Read Paite Chin 2 SAMUEL 2 Bible Online

2 SAMUEL 2 - Paite Chin bible

2 SAMUEL 2

¹Huan, hichi ahi a, huai nung in David in “Judah gam a khua khat peuh ah ka hohtou diam?” chi in TOUPA a dong hi. TOUPA’N a kiang ah, “Hoh tou in,” a chi hi. David in, “Koi ah ahia ka hohtouh ding?” a chi a, Aman, “Hebron ah” a chi hi.

²Huchi in David huai ah a hohtou a, a zi nihte, Jezreel mi Ahinoam leh Karmel mi Nabal zi Abigail toh.

³David in a kiang a om mi tengteng a pitou a, michih a inkuante chiat utoh, Hebron khuate ah a tengta uhi.

⁴Judah gam a mite a honghoh ua, huai ah Judah inkawte tung a kumpipa din David thau a nilh uhi. Huchi in, “Saul vuimite Jabesh-gilead mite ahi uh” chi’n David a hilh uh.

⁵Jabesh-gilead mite kiang ah David in mite a sawl a, a kiang uah, “Na pu, na pu uh Saul na hehpih dan uh hihlang a na vui ziak un, TOUPA’N hon vualzawl hen.

⁶Tuin TOUPA’N na tung uah chitna leh thutak langsak henla; hiai thil na hih ziak un ken leng na chit man uh ka honthuk ding.

⁷Huaiziak in, tuin na khutte uh honghat henla, hangsantak in om un. Na pu uh Saul a sita hi. Judah inkawte’n a tung ua kumpipa din thau a honnilh khinta uhi” chi’n a va gensak hi.

⁸Himahleh Ner tapa Abner, Saul sepaihte heutu in, Saul tapa Ishboshet Mahanaim ah a paipih hi.

⁹Gilead, Ashur, Jezreel, Ephraim leh Israel tengteng tung a kumpipa in a bawlta hi.

¹⁰Saul tapa Ishboshet in Israel tung a vaihawm apat in kum sawmli a upa ahi a, kum nih sung vai a hawm hi. Himahleh Judah mite’n David a zui uh.

¹¹David in Hebron a Judah chite tung ah kum sagih leh khaguk vai a hawm hi.

¹²Ner tapa Abner leh Saul tapa Ishboshet sikhate Mahanaim apan a pawtkhia ua, Gibeon ah a pai uhi.

¹³Zeruiah tapa Joab leh David sikhate a paikhia ua, Gibeon dil ah a kituak uh. Pawl khat dil galkhat lam ah a tu a, pawl khat pen dilgal langkhat ah a tu hi.

¹⁴Abner in Joab kiang ah, “Tangvalte hong kuan uhenla, i ma uah hong kisual uhen, a chi hi. Joab in, “Hong kuan le uh ake” a chi hi.

¹⁵Huchi in a kuan ua, a zahchiang sep in a galkah phei ua, Benjamin chi, Saul tapa Ishboshet lam a pang sawmlehnih, David sikha sawmlehnih ahi uh.

¹⁶A langte uh luchiat ah a kimantuah ua, amau tumte chiat namsau in a nak ah a kidawt ua; a pukkhawm vek uhi. Huaiziak in, huai mun Helkath, hazzurim a chi ua, huai Gibeon a om ahi.

¹⁷Huai ni a a kisual uh a thupi mahmah a, Abner leh Israel mite David sikhate ma ah zoh in a om uhi.

¹⁸Huai mun ah Zeruiah tapate thum, Joab, Abisai leh Asahel a om uh. Asahel zukpi bang a ngalhat ahi.

¹⁹Asahel in Abner a delh a; Abner a delh taklam hiam veilam hiam a pialsan hetlou in a delh vengveng hi.

²⁰Abner a lehngat a “Nang na hi maw, Asahel?” a chi hi. Aman a dawng a, “Ka hi,” a chi hi.

²¹Abner in a kiang ah, “Na taklam hiam, na veilam hiam ah pialkhia inla, tangval khat man inla, a galvan laksak in” a chi hi. Himahleh Asahel in amah a delh a pialsan nuam tuankei hi.

²²Abner in Asahel kiang ah, “Hon pialsan in. Bangdia lei a hon satpuk ding ka hia? Na unaupa Joab mel ka mu ngam dia hia?” a chi nawn hi.

²³Himahleh a pial nuam tuankei hi. Huaiziak in, Abner in a teipi tawlam in a nakguh ngana nuai tak a sun a, a nunglam ah teipi a paisuak a, huai ah a puk a, huai mun ah a sita hi. Hichi ahi a, Asahel puk a, a sihna mun a hongpai teng huai mun ah a khawl zel uhi.

²⁴Himahleh, Joab leh Abisai in Abner a delhzui ua; Gibeon gamdai lampi a Giah chin a Ammah tang a tun un ni a tumta hi.

²⁵Benjamin suante Abner kiang ah a kikaikhawm ua, pawl khat in a kibawl ua, mualvum ah a va dingta uh.

²⁶Abner in Joab a sam a, “Namsau in hon negai den ding hia? A tawplam in a hong kha mahmah ding, chih na theikei maw? Bang tan ahia a unaute uh delh tawpsan a kiknawn dia mipite hilhlou a na om ding?” a chi hi.

²⁷Joab in, “Pathian hinna lou in ka gen ahi. Bangmah na genlou hile chin zingchiang apan mite paimang khinta ding ua, a unaute uh delhlou ding hi ve un” a chi hi.

²⁸Joab in pengkul a mut a, mite ading depdup uh. Israel mite a delhta kei ua, kuamah a sual nawnta kei uhi.

²⁹Abner leh a mite zan khua in phaizang tawn suak a pai in Jordan a kan ua, Bithron a kantan ua, Mahanaim a tung uhi.

³⁰Joab bel Abner delh a kiknawnta a, mipi tengteng a kaihkhawm vek leh David sikhate sawmlehkua leh Asahel a kimta kei uhi.

³¹Himahleh David sikhate’n Benjamin mite leh Abner mite za thum leh sawmguk a that uhi.

³²Asahel luang a la ua, Bethlehem a a pa han ah a vui uh. Joab leh a mite zankhua in a pai ua, khua vak in Hebron a tung uhi.