Read Paite Chin GENESIS 8 Bible Online

GENESIS 8 - Paite Chin bible

GENESIS 8

¹Huan, Pathian in, Noah leh long sung a a kiang a thilhing chiteng leh gan om tengteng a theigige a; Pathian in leitung ah huih a nungsak a, tui a hong dai panta hi.

²Tui thukpi nakte leh van tohlette hong kikhakta ua, van a kipan vuah leng theusak ahita hi.

³Lei a kipan tui a kiam giaigiaita a; ni za leh sawmnga nung in tui a hong tawm deuhta hi.

⁴A kha sagihna, ni sawmlehsagih ni’n Ararat tang ah long a hong kingata hi.

⁵Tui, a kha sawmna tan in a kiam giaigiai zel a; a kha sawmna ni khat ni’n mualvumte a kimuta hi.

⁶Ni sawmli nung in hichi ahi a, Noah in a bawl long tohlet a hongta hi.

⁷Va-ak khat a khahkhia a, lei a kipan tui a kankhit masiah huai va-ak a vial lenlen hi.

⁸Leitung ah tui a tawmta hia, tawm nailou, chih theihna ding in vakhu khat a khah khe nawn hi.

⁹Himahleh vakhu in tukna ding himhim a mu kei a, a kiang ah long ah a kiknawn a, tui lah leitung pumpi ah a omlai ngal a. Pawlam ah a khut a golh khia a, aman long sung ah a kiang ah a lalut nawn hi.

¹⁰Ni sagih dang a ngaklai a; vakhu long a kipan a khahkhe nawn hi.

¹¹Vakhu nitaklam in a kiang ah a honglut nawn a; ngai in, a muk in olive nah khat a hontuah hi. Noah in lei ah tui a tawmta, chih a theita hi.

¹²Ni sagih dang a ngak nawn a; vakhu a khah khe nawn a; a kiang ah a hong kiknawn kei hi.

¹³Hichi ahi a, a kum za guk leh khatna, a kha khatna, a ni khat ni’n, tui lei a kipan a kangta hi. Noah in long khuhna a koihsuana, a en a; ngai in, leitung a hulta hi.

¹⁴A kha nihna, ni sawmnih leh sagih ni’n lei a hulta hi.

¹⁵Pathian in Noah kiang ah thu a gen a;

¹⁶Long a kipan pawt in, nang pawt inla, na zi leh na tapate leh na tapate zite leng na kiang ah pawt uhen.

¹⁷Sa tengteng lak a thilhing chiteng na ompihte, vasate, gante, ganhing leitung a khupboh a pai chitengte toh na kiang ah pikhia in, leitung a chipha tak a chi tampi suang a a hong punna ding un, a chi hi.

¹⁸Noah a pawt a, a tapate leh a zi leh a tapate zite leng a kiang ah a pawt uhi.

¹⁹Sa chiteng, ganhing chiteng, vasa chiteng, leitung a tangthei peuhmahte amau chi omdan bang chiat in long a kipan a pawtta uhi.

²⁰Noah in TOUPA ading in maitam a bawl a; sa siang chiteng lak leh vasa siang chiteng lak a kipan a la a, maitam ah haltum pumpiaknate a lanta hi.

²¹TOUPA’N huai namtui a za a; TOUPA’N a lungsim in, “Mi ziak in leitung ka hamsiat nawn kei ding, mite lungsim ngaihtuahnate lah tuailai a hih a kipan gilou ahi ngal ua. Tua ka gawt bang in thil hing chiteng leng ka gawt nawn kei ding.

²²Lei omlai teng buh leh buhlakte, khovot leh kholumte, nipi leh phalbite, sun leh zante a bei kei ding” a chi hi.