Read Paite Chin 2 SAMUEL 10 Bible Online

2 SAMUEL 10 - Paite Chin bible

2 SAMUEL 10

¹Huan, hichi ahi a, huai nung in Ammon suante kumpipa a si a, a tapa Hanun in a mun ah vai a hawm hi.

²David in, “Apan a hon na hehpih bang in ken leng Nahash tapa Hanun ka hehpih sam ding” a chi hi. Huchi in David in a pa tungtang thu a lungmuan din amah mite a sawl a, huchi in David mite Ammon suante gam a va tung uhi.

³Himahleh Ammon suante makaite’n a toupa uh Hanun kiang ah, “David in na pa a zahtak ziak a na kiang a lungmuanmi honsawl hi in na um ahia? David in na mite khuate a hong hihsiatna dia zongkhe ding leh enkhe dia honsawl ahi ka hia?” a chi uhi.

⁴Huchi in, Hanun in David mite a man a, a khamul langkhat uh a metsak a, a puansilhte uh a laitak ah a taw uh phazou lel in a tansak a, a sawlkheta hi.

⁵David a hilhtak un, amau dawn ding mi a sawl hi. Amau lah a zum mahmah ngal ua. Kumpipa’n, “Na khamul uh a selsau ma in Jeriko ah omtadih unla, huai nung in hong paikik un” a chi hi.

⁶Ammon suante’n David huatlam a na hihta uh, chih a theih un, Ammon suante’n Beth rehob a Suriate leh Zobah a Suriate sepaih sing nih leh kumpipa Maka mi sang khat, Tob mite sing khat leh sang nih toh a thukhak in a guai uhi.

⁷David in huai a zak in Joab leh sepaih hangsan tengteng a sawl hi.

⁸Ammon suante a hong kuan ua, kholutna kongkhak lam ah panmun a khoh uh. Zobah a mite leh Rehob a Suriate leh Tob leh Makate bel a tuam in pawn ah a om uhi.

⁹Huchi in a malam uh leh a nunglam uah a honsual ding uh chih Joab in a theih in, Israel mite lak a mi hoih tata telkhia a, Suria mite sual din panmun a na khoh hi.

¹⁰Midang tengteng a unaupa Abisai khut ah a koihvek a, Ammon suante sual din panmun a khoh hi.

¹¹“Suria mite ka zoh kei ding leh, nang n’on huh dia, Ammon suante na zoh kei ding leh ken k’on huh ding hi.

¹²Hangtak in om unla, i mite leh i Pathian khua hum in i kipasal sak ding uh. TOUPA’N hoih a sak bangbang in hih hen” a chi hi.

¹³Huchi in Joab leh a kiang a mite’n Suria mite sual din kidouna mun a naih ua; a ma uah a taikek uhi.

¹⁴Ammon suante’n Suria mite a taikek uh chih a theih un amau leng Abisai ma ah a taikek samta ua, khosung ah a lut uhi. Joab in Ammon suante a kiksan a, Jerusalem ah a paita hi.

¹⁵Suria mite’n Israelte ma ah thah in a om uh chih a kitheih un a ki kaikhawm uhi.

¹⁶Hadadezer in mi a sawl a, Lui khenlam a Suria mite a pikhia a, Hadadezer sepaih heutu Sobak in makai in lehlam ah a hongpai uhi.

¹⁷Huai David a hilh ua, aman Israel mi tengteng a samkhawm a, Jordan luikan in Helam ah a pai uhi. David dou din Suria mite’n panmun khoh in a hong dou uhi.

¹⁸Suria mite Israelte ma ah a taikek ua, David in Suria mi kangtalai za sagih tung a tuang leh sakol tung tuang mi sing li a that a, a sepaih heutu uh Sobak leng a that a, huai ah a sita hi.

¹⁹Huchi in Hadadezer sikha a om kumpipa tengteng in Israelte ma ah tamtak thah ahi uh chih a theih un, Israelte toh kilemna a bawl ua, a sikha un a omta uh. Huchi in Suria mite’n Ammon suante a panpih ngam nawn kei uhi.