Read Paite Chin GENESIS 9 Bible Online

GENESIS 9 - Paite Chin bible

GENESIS 9

¹Huan, Pathian in Noah leh a tapate a vualzawl a, a kiang uah, “Chi tampi suang in hongpung unla, lei luahdim un.

²Nou kihtakna leh lauhna lei a sa chiteng leh tung a leng vasa chiteng in a nei ding uh. Hiaite leh lei a khupboh a pai tengteng leh tuipi a ngasa tengteng na khut ua piak ahita uhi.

³Thilhing tangthei chitengte nou ading in nekding ahi ding ua; anteh hing k’on piak bang in bangkim k’on pevek hi.

⁴Himahleh sa, a hinna sisan toh na nekhawm ding uh ahi kei.

⁵Na hinna sisan phu ka la ngeingei ding. Sa chiteng lak ah ka la dia, mi lak ah leng. Michih a unaute uh lak ah, mite hinna phu ka la chiat ding.

⁶Kuapeuh mi sisan suahmi, mi mah in amah sisan a suah ding ahi. Pathian batpih a mi bawl ahi ngal a.

⁷Nou chi tampi suang in hong pung unla, ta leh nau tampi nei unla, leitung ah hongpung un” a chi hi.

⁸Pathian in, Noah kiang leh a kiang a om, a tate kiang ah,

⁹“Ngai un, kei mahmah in na kiang uah leh nanung ua na suante uh kiang ah leng ka thukhun ka hihkip hi.

¹⁰Na kiang ua om thilhing chiteng, na ompih uh vasate, gante, na ompih uh lei a sa chitengte kiang ah leng; long a kipan hongpawt tengteng, lei a sa chiteng kiang na ngawn ah.

¹¹Na kiang uah ka thukhun ka hihkip ding; sa tengteng leng tuichim a hihman in a om nawn kei ding uh. Lei hihse ding in tuichim a tung nawn kei ding” a chi hi.

¹²Pathian mah in, “Kei leh nou leh na kiang ua thil hing chiteng omte kal a , suan tawp neilou a omte ading in, hiai ka thukhun chiamtehna ahi ding hi.

¹³Meipi ah ka sakhituihup ka zam sak a, huai kei leh lei kal a thukhun chiamtehna ding ahi.

¹⁴Hichi ahi ding a, leitung a meipi ka kaisak in sakhituihup meipi ah a kimu ding hi.

¹⁵Kei leh nou leh sa tengteng lak a thilhing chitengte kal a , ka thukhun om ka theigige ding. Sa tengteng hihmang ding in tui a letnawn kei ding hi.

¹⁶Sakhituihup meipi ah a zam zel ding. Pathian leh leitung a sa om tengteng lak a thilhing chiteng kal a tangtawn thukhun om ka theihgige theihna ding in ka en zel ding” a chi hi.

¹⁷Pathian mah in, Noah kiang ah, “Hiai kei leh leitung a sa om tengteng kal a ka thukhun hihkip chiamtehna ahi” a chi nawn hi.

¹⁸Noah tapa long a kipan pawtte Shem, Ham leh Japheth ahi uh. Ham Kanaan Pa ahi.

¹⁹Huai mi thumte Noah tapate ahi ua, amau a kipan pawtte’n leitung pumpi a zelsuak uhi.

²⁰Noah louneimi in a hongom pan a, grephuan a bawl hi.

²¹Uain a dawn a, a kham a; a puanin ah a lumkhialta hi.

²²Ham, Kanaan pa’n a pa lumkhial a mu a, inn pua a om a naute nih a hilh hi.

²³Shem leh Japheth in puan a la ua, a liang ua kizawn in a nung pai ua, a pa uh lumkhial a khuhta uh. A mai uh lehlam nga in a pa uh lumkhial a mu kei uhi.

²⁴Noah uain kham a honghalh a, a tapa naupangpen in a tung a a hih dan a hon theita hi.

²⁵“Kanaan hamsiat in om hen. A unaute sikhate sikha ahi ding” a chi hi.

²⁶“Shem TOUPA Pathian phat in om hen. Kanaan a sikha in om hen.

²⁷Pathian in Japheth hihlian henla, Kanaan a sikha in om hen,” a chilai hi.

²⁸Noah tuichim tun nung in kum za thum leh sawmnga a dam hi.

²⁹Noah damsung tengteng kum za kua leh sawmnga ahi a; huchi in a sita hi.