Read Paite Chin 2 SAMUEL 17 Bible Online

2 SAMUEL 17 - Paite Chin bible

2 SAMUEL 17

¹Huailou leng Ahitophel in Absalom kiang ah, “Mi sing khat leh sang nih ka telkhe dia, tuzan in David delh din ka kuan ding

²A bahlai leh hatlouh laitak ka vapha n’on dia, ka va lausak ding. Huchi in a kiang a mi tengteng a taimang ding uh. Huchi in kumpipa kia ka vathat mai ding.

³Mipite na kiang ah k’on pikik nawn vekding. Na mi zonpa mi tengteng hongkik toh kibang ahi. Huchi in mi tengteng khamuang in a om ding uh” a chi hi.

⁴Huan, hiai thugen in Absalom leh Israel upate a kipaksak hi.

⁵Huchi in Absalom in, “Arka mi Hushai sam peuhmah phot inla, amah gendan i ngaikhe peuhmah ding uh” a chi hi.

⁶Hushai Absalom kiang a hongtun in Absalom in, “Ahitophel in hichibang in a gen a, a genbang a hih ding i ding uam? Hihlou ding hileng nang hon gen himhim dih” chi in a na houpih hi.

⁷Hushai in Absalom kiang, “Tutunga Ahitophel lemtheihna a hoih kei” a chi hi.

⁸Hushai in, “Na pa leh a mite na thei a, sepaih hangsantak, gam a vompi a nou laksak bang mai ahi uh. Na pa lah galdou mi ahi a, mipi lak ah a giak kholkei ding.

⁹‘Ngai in, tuin leng koilai leihawm hiam ah, koilai mun ah hiam a kibu ahi ding. Hichi ahi ding a, a kisual tung ua mi khenkhat a puk ua leh a za peuh in, Absalom zuite a that ek uh, a chimai ding uh’.

¹⁰Huchi in mi hangsantak, humpinelkai lungsim bangpu mi hial leng a hong lungke mahmah ding uh. Israel mi tengteng in lah na pa sepaih hangsantak ahihdan leh a kiang a mi omte mi hangsan taktak ahihdan uh a thei vek uhi.

¹¹‘Kei hoihsak sam dan, Israel mi tengteng Dan apan Beer — sheba pha in tuipi a piaunel zah hial ding na kiang ah samkhawm vek lehang; kidouna ah nang nangawn kuan lechin.

¹²Huchi in koilai mun peuh ah i kituahna na ah lei a daitui kia bang mai in i boh ding ua; amah leh a kiang a mi om tengteng khat lel leng i hawikei ding uhi.

¹³Huailou leng, khua a a lut leh Israel mi tengteng, khauhual tawi in huai khua ah i vahoh ding ua, suang neuchik leng omlou hial khop in lui ah i kaikhe vek ding” a chi hi.

¹⁴Huchi in Absalom leh Israel mi tengteng in, “Arka mi Hushai hoih sak Ahitophel hoihsak sang in a hoihzaw” a chi uhi. TOUPA’N Absalom tung a thil hoihlou a tunsak theihna din Ahitophel hoihsak hoihtak letkhe din a na sepkhin him ahi.

¹⁵Huchi in Hushai in siampu Zadok leh Abiathar kiang ah, “Huchibang khachibang in Ahitophel in Absalom leh Israel upate hoih din a ngaihtuah pih a; ken huchibang khachibang in hoih din ka ngaihtuah hi.

¹⁶Huaiziak in, tuzan in gamdai lui kainate a giak nawnlou in kan ngeingei un. Huchilou in zaw kumpipa leh a kiang a om tengteng a hihmang vek kha ding uh chi’n David hilhsak zok un” a chi hi.

¹⁷Khopi sung a lut uh kuama’n a muhlouhna ding un, Jonathan leh Ahimaaz bel En-rogel ah a om ua; sikhanu khat in amaute a va hilhzel hi. Amau kumpipa David a va hilh sawnzel uhi.

¹⁸Himahleh naupang in a na mu a, Absalom a hilh hi. Himahleh a nih un a taimang pah ua, Bahurim a mi khat, a intual a tuileh nei in ah a va hoh ua, tuileh sung ah a lutsukta uhi.

¹⁹Numei in tuileh a sitna in a sin a, a tung ah buh a phou a, kuama’n a theikei hi.

²⁰Absalom sikhate numei kiang ah a vahoh ua; Ahimaaz leh Jonathan kaw om ahi ua? a chi uh. Numei in a kiang uah, Lui a kanta ding uh, a na chi hi. A va zong ua, a mu kei ua, Jerusalem ah a kiknawn uh.

²¹Hichi ahi a, a paitum khit un tuileh apan a hong pawtkhia ua, kumpipa David a va hilh uhi. David kiang ah, “Pawtkhia unla, luikan pah un, huchi in Ahitophel in a hontum hi” a chi uh.

²²Huchi in David leh a kiang a mi om tengteng a pawtkhia ua, Jordan lui a kan uh. Khua a hongvak in Jordan lui kanlou khat lel leng a omkei uh.

²³Ahitophel in a hoihsak dan a zuikei uh, chih a theih in a sabiltung a van a, a pawtkhia a, a khua ah a pai hi. A inkuante khosakna ding a bawlsak sipsip a, huchi in a awklumta hi. Amah a sita a, a pa han ah a vui uhi.

²⁴Huchi in David Mahanaim a vatung hi. Absalom in a kiang a Israel mi tengteng toh Jordan lui a kan uhi.

²⁵Absalom in Joab sik in Amasa sepaih heutu din a koih hi. Amasa bel, mi khat a min Ithra tapa ahi. Ithra bel Israel mi, Joab nu sanggam Nahash tanu Abigail zi a neipa ahi.

²⁶Israel mite leh Absalom in Gilead gam ah panmun a khoh uhi.

²⁷Hichi ahi a, David Mahanaim a tun in, Ammon suan Rabah khua a mi Nahash tapa Shobi, Lo Debar khua a mi Amiel tapa Makir, leh Rogelim khua a Gilead mi Barjilaite’n

²⁸Lupnate, maiphiatkuangte, leibelte, huitbuh, barli buh, tangbuang, be kankeu,

²⁹Khuaizu, mokhon, belamte, bawng nawikhalte, David leh a kiang a om mite nekding a hontawi uhi. “Gamdai ah mite a gilkial ua, a tawl ua, a dangtak uhi” a chih ziak un.