Read Paite Chin 2 SAMUEL 20 Bible Online

2 SAMUEL 20 - Paite Chin bible

2 SAMUEL 20

¹Huan, Benjamin mi Bikri tapa Sheba, Belial mi khat a na om hi. Aman pengkul a mut a, “David ah tantuan i neikei ua, Jesse tapa ah leng gouluah ding i neisam kei, Israel mite aw, na puanin lam chiat uah pai un” a chi hi.

²Huchi in Israel mi tengteng in David a zuih uh a lehngatsan ua, Bikri tapa Sheba a zuita uhi. Judah mite’n Jordan apan Jerusalem pha in a kumpipa uh a len chinten uhi.

³David Jerusalem a a inn ah a hongpai hi. Kumpipa’n numei sawm a meite inn ngak dia a koihte a pi a, inn khat ah a khum a, a nekding uh pia in a vak a, himahleh amau a luppih kei hi.

⁴Kumpipa’n Amasa kiang ah, “Ni thum sung in Judah mite honsap khawm sak inla, nang leng hong omsam in” a chi hi.

⁵Amasa Judah mite samkhawm din a kuan hi. Himahleh a hunseh sak sang in a va tamsawt zawta hi.

⁶David in Abisai kiang ah, “Bikri tapa Sheba in Absalom sang in i poi uh a khoihzaw dia hia? Na toupa mite pi inla delh un. Huchilou in zaw khaw kulhnei ah a lut man dia, muh phaklouh in i khahsuah kha ding” a chi hi.

⁷Huchi in, Joab mite, Kereth mite, Pelet mite leh a mi hat tengteng un amah a zuikheta uh. Jerusalem apan Bikri tapa Sheba delh din a pawtkhia uhi.

⁸Gibeon a suangpi omna a vatun un, Amasa in amaute a na dawn hi. Joab in kidouna van a silh a, a tung ah namsau a pai toh kawnggak ah a kuah hi. Mailam a a paikawm in huai namsau a phawi hi.

⁹Joab in Amasa kiang ah, Unaupa, “Na hoih tadih na maw?” a chi hi. Huaikhit in Joab in Amasa tawp din a khut taklam in a khamul a man hi.

¹⁰Himahleh Amasa in Joab in a tawi namsau a limsak kei hi. Joab in a gil ah a dawt a, a gilzangte lei ah a tolhkhe zelzul a, a dawt tuan nawn kei hi. Huchi in a sita hi. Joab leh a unaupa Abisai in Bikri tapa Sheba a delh uhi.

¹¹A kiang ah Joab mite lak a tangval khat ading a, “Joab lam a pang leh David lam a pang peuhmah in Joab zuihen” a chi hi.

¹²Amasa bel lamlian laitak ah si a kidiah in a na lum hi. Huai mi’n mi tengteng ding didepa a muh in lamlian apan Amasa luang gamlak ah a suan a, a kiang a hongpai peuhmah khawlzela a muh ziak in puan in a tuam hi.

¹³Lamlian apan suankhiak ahihnungin Bikri tapa Sheba delh din mi tengteng in Joab a zui uhi.

¹⁴Abel leh Bethmaka pha in Israel nam tengteng leh Ber mi tengteng a tawnvek a; amau a ki kaikhawm ua amah a zuita uhi.

¹⁵Bethmaka a Abel khua ah amah a um ua; khaw zulzul ah lei a chiang ua, kulh zul ah ading uhi. Joab kiang a mi om tengteng in chimsak din kulh a khoh okok uhi.

¹⁶Huchi in numei pil khua apan a hong kikou a, “Ngai un, ngai un; Joab kiang ah, Hongpai nai in, na kiang ah thu ka gen ding, va chi un” a chi hi.

¹⁷A kiang a vanaih tak in numei in, “Joab na hi hia?” a chi hi. Aman “Hi e,” chi’n a dawng hi. Huchi in a kiang ah, “Na sikhanu thugen ngaikhe dih,” a chi a, aman, “Ka ngaikhia hi,” chi’n a dawng hi.

¹⁸Huai numei in, “Nidanglai in Abel khua ah a kikum ngeingei ding uh” a chizel uh. Huchibang in thu a tawpsak zel uhi.

¹⁹Kei Israel lak a kituah ut leh muanhuai mite lak a khat ka hi. Nang zaw Israel khua, a khaw bulpi pen hihsiat tum neilim ve. Bangdia TOUPA gou nawmvalh tum na hia? a chi hi.

²⁰Joab in a dawng a, “Huchibang ahi zenzen kei. Nawmvalh hiam, hihsiat hiam ka tumkei himhim hi.

²¹Huchibang thu ahi kei hi. Ephraim tanggam a mi Bikri tapa a min Sheba in kumpipa kalh in, David hilhial kalh in a khut a lik hi. Amah hon pekhe le uchin khua ka pawtsan mai ding” a chi hi. Numei in Joab kiang ah, “Ngai in, a lutang kulh apan lawtkhiat ahi ding” a chi hi.

²²Huchi in numei in a pilna in mi tengteng kiang ah a vapai a, Bikri tapa Sheba lutang a tan ua, Joab kiang ah a lawnkhia uhi. Huchi in pengkul a mut a, amau puanin chiat zuan in khua apan a paita uhi. Joab Jerusalem ah kumpipa kiang ah a paikikta hi.

²³Joab Israel sepaih tengteng heutu ahi a; Jehoiada tapa Benaiah ahihleh Kereth mi leh Pelet mite heutu ahi.

²⁴Adoram nasem dia goih teiteite heutu ahi a, Ahilud tapa Jehosaphat tanchin gelhmi ahi.

²⁵Sheva Laigelhmi ahi a; Zadok leh Abiathar ahihleh siampute ahi uh.

²⁶Jair mi Ira leng David miliante heutu ahi.