Read Paite Chin 2 SAMUEL 14 Bible Online

2 SAMUEL 14 - Paite Chin bible

2 SAMUEL 14

¹Huchi in Zeruiah tapa Joab in kumpipa lungsim Absalom tung ah a om chih a na thei hi.

²Huchi in Joab in Tekoa ah mi a sawl a, huai a numei pil khat a va pisak hi. A kiang ah, Lusun bang in kibawl inla, lusun puansilh inla, sathau leng kinilhlou in numei sawtpi misi sun bang in om in.

³Kumpipa kiang ah hoh inla, a kiang ah hichibang in thu vagen in aw, a chi hi. Huchi in Joab in a kam ah thute a muam hi.

⁴Tekoa khua a numei in kumpipa kiang a thugen di’n a mai a leisi in a khupboh a, zahtakna pia in, “toupa aw, honhuh in” a chi hi.

⁵Kumpipa’n a kiang ah, “Bangchidan ahia?” a chi hi. Aman a dawng a, “Meithai petmah ka hi a, ka pasal a sita hi.

⁶Na sikha nu’n tapa nih a nei a, a nih un lou ah a kisual ua, kuamah phelh ding lah a omkei a, a khat pen in a dang a sat a, a thatta hi.

⁷Ngai in, a inkuan tengteng in na sikhanu a dou khawm ua, a unaupa thatpa, a unaupa a thah ziak a ka thah sam theihna ding un hon pekhia in, huchi in gouluah dingpa leng ka that pah ngal ding uh, a chi uh. Huchibang in ka mei am omlai a mitsak ding ua, ka pasal min neilou leh leitung a suan himhim neilou in a om mai ding” a chi hi.

⁸Kumpipa’n numei kiang ah, “Na inn ah pai inla, na tungtang thu ah thu ka pe mai ding” a chi hi.

⁹Tekoa khua a numei in kumpipa kiang ah, “Ka toupa, kumpipa aw, huai gitlouhna mawh ka tung leh ka pa inkawte tung ah ke mai hen. Kumpipa leh a mangtutphah in mawhpaw kei hen” a chi hi.

¹⁰Kumpipa’n, “Kuapeuh na tung a banghiam gen peuhmah ka kiang ah honpi inla, a hon khoih nawn hetkei ding uh” a chi hi.

¹¹Aman, “Sisan suahmite tung a phulamite’n hihmang nawnlou ding in kumpipa’n TOUPA na Pathian theigige hen aw, huchilou in zaw ka tapa a hihmang kha ding uh, a chi hi. Aman, “TOUPA hinna lou in ka gen ahi, na tapa samzang khat lel leng lei ah a ke kei ding” a chi hi.

¹²Huchi in numei in, “Na sikhanu in toupa ka pu kiang ah thu kam khat kia k’on gen nawn peuhmah ding aw” a chi hi. Aman, “Gen ve” a chi hi.

¹³Numei in, “Ahihleh bang ziak in ahia Pathian mite dou a hichibang a hihtum na hia? Hiai thu apan kumpipa mawh in a kilang ahi, kumpipa’n a delhmangpa a pi kiknawnlouh ziak in.

¹⁴Ka si ngeingei ding ua, lei a bawsa luahnawn theihlouh tuisik bang ka hi uh. Pathian in hinna a lamang kei a, a delhmangpa amah apan hawlkhiak ahihlouhna ding lunggel ahizaw hi.

¹⁵Huchi in toupa ka pu kiang a hiai thu gendia ka hongleng mite’n a hon lauhsak ziak uh ahi. Na sikhanu’n, kumpipa kiang ah ka genphot dia, kumpipa’n a sikhanu nget a hihsak khakleh, ka chi a ahi.

¹⁶Kumpipa’n kei leh ka tapa Pathian gouluahlou dia hihman tummi lak a na sikhanu hunkhe din a na ngaikhe ding, ka chi hi.

¹⁷Huchi in na sikhanu adin, toupa, ka pu thu lungmuanhuaitak hi henla; a sia a pha na khen din toupa ka pu lah Pathian angel bang mai ahi ngal a. TOUPA Pathian na kiang ah om hen, ka chi ahi” a chi hi.

¹⁸Kumpipa’n a dawng a, numei kiang ah, “Kondot peuhmah bangmah hon im ken aw” a chi hi. Numei in, “Toupa ka pu in gen leh a ke” a chi hi.

¹⁹Kumpipa’n, “Hiai thu himhim ah Joab in panna a nei hia?” a chi hi. Numei in a dawng a, “toupa, ka pu, na kha hinna lou in ka gen ahi, toupa ka pu in a gensa kuamah in taklam hiam, veilam ah hiam a pel theikei ding uh. Na sikha Joab in honsawl a, hiai thu tengteng na sikhanu a honmuam vek hi.

²⁰Thil omdan hih lamdang din hiai thil na sikha Joab in a hih ahi. Ka pu bel khovel a thil om tengteng theithei in Pathian angel bang a pil ahi” a chi hi.

²¹Kumpipa’n Joab kiang ah, “Ngai in, ka hihsamta hi. Huaiziak in, pai inla, tangval Absalom vapi nawn lechin maw” a chi hi.

²²Joab in a mai a leisi in a khupboh a, kumpipa kiang ah kipahthu a gen hi. Joab in, “toupa ka kumpipa aw, toupa’n a sikha ngetna a lohchin sak ziak in tuni in na sikha in na mit ka tung chih ka na theita hi” a chi hi.

²³Huchi in Joab a thou a, Geshur ah a hoh a, Absalom Jerusalem ah a honpita hi.

²⁴Kumpipa’n, “A ma inn ah pai henla, ka mel hong mu kei hen,” a chi hi. Huchi in Absalom a ma inn ah a pai a, kumpipa mel a muta kei hi.

²⁵Israel tengteng lak ah Absalom bang a melhoih a phatloh kuamah a omkei uh. A khe lek apan a lusip pha in gensiatna himhim a omkei hi.

²⁶A sam a met chiang in, kum kivei teng in a metsak a, a sam lah a gik ziak in a metzel hi, a bukzel a, kumpipa bukna sekel za nih a pha hi.

²⁷Absalom in tapa thum leh tanu khat a nei a, a min Tamar ahi a, melhoih tak ahi.

²⁸Absalom kum nih hilhial Jerusalem ah a om a; himahleh kumpipa mel himhim a mu kei hi.

²⁹Absalom in kumpipa kiang a amah sawl din Joab a thukhak hi. Himahleh a hoh nuam kei a, a thukhak nawn in leng a hohnuam tuankei hi.

³⁰Huchi in a sikhate kiang ah, “I aw, Joab lou, kei lou kiang ahi a, barli buh a nei a, va hal un” a chi hi. Huchi in Absalom sikhate’n lou a va halta uh.

³¹Huchi in Joab a thou a, Absalom kiang ah a inn ah a hoh a, “Bangdia na sikhate’n ka lou hal ahi ua?” a chi hi.

³²Absalom in Joab a dawng a, “Ngai dih, Bangdia Geshur apan hongpai ka hia? Huai ah omden leng kei adia hoihzaw mah ding hiven. Kumpipa kiang a sawl dia hon thukhak ka hi. Huaiziak in tuin kumpipa mel hon musak in. Tatlekna nei ka hihleh honthat mai leh a ke” a chi hi.

³³Joab kumpipa kiang ah a hoh a, a hilh hi. Aman Absalom a sam a, kumpipa kiang ah a hoh a, kumpipa ma ah a mai a leisi in a khupboh a; huchi in kumpipa’n Absalom a tawp hi.