Read Paite Chin 2 SAMUEL 13 Bible Online

2 SAMUEL 13 - Paite Chin bible

2 SAMUEL 13

¹Huai nung in hichi ahi a, David tapa Absalom in sanggam numei melhoih khat a nei a, a min Tamar ahi. David tapa Amnon in amah a it hi.

²Huchi in Amnon a sanggamnu Tamar ziak in a buai mahmah a; a chi a na hi. Amah lah nungak siangthou a hih ziak in a tung a thil banghiam hih haksapi ahi chi’n Amnon in a ngaihtuah hi.

³Himahleh Amnon in lawm a nei a, a min Jonadab ahi. Amah David unaupa Shimea tapa ahi. Jonadab gitlouhpil mahmah mi khat ahi.

⁴Aman Amnon kiang ah, “Aw, nang kumpipa tapa bangchidan ahia, a niteng a na gawn hulhul mawk? Hon hilhlou ding maw?” a chi hi. Amnon in a kiang ah, “Ka unaupa Absalom sanggamnu Tamar ka it a ahi,” a chi hi.

⁵Jonadab in a kiang ah, “Na lupna ah lumlum inla, ki chinasak in. Na pa’n a hongveh chiang in a kiang ah, Hehpih in ka sanggamnu Tamar ka kiang ah honghoh henla, tanghou nekding hongpia hen. Ka muhtheih in ka mitmuh mahmah in nekding hon bawlsak leh, a khutngei ah ka na ne ding, na chi in” a chi hi.

⁶Huchi in Amnon a lum a, a ki chinasakta hi. Kumpipa’n amah a va et in Amnon in a kiang ah, “Hehpih in ka sanggamnu Tamar hongpai henla, ka mitmuh mahmah in tanghou pek nih hiam hon bawlsak henla, amah khut mahmah ah ka ne ding” a chi hi.

⁷Huchi in David in Tamar kiang ah, “Na sanggampa Amnon inn ah hoh inla, nekding va bawlsak dihve” chi din a in ah mi a sawl hi.

⁸Huchi in Tamar, a sanggampa Amnon inn ah a hoh hi. Amah a na lum hi. Tangbuang a la a, a mek a, a mitmuh a tanghou pek bawl in a kang hi.

⁹A kanna bel a la a, a ma ah a bungkhia hi. Himahleh aman a ne nuam kei hi.

¹⁰Amnon in, “Mi tengteng in hon pawt khiak san uhen” a chi hi. Huchi in a pawt khiak sanvek uhi. Amnon in Tamar kiang ah, “Na khut mahmah a ka nek theihna din nekding dantan ah honla in,” a chi hi. Tamar in a tanghou pek bawl a la a, a sanggampa Amnon kiang ah dantan ah a la lut hi.

¹¹Nesak dia a kiang nai a a va paipih in a nalen a, a kiang ah, “Ka sanggamnu, ka kiang ah honglum in” a chi hi.

¹²Aman a dawng a, “Hilou e, ka sanggampa, honchi teitei ken. Israelte lak ah hichibang thilhih ding ahi kei. Hiai thil gilou haihuaitak hih ken.

¹³Ken ka maizumna koi ah ka paisak dia? Nang leng Israelte lak a mihaite lak a khat na hi ding. Huaiziak in, tuin kumpipa houpih zaw in, n’on neih a nial kei ding” a chi hi.

¹⁴Himahleh a thu a zuikei a, amah sang in a hatzaw ngal a, thagum in a luppih teiteita hi.

¹⁵Huchi in Amnon in huat chihtak in a hawta a, a huatna a itna sang in a lianzaw hi. Huchi in Amnon in a kiang ah, “Thou inla, paimang in” a chi hi.

¹⁶Aman a kiang ah, “Huchi ding ahi kei. Hichibang a dikloutak a n’on delhkhiak ka tung a na gamtatsa sang in a hoihkei zaw hi” a chi hi. Himahleh a zuinuam tuankei hi.

¹⁷Huchi in a nasem sikha a sam a, “Hiai numei ka kiang apan pawtsak inla, kong khak bikbek in” a chi hi.

¹⁸Puanaktual ze tuamtuam a gial a silh hi. Huchibang puanaktual kumpipa nungak siangthoute’n a silh uh ahi. Huchi in a sikha in a pikhia a, kong a khak bikbekta hi.

¹⁹Tamar in a lu ah meivu a koih a, a puanaktual silh ze tuamtuam a botkek a, a sip ah a khut a koih a, ngaihtak a kapkawm in a paita hi.

²⁰A sanggampa Absalom inn a kiang ah, “Na sanggampa Amnon na kiang a om ahi maw? Himahleh tuin daimai in, ka sanggamnu, na sanggampa a ka, limsak dah in” a chi hi. Huchi in Tamar a sanggampa Absalom inn ah nguitak in a kikhumta hi.

²¹Himahleh kumpipa David in huai tengteng a zak in a heh mahmah hi.

²²Absalom in Amnon kiang ah a sia a pha, bangmah a gen nuam kei hi. A sanggamnu Tamar a chih teitei ziak in Absalom in Amnon a haw mahmah hi.

²³Kum nih vengveng a beinung in hichi ahi a, Ephraim kiang a Baal hazar ah Absalom in belam mul a metsak hi. Hiai ah kumpipa tapa tengteng a chial hi.

²⁴Kumpipa kiang ah Absalom a hoh a, “Ngai in, na sikha in belam mul a metsak a, kumpipa leh a sikhate na sikha kiang ah hohle uh a keidia” a chi hi.

²⁵Kumpipa’n Absalom kiang ah, “Hilou e, ka tapa, ka vek un hohlou e, k’on hih tuailuai law kha ding uh” a chi hi. Huchi in aman chial teitei mah leh a ut tuankei a, himahleh a vualzawl hi.

²⁶Huchi in Absalom in “Ahihkeileh ka unaupa Amnon bek ka kiang uah honghoh leh a ke” a chi hi. Kumpipa’n a kiang ah, “Bang din a honghoh tuamse dia?” a chi hi.

²⁷Himahleh Absalom in a ngen teitei a, huchi in Amnon leh kumpipa tapa tengteng a zuisak hi.

²⁸Absalom in, a sikhate kiang ah “Ngai un, Amnon uain dawn a nuam a saklai in na kiang ua Amnon that un, k’on chih leh, that unla, lau kei un, thu k’on pekhin hilou hia? Hangsantak in om unla, kipasal sak un” chi’n thu a pia hi.

²⁹Huchi in Absalom sikhate’n Amnon tung ah Absalom thupiak bang in a hih uh. Huchi in kumpipa tapa tengteng a thou ua, a sabiltung uah a tuangchiat ua, a taimangta uhi.

³⁰Hichi ahi a, lampi a a omlai un, Absalom in kumpipa tapate tengteng a thatvek a, khat lelleng a hawi kei hi, chi in David kiang ah thu a na tung hi.

³¹Huchi in kumpipa a thou a, a puansilhte a botkek a, lei ah a lumta hi. A sikha tengteng in leng a puansilhte uh botkek in a kiang ah ading uhi.

³²David unau Shimea tapa Jonadab in a dawng a, “Ka toupa in kumpipa tapa tangval tengteng a thatvek uh chih gingta kei hen. Amnon kia ahi a si. A sanggamnu Tamar a chih teitei nungsiah Absalom in hichibang a hih a tup him ahi.

³³Huaiziak in tuin ka toupa, kumpipa’n kumpipa tapa tengteng a si uh chih gingta in lunghimawh kei hen. Amnon kia ahi a si” a chi hi.

³⁴Huai sung in Absalom a taimangta hi. Galvil tangval a dak a, a en a, ngai in, a nunglam a tangpang a lampi ah mi tampi a hongpai uhi.

³⁵Jonadab in kumpipa kiang ah, “Ngai in, kumpipa tapate a hongpai uh, na sikha in a gen banggeih a na hina” a chi hi.

³⁶Hichi ahi a, a genkhittak in ngai in, kumpipa tapate a hongtung ua, a aw uh suah in a kap uh. Kumpipa leng a sikhate toh kah petmah in a kapta uhi.

³⁷Himahleh Absalom a taimang a, Geshur kumpipa Amihud tapa Talmai kiang ah a hoh hi. David in niteng in a tapa a sun hi.

³⁸Absalom a taimang a, Geshur gam ah a hoh a, huai ah kum thum a va om hi.

³⁹Kumpipa David Absalom kiang a hoh a ut mahmah hi. Amnon tungtang thu ah a lung a muangta hi. Amah lah a sikhinta chih a theingal a.