Read Paite Chin 2 SAMUEL 12 Bible Online

2 SAMUEL 12 - Paite Chin bible

2 SAMUEL 12

¹Huan, TOUPA’N David kiang ah Nathan a sawl hi. A kiang ah a va hoh a, hichi in a chi hi: “Khua khat ah mi nih a om ua; khat pen mi hausa ahi a, khat pen mi zawng ahi.

²Mi hausa in belamhon tampi leh ganhon tampi a nei hi.

³Mi zawng in bel belamnou a nu neuchik khat lei a, a vulh kia lou ngal bangmah a neikei hi. Amah leh a tate toh khanglian khawm in a kuang sawk pih leh a nou kikoppih, a angsung a om, a tanu banggeih a a ngaihtuah ahi.

⁴Mi hausa kiang ah khualzin mi khat a va tung hi. A kiang a mikhual tung amah belam leh gangoh phallou in mi zawngpa belamnou a gohsak zawta hi” a chi hi.

⁵Huchi in huai mi tung ah David a heh mahmah a, Nathan kiang ah, “TOUPA hinna lou in ka gen hi, huai thilhih mi a sih ngeingei ding ahi.

⁶Hichibang thil a hih ziak leh hehpihna a neih louh ziak in a belamnou a mun li in adin ding ahi” a chi hi.

⁷Nathan in David kiang ah, “Huai mipa Nangmah na hi. TOUPA, Israelte Pathian in hichi in a chi: Israelte kumpipa din thau k’on nilh a, Saul khut apan k’on hunkhia hi.

⁸Na pu in k’on luahsak a, na pu zite na angsung ah ka koih hi. Israel leh Judah inkawte ka honpia a; huaite a tawmluat uleh thildangte leng hon piakbeh lai ding ka hi.

⁹Bangdia TOUPA thupiak ngaineu a, a mitmuh a thil hoihlou na hih maizen? Hit mi Uriah namsau in na that a, a zi na zi din na neihsak a, Ammon suante namsau in amah na that hi.

¹⁰Huaiziak in, na inn apan namsau a paikhe kei ding. Kei hon ngaineu a, Hit mi Uriah zi na zi dia na lak ziak in.

¹¹TOUPA’N hichi in a chi. Ngai in, nangmah inkawte mah nang kalh ding thil hoihlou ka tungkhe dia, na mitmuh mahmah in na zite k’on laksak dia, na inveng ka pedia, aman hiai sun khovak in na zite a luppih ding.

¹²Nang a guk in na hih a, ken Israel mite tengteng mitmuh in sun khovak in ka hih ding” a chi hi.

¹³David in Nathan kiang ah, “TOUPA tung ah ka khialta” a chi hi. Nathan in David kiang ah, “TOUPA’N leng na khelhna a koihmangta. Na si kei ding.

¹⁴Himahleh hiai na thilhih a Pathian gensiatna dia hunlemtang thupitak TOUPA melmate na piak ziak in nang apan hong piangding naupang leng a si ngeingei ding” a chi hi.

¹⁵Huchi in Nathan in a inn ah a paisanta hi. Uriah zi in David a suansak naupang tung ah TOUPA’N a khutkha in, a chi a na mahmahta hi.

¹⁶Huaiziak in, David in naupang adin Pathian kiang ah a ngen ngutngut a, an a ngawla, a lut a, zan khua in lei ah a lum hi.

¹⁷A inkawte lak a upate a thou ua, lei apan kaithou din a kiang ah ading uh. Himahleh a thou nuam kei a, a kiang uah leng a ne sam kei.

¹⁸Hichi ahi a, a ni sagih ni’n naupang a sita hi. David sikhate’n naupang a sita chih a hilh ngamkei uh. “Ngai in, naupang a damlai in a kiang ah thu i gen ua, a ngaikhe nuam kei a. Naupang a sita chih bangchi’n i hilh ngam dia? Bangchi hiam in thil hoihlou a kihih kha ding” a chi uhi.

¹⁹Himahleh David in a sikhate kisimhou a muh in naupang a sita chih a theita hi. David in a sikhate kiang ah, “Naupang sita hia? a chi a, amau, “A sita” a chi uh.

²⁰Huchi in David lei apan a thou a, a kisil a, sathau a kinilh a, a puante a kheng a; TOUPA inn ah a hoh a, Pathian a bia hi. A inn ah a pai nawn a, an a kan a, a ma ah a lui ua, a neta hi.

²¹Huchi in a sikhate’n a kiang ah, “Na thilhih bangchidan ahia? Naupang a damlai in an na ngawl a, na kap a, himahleh naupang a sihtak in na thou a, an na ne a” a chi uhi.

²²Aman, “Naupang a damlai in anngawl in, ka kap hi. Naupang a damna din TOUPA’N hon hehpih khamawh kei ding, kua ahia thei? Ka chi hi.

²³Himahleh tuin a sita ngal a, bang din an ka ngawl dia? Ka pi kiknawn thei dia hia? A kiang ah ka pai dia, himahleh amah ka kiang ah a hong kiknawn kei ding” a chi hi.

²⁴Huchi in David in a zi Bathsheba a lungmuan a, a kiang ah a lut a, a luppih a, tapa a suang a, a min Solomon a sa hi. TOUPA’N amah a it hi.

²⁵Huchi in zawlnei Nathan a thukhak a, aman TOUPA tamsak in a min Jedidiah a sata hi.

²⁶Huchi in, Joab in Ammon suante khopi Rabah a sim a, khopi a lata hi.

²⁷Joab in David kiang ah mi a sawl a, “Rabah ka sim a, tuite khopi ka lata hi.

²⁸Tuin mi omlai teng kaikhawm inla, khopi sualtum in zuan inla, la in. Ken khopi la leng ka min a pu kha ding” a chi hi.

²⁹Huchi in David in mi tengteng a kaikhawm a, Rabah ah a hoh ua, a vasim ua, a lata uhi.

³⁰A kumpipa uh lallukhu khuklai a laksak a, a gikdan dangkaeng talent khat ahi a, suangmantamte leng a tel hi. David a khusak ua, khopi ah gallak tampi a la uhi.

³¹Huchi in asung a om mipite a pikheta a, singatnate, leilehna sikzumte leh sik heipite zang in na a semsak hi. Lei haltakte a bawlsak a; Ammon suante khopi tengteng ah huchibang in a hih hi. Huchi in David leh mi tengteng Jerusalem ah a pai kiknawnta uh.