Read Paite Chin 2 SAMUEL 15 Bible Online

2 SAMUEL 15 - Paite Chin bible

2 SAMUEL 15

¹Huaikhit in hichi ahi a, Absalom in kangtalai leh sakolte leh mi sawmnga a ma a tai din a bawlkhol hi.

²Absalom zingkhang in a thou a, kulh kongkhak lampi nawl ah a na ding hi. Thubuai a na khensak dia kumpipa kiang a hongpai peuhmah a na sam a, “Kua khua na hia?” a na chizel hi. Amau, “Na sikha Israel namte lak a khat ka hi” a chizel uh.

³Absalom in, “I aw, na thu a hoih in a dik hi. Himahleh a ngaikhe ding mi kumpipa’n kuamah a sepkei” a na chizel hi.

⁴Absalom mah in, “Michih thubuai gen ding nei hiam, nget ding nei hiam peuhmah ka kiang ah hongpaina ding un, gam vaihawmpa in bawl in om leng china tel ing e aw! Huchi in diktak in vai ka na hawmsak ding” a na chi zel hi.

⁵Hichi leng ahilai a, kuapeuh amah zahtakna pedia hong paitou peuhmah a khut in a na sawka, a na len a, a na tawp hi.

⁶Israel mi kumpipa kiang a thugen dia hong kuan peuhmahte Absalom in huchibang in a na hihzel hi. Huchi in Absalom in Israel mite lungtang a guksak hi.

⁷Hichi ahi a, kum li a hong bei in Absalom in kumpipa kiang ah, Hebron khua a TOUPA kiang a ka thuchiam tangtun din hon hohsak in.

⁸Na sikha in Suria gam a Geshur a ka omlai in Jerusalem a a hon pikik peuhmah leh TOUPA na ka sem ding, chi in thu kachiam khinta, a chi hi.

⁹Kumpipa’n a kiang ah, “Khamuangtak in kuan in” a chi hi. Huchi in a thou a, Hebron ah a hohta hi.

¹⁰Himahleh Absalom in, “Pengkul ging na zak peuhmah chiang un, Hebron ah Absalom kumpipa ahita, na chi ding uh” chi in Israel nam tengteng kiang ah mi a simsawl khinta hi.

¹¹Jerusalem apan a sap mi za nih in Absalom a zui uh. Amau bel lungsim siangtak pu in a hoh ua, thil omdan bangmah a theikei uhi.

¹²Absalom in kithoihnate a latlai in Gilon mi Ahitophel, David thudotmi, a Giloh khua apan a thukhak hi. A thusawm guk uh a thupi mahmah a; Absalom lam ah lah mipite a pung hulhul uhi.

¹³David kiang ah, Israel mite lungtang Absalom lam ah a awn mahmah, chih thupuatu khat in a honghilh hi.

¹⁴David in Jerusalem a om, a sikha tengteng kiang ah, “Thou unla i taikhe ding uh. Kuamah lah Absalom apan suakta lou ding i hi ngal ua. Pawtkhe meng un. Huchilou in zaw a hon phapah mai dia, i tung uah thil hoihlou tak a hontun dia, namsau in khua a hongsual kha ding” a chi hi.

¹⁵Kumpipa sikhate’n kumpipa kiang ah, “Ngai in, na sikhate ka toupa, ka kumpipa un a seh peuhmah hihdia mansa ka hi gige uh” a chi uhi.

¹⁶Kumpipa a pawt a, a inkaw tengteng in a zui uhi. Kumpipa’n inn ngak din numei sawm, a meite a koih hi.

¹⁷Kumpipa a pawt a, mi tengteng in a zui uh. Gamla kuam mun khat, inn tawpna ah a khawl tadih uhi.

¹⁸A sikha tengteng in a paikheng ua; Keritmite, Peletmite, Gitmite, mi za guk Gath apan amah honzuite kumpipa ma ah a pai uhi.

¹⁹Huchi in, kumpipa’n Gitmi Ittai kiang ah, “Bangchidan ahia nang na hongtel? Pai kiknawn inla, kumpipa kiang ah om in. Nang zaw mikhual gamdangmi leng na hi ngal a, nangmah mun lam ah kiknawn mai in.

²⁰Zan zeka hong na hi a, tuni a ka kiang ua asuk atou a honzui sam din k’on chi ding maw? Ka pai theihtheihna a pai ding ka hi, nang zaw kiknawn inla, na unaute tengteng pi kiknawn in. Hehpihna leh thutak na kiang ah om hen” a chi hi.

²¹Ittai in kumpipa kiang ah, “TOUPA hinna leh kumpipa, ka toupa hinna lou in ka chi ahi. Kumpipa, ka toupa na omna na ah, sih leh sih ahi dia, dam leh dam ahi dia, na sikha a omsam ding” a chi hi.

²²David in Ittai kiang ah, “Pai inla, pai zel aw leh” a chi hi. Huchi in Gitmi Ittai, a mite tengteng leh a tu a ta tengteng toh a pai uhi.

²³Ngaihtak in huai gam miteng a kap ua, mipite a paivek uh. Gamdai lampi zuan in a pai ua, kumpipa’n leng Kidron lui a kan a, mipi tengteng in leng a kan uhi.

²⁴Zadok Pathian thukhun bawm zawng in Levite tengteng toh a kiang ah a pai uhi. Pathian bawm a nga ua, mipi in khua a pawt khiak sanvek tan in Abiathar a hohtou hi.

²⁵Kumpipa’n Zadok kiang ah, “Pathian bawm pen khopi sung ah zawnglut nawn un. TOUPA mittung a ka om leh a hon pikik nawndia, Pathian bawm leh a omna a hon musak nawn ding.

²⁶Himahleh, nang ah kipahna mahmah ka neikei, a chih leh ngai in, hichimai ka hi a, hoih a sak bangbang in ka tung ah hihmai hen” a chi hi.

²⁷Kumpipa’n siampu Zadok kiang ah, “Mutheipa na hi ka hia? Na tapate nih, na tapa Ahimaaz leh Abiathar tapa Jonathan toh lungmuangtakin khopi ah pai nawn un.

²⁸Ngai in, kei zaw tanchin a hong theihsak masiah uh gamdai a luikannate ah ka na om ding” a chi hi.

²⁹Zadok leh Abiathar in Pathian bawm Jerusalem ah a paipih nawn ua; huai ah a omta uh.

³⁰David Olive tang paitouhna ah a kahtou a, a paitouh kawm in a kap kawmkawm hi. A lu a khuh a, khevuak in a pai hi. A kiang a mi om tengteng in a lu uh a khuhchiat ua, kap kawmkawm in a paitou uhi.

³¹Kua hiam khat in Ahitophel Absalom lam a pangin thusawmmite lak ah a pangsam, chih David a hilh hi. David in “TOUPA aw, Ahitophel lemtheihna haina suaksak din ka hon ngen hi” a chi hi.

³²Hichi ahi a, David Pathian biakna tangvum a kahkhiak touh leh ngai in, Arka mi Hushai a puanak bohkek silh a, a lu a leikai niaunuau in amah dawn din a hongpai hi.

³³David in a kiang ah, “Ka kiang a na hongsam leh zaw, kei adin puakgik na hi ding.

³⁴Himahleh khopi a na kiknawn a, Absalom kiang a, toupa aw, na sikha in ka om ding. Tuma lam a na pa sikha a ka om bang in, tuin na sikha in ka om leuleu ding, na vachih leh Ahitophel lemtheihna hon dalsakpa na hi zaw ding hi.

³⁵Huai ah na kiang ah siampu Zadok leh Abiathar leng a omsam uh ahi kei maw? Hichi ahi ding a, kumpipa inn a thupawt na zak peuhmah siampu Zadok leh Abiathar na hilh zel ding.

³⁶Ngai in, a tapate uh nih Zadok tapa Ahimaaz leh Abiathar tapa Jonathan leng a kiang uah a om uhi. Na thil zak peuhmahte hon theisak din amau na honsawl zel ding” a chi hi.

³⁷Huchi in David lawm Hushai khopi ah a lut a; Absalom Jerusalem ah a lutta hi.