noah kiang ah, “Sa tengteng beina ka ma ah a hongtungta. Amau tawn in lei hiamgamna in a dim khinta ngal a. Ngai in, lei toh amau ka hihmang ding.

¹⁴Nang a ding in meilah sing in long bawl inla; long ah dantante na bawl ding ahi. A sunglam leh a pawlam meilah nai in na zut vek ding ahi.

¹⁵Hiai na bawl ding dan ahi. Long dunglam tong za thum hi henla, a vailam tong sawmnga hi henla, a sanlam tong sawmthum hi hen.

¹⁶Long ah tohlet na bawl dia, a tunglam tong khat chiang a na zoh ding ahi. Long kongkhak a pang ah na bawl dia; chial nuainung leh chial nihna leh chial thumna nei in na bawl ding ahi.

¹⁷Ngai in, kei mahmah in, sa tengteng hinna hatna pai khempeuh, van nuai a kipan hih mangthang ding in leitung ah tuichim ka tungsak dia; lei a thilchih om a sivek ding uh.

¹⁸Himahleh nang toh ka thukhun ka kipsak dia, long ah na lut ding ahi. Nang na lut dia, na tapate leh na zi leh na tapate zite leng na kiang ah a lut ding uh ahi.

¹⁹Sa tengteng a thilhing chiteng lak a kipan, chichih nihnih in, na kiang ah hinsak ding in long ah na pilut ding ahi. A nu leh a pa zel ahi ding uh.

²⁰Vasate amau chi omdan bang chiat in, gante amau chi omdan bang chiat in, chichih nihnih in na hinsak ding in na kiang ah a hongpai ding uh ahi.

²¹An tengteng la inla, na kiang ah koihkhawm in. Nang leh amau ading in an ahi ding uh” a chi hi.

²²Huchibang in Noah in a hih a; Pathian in a kiang a thu a piak tengteng bang in a hihta hi.