Read Paite Chin 2 SAMUEL 19 Bible Online

2 SAMUEL 19 - Paite Chin bible

2 SAMUEL 19

¹Huan, Joab a hilh ua, “Ngai in, kumpipa’n kap in Absalom a sun hi” a chi uh.

²Huai ni a a vualzohna uh mi tengteng adin sunna a honghi zawta hi. “A tapa ziak in kumpipa a lungkham mahmah” a chih uh huai ni’n mite’n lah a na zata ngal ua.

³Mite kidouna a mi taimang a zum ziak a a guk a paimang bang in huai ni’n a guk in khopi ah a lut uhi.

⁴Kumpipa’n a mai a hum a, “Aw, ka tapa Absalom, aw Absalom, Ka tapa, ka tapa!” chi in kumpipa a kap huphup hi.

⁵Joab inn ah kumpipa kiang ah a lut a, “Na hinna, na tapate hinna, na tanute hinna, na zite leh na meite hinna humbit mite tuni in zumtak in na bawlta hi.

⁶Nang honhawte na it a, nang hon itte na hua hi. Heutute leh sepaihte nang adia bangmah hilou bang in tuni in na hihlangta hi. Absalom dam in, kou midang tengteng tuni in sizaw vek le ung, na kipahlam tak hi leh kilawm in ka thei hi.

⁷Huaiziak in, thou inla, pawtkhia in. Na mite lungmuansak ding lamthu gen in. Na pawt khiak kei leh TOUPA min lou in ka kichiam hi. Mi khat lel leng tu zan in na kiang ah a omkei ding. Huai lah nang adin na tuailai apan tutan a na tung a thil hoihlou hongtung teng sang in a hoih keizaw ding” a chi hi.

⁸Huchi in kumpipa a thou a, kulh kongpi ah a va tu hi. “Ngai un, kumpipa kulh kongpi ah a tu hi” chi in mipi tengteng a hilh uhi. Mipi tengteng kumpipa ma ah a va hoh uhi. Israelte bel amau puanin chiat ah a taikek uhi.

⁹Israel nam a mi tengteng a kisel vengvung ua, “Kumpipa’n i melmate khut apan a hon hunkhia a, Philistiate khut apan a hon hondamta. Tuin Absalom ziak in gam a taikhiak san hi.

¹⁰Absalom i kumpipa dia thau i nilhpa uh lah kidouna ah a sita a; Bang a chia kumpipa pikikna ding kamkhat bek na genlouh uh?” a kichi uh.

¹¹Kumpipa’n siampu Zadok leh Abiathar kiang ah a sawl a, Judah upate kiang ah, “Bangdia kumpipa a inn a pikik thu a, a zekai pen a pang na hi ua? Israel mite’n kumpipa pikik thu a gen ulah kumpipa kiang a tungta hi.

¹²Ka unaute na hi ua, ka guh leh ka sa lah na hi ngal ua, bang a chia a zekaipen a pang peuhmah na hi ua? chi in vagen un” a chi hi.

¹³Amasa kiang ah, “Ka guh leh ka sa na hi ka hia? Joab sik a ka ma a sepaihte heutu a k’on bawl kei leh, Pathian in a lohloh honloh mai henla, huai sang a thupizaw in leng, a chi” chi din mi a sawl hi.

¹⁴Huchi in Judah mi tengteng lungtang mi khat lungtang bang mai in a awnsakta hi. Huchi in kumpipa kiang ah, “Na mi tengteng toh hong kiknawn un” chi din mi a sawl uhi.

¹⁵Huchi in kumpipa a pai nawn a, Jordan a hongtung hi. Kumpipa dawn a, Jordan a na pi galkai din Gilgal ah Judahte a hoh uhi.

¹⁶Hahurim a Benjamin mi Gera tapa Shimei leng kintak in kumpipa dawn din Judahte mah toh kiton in a pawtkhia hi.

¹⁷A kiang ah Benjamin mi sang khat toh, Saul inkawte sikha Jiba, a tapa sawmlehnga leh a sikha sawmnih toh ahi ua, kumpipa ma in Jordan a galkahta uhi.

¹⁸Kumpipa inkawte pi galkahna ding leh hoih a sak bangbang a hih din long a paipih uh. Jordan lui a galkah leh Gera tapa Shimei kumpipa ma ah a khupboh hi.

¹⁹Kumpipa kiang ah, “Ka toupa’n thulimlouhna nei in hon sepkei henla; toupa ka kumpipa’n Jerusalem a pawtsan ni a na sikha in dikloutak a na hihte leng theigige sam kei hen. Kumpipa’n a lungtang ah paikei hen.

²⁰Na sikha in thil ka hihkhial chih ka kithei hi. Huaiziak in, ngai in, Joseph inkaw tengteng lak a ka toupa kumpipa mu dia tuni a hongpawt masapen ka hi” a chi hi.

²¹Himahleh Zeruiah tapa Abisai in a dawng a, “TOUPA thau nilhpa a hamsiat ziak in Shimei pen thah ding ahi kei dia hia? a chi hi.

²²David in, “Nou Zeruiah tapate aw, nou n’on na theihsak ding uh bang ahia om? Tuni a kei hondoute na hi ding u maw? Tuni a Israelte lak a mi thah ahi dia hia? Tuni’n Israel mite tung a kumpipa ka hih theilou ka hi maw?” a chi hi.

²³Huaiziak in, kumpipa’n Shimei kiang ah, “Na si kei ding” a chi hi. Huchi in Kumpipa a kiang ah a kichiamta hi.

²⁴Saul tapa Mephibosheth kumpipa mu din a honghi. Kumpipa a pawt khiak ni apan galmuang a a hong painawnni tan in a khete a zunkei a, a khamul a tankei a, a puan leng a sawp sam kei hi.

²⁵Hichi ahi a, kumpipa mu dia Jerusalem a hongtun in kumpipa’n a kiang ah, “Mephibosheth, Bangdia ka kiang a hongsam lou?” a chi hi.

²⁶Aman a dawng a, “Ka toupa, kumpipa aw, ka sikha in a hon zekhem a; na sikha in, kumpipa kiang a hoh din ka tuanna ding sabiltung ka van ding, ka chi a; na sikha lah a khe a bai ngal a.

²⁷Kumpipa ka toupa kiang ah na sikha a hek hi. Himahleh toupa ka kumpipa Pathian angel ahi. Huaiziak in, hoih na sak bangbang in hih in.

²⁸Ka pa inkawte tengteng toupa ka kumpipa ma a thahvek dia kilawm ahi uhi. Himahleh na sikha na an umpihte lak ah na pangsak hi. Huaiziak in, kumpipa kiang ah thildang phut ngamlai dia kilawm ka hi maw?” a chi hi.

²⁹Kumpipa’n a kiang ah, “Na tungtang thu bangdia gennawn nak na hia? Nang leh Jiba gam kihawm un ka chi hi” a chi.

³⁰Mephibosheth in kumpipa kiang ah, “Eh, aman tangvek hen, toupa ka kumpipa lah amah inn mah ah galmuang in a hongpai nawnta ngal a” a chi hi.

³¹Gilead mi Barjilai Rogelim apan a hongsuk a; kumpipa Jordan a pi galkah din amah toh Jordan ah a hoh hi.

³²Barjilai upapi ahi a, kum sawmgiat a upa ahita. Mahanaim a kumpipa omsung in nekding a pia a, amah mi neizou tak ahi.

³³Kumpipa’n Barjilai kiang ah, “Ka kiang ah hong inla, ka kiang ah Jerusalem ah, k’onvak ding” a chi hi.

³⁴Barjilai in kumpipa kiang ah, “Jerusalem a kumpipa toh hohtou din bangtan ka damlai dia?

³⁵Tuin kum sawmgiat ka hita a; a sia leh a pha ka khen thei ahia? Na sikha in ka nek leh dawn, a lim leh lim louh leng a theikak thei ahia? Pasal leh numeite lasak ging leng ka za thei nawn ahia? Huaiziak in, na sikha bangdin toupa ka kumpipa adia puakgik ka hih maizen ding?

³⁶Na sikha in kumpipa toh Jordan galkah lel ka tup ahi. Bang din kumpipa’n huchibang in hoihman a honthuk chitchiat dia?

³⁷Hehpih in na sikha hon paisak nawn mai in, k’on ngen hi. Ka nu leh ka pa han omna koumau khua ngei ah ka si ding. Himahleh en in, na sikha Chimham; toupa ka kumpipa toh hong galkah henla, a tung ah hoih nasak bangbang in hih in” a chi hi.

³⁸Kumpipa’n a dawng a, “Chimham ka kiang ah a galkah sam dia, hoih na sak bangzel in a tung ah ka hih ding. Thil n’on nget peuhmah k’on hihsak ding” a chi hi.

³⁹Huchi in mi tengteng Jordan gal a kah ua, kumpipa leng a galkah hi. Kumpipa’n Barjilai a tawp a, a vualzawl hi. Huchi in amah a mun ah a pai nawnta hi.

⁴⁰Huchi in kumpipa Gilgal ah a galkah a, Chimham a kiang ah a galkah sam hi. Judami tengteng in kumpipa a pi galkah ua, Israel mi leng a kim khat a pang uhi.

⁴¹Ngai in, Israel mi tengteng kumpipa kiang ah a hong ua, kumpipa kiang ah, “Bang a chia ka unau uh Judah mite’n nang hon gukhia a, kumpipa leh a inkawte leh David mite teng Jordan gal a a pikhawm vekmawk uh?” a chi uhi.

⁴²Judah mi tengteng in Israel mite a dawng ua, “Kumpipa ka kinaihpih uh a hih ziak ahi. Bangdia hiai thu a heh mawk? Kumpipa neih muang a om ka hi mahmah u maw? Thilpiak banghiamte leng a honnei ahia?” a chi uh.

⁴³Israel mite’n Judah mite a dawng ua, “Kumpipa ah tan sawm ka nei ua, David ah noute sang in anglaitanna ka neizaw uh. Bangdia hon ngaineu maw? Kumpipa pi kiknawn sawm masate ka hi kei uh maw? a chi uh. Huchi in Judah mite thu Israel mite thu sang in a khauhzaw hi.