Read Paite Chin 2 SAMUEL 11 Bible Online

2 SAMUEL 11 - Paite Chin bible

2 SAMUEL 11

¹Huan, hichi ahi a, kum a hong kivei a, kumpipate galdou dia a kuankhiak lai un, David in Joab leh a sikhate tengteng a sawl a, Ammon suante a hihmang ua, Rabah khua a umkhum uhi. Himahleh David bel Jerusalem ah a tam nilouh hi.

²Hichi ahi a, nitak ninem in a lupna apan David a thoukhia a, kumpipa inn tung ah a kahtou hi. Inn tung apan numei khat kisil lai a mu hi. Huai numei bel melhoih tak ahi.

³David in mi a sawl a, huai numei tanchin a dong telsak hi. “Eliam tanu, Bathsheba, Hit mi Uriah zi ahi kei maw?” a chi hi.

⁴David in thupawte a sawl a, a va pita uh. A kiang a hongtung a, a na luppihta hi. A sianlouhna apan siansak khit ahita hi, huchi in a inn ah paikikta hi.

⁵Huchi in numei a hong gaita a; “Nau ka paita” chi in David a thei sak hi.

⁶David in Joab kiang ah, “Hit mi Uriah ka kiang ah honsawl in” chi’n a thukhak hi. Joab in David kiang ah Uriah a sawlta hi.

⁷Uriah a kiang a tun in David in “Joab leh mite bang a chi ua, kidouna ah bang a chi ua?” chi in a dong hi.

⁸David in Uriah kiang ah, “Na inn ah pai inla, na khete vasil in” a chi hi. Huchi in Uriah kumpipa in apan a pawtkhia a, kumpipa’n an nekding thawnpiak a zuisak hi.

⁹Himahleh Uriah a toupa sikha tengteng lak a kumpipa inn kongkhak bul ah a giak a; a inn ah a pai kei hi.

¹⁰“Uriah a inn ah a pai kei” chi a David a hilhtak un, David in Uriah kiang ah, “Khualzin hongtung hilou na hi maw? Bangdia na inn a pailou na hia?” a chi hi.

¹¹Uriah in David kiang ah, “Pathian bawm, Israelte leh Judahte aidakbuk a om gige ua, ka toupa Joab leh ka toupa sikhate gamlak ah a kikulh uh. Kei ka inn a pai in ka ne in ka ta in, ka zi kiang ah ka lum ding maw? Na hinna leh na kha hinna lou in ka gen ahi, huai zaw ka hih kei ding” a chi hi.

¹²David in Uriah kiang ah, “Tuni leng hiai ah omlai inla, zingchiah na paina ding” a chi hi. Huchi in Uriah huai ni leh a zingchiang leng Jerusalem ah a omta hi.

¹³David in amah a sam a, a ma ah ne in a dawn hi. A dawn khamsak hi. Nitaklam in a inn a pailou in a toupa sikhate lak ah a giak hi.

¹⁴Hichi ahi a, a zingchiang in David in Joab lai a khak a, Uriah a pawsak hi.

¹⁵Huai laikhak ah “Uriah gal khawkna pen ah ma phusak inla, a thah ua a sihna din kikhin san un” chi’n a gelh hi.

¹⁶Hichi ahi a, Joab in khua a umlai in, mi hangsante omna hi a a theih ah Uriah a pangsak hi.

¹⁷Khua a mite a pawtkhia ua, Joab a sual ua, David sikhate khenkhat a si ua, Hit mi Uriah leng a si hi.

¹⁸Huchi in Joab in mi a sawl a, kidou tungtang thil tengteng David a hilhsak hi.

¹⁹A mi sawl kiang ah, Kumpipa kiang a kidou tanchin tengteng na genkhit in,

²⁰A hong heh guih a, “Bangdia dou dia huchibang a khobul chin a hoh na hi ua? Kulh apan a honkap ding uh chih theilou na hi uh maw?”

²¹Jerubeseth tapa Abimelek that kua ahia? Buh gawizanna suang tungnungpen numei in kulh apan a tung ah a khesuk a, Thebez ah a si ahi kei maw? Bangdia hichibang a kulh kiang chin a pai na hi ua?” a chih leh, “Na sikha Hit mi Uriah leng si eive, na chi ding uh,” chi’n, thu a pia hi.

²²Huchi in a mi sawl a kuanta a, a va tung a, Joab in a sawlsan tengteng David a hilh hi.

²³A mi sawl in David kiang ah, “Mite’n a hon na zou ua, pawn ah honsual ua, kou a kholutna kongkhak tanpha in ka nawhkik uhi.

²⁴Thalkap mite’n kulh apan na sikhate a honkap ua, huchi in kumpipa sikha khenkhatte a si ua, na sikha Hit mi Uriah leng a si” a chi hi.

²⁵Huchi in David in misawl kiang ah, Joab kiang ah huchi in vagen in. “Hiaite’n na lungsim kipaklou sak kei hen. Namsau in kuamah a khentuam ngalkei a, naksem in khua sual unla hihsia un, chi in, hanthawn in” a chi hi.

²⁶Uriah zi in a pasal Uriah a si chih a zak in a pasal a sun hi.

²⁷A sun hun a bei nung in David in a inn ah a pi a, a zi a hong hita a, tapa khat a neihsak hi. Himahleh David thilhih in TOUPA lungkimlou tak in a omsak hi.