Read Paite Chin 2 SAMUEL 23 Bible Online

2 SAMUEL 23 - Paite Chin bible

2 SAMUEL 23

¹Hiaite David thu nanungpen ahi. Jesse tapa David, sangtak a dopsang a ompa, Jakob Pathian thaunilhpa, Israelte la phuaktu in a chi hi.

²TOUPA Kha in kei honzang in a gen a, a thu ka lei ah a om hi.

³Israelte Pathian in a gen a, Israelte Suangpi’n ka kiang ah a gen hi. Mi tung a vaihawmmi a dik ngeingei dia Pathian lau kawm a vai a hawm ding ahi.

⁴Amah ni a hongsuah a, mei om hetlou zingsang vak bang ahi dia, vuahzuk khit a khua hong siang a lei a loupa selnou mitmet bang ahi ding ahi.

⁵Pathian adin ka inkuan hiai bang hi kei mahleh, kei toh tangtawn thukhun a bawl a, bangkim kizentak in a hihkip hi. Aman khangsak kei mahleh hiai ka hotdamna leh ka deihlam tengteng ahi.

⁶Himahleh Belial tate bel avek a ling paihkhiat bang ahi ding uh, khut a lak theihlouh a hih ziak un.

⁷Himahleh amau khoih ding mi sik leh teipi a, a kivat ding ahi. Huchi in amun mah ah hal ahi ding uh.

⁸Hiaite David sepaih hangsante min ahi. Tekmon mi Joseph Bashebeth sepaih heutute lak a heutupa ahi a; amah khatvei thu a mi za giat thatpa Eznit mi Adino a chih mah uh ahi.

⁹Amah zom in Ahohi tapa Dodo tapa Eleazar ahi. Amah Philistia mite kidou dia a kikaihkhawm ua, a tou ua, Israel mite a paimang vek lai ua David kiang a sepaih hangsan thumte lak a khat ahi.

¹⁰Amah a thou a, Philistia mite a khut a kham matan namsau leng khahlou khop in a that hi. Huai nin TOUPA’N nakpitak in a zouta a, mite a ma nung ah gallak thil la ding lel in a hong kiknawn uhi.

¹¹Amah nung in Har mi Agi tapa Shammah ahi. Behiang tampi omna lou a Philistia mite a kikaihkhawm lai un, Israel mite a taikek uhi.

¹²Himahleh amah huai mun ah ading a, a veng a, Philistia mite a that a, TOUPA’N nakpitak in a zohsak hi.

¹³Sepaih hangsan sawmthum lak a thumte a hohsuk ua, buhlak lai tak in David kiang ah Adullam kawhawm ah a hoh ua; Philistia sepaihte’n Rephaim guam ah panmun a khoh uh.

¹⁴Huchih lai in David inn sung ah a om a, huchih laimah in Philistia sepaihte Bethlehem ah a om uhi.

¹⁵David in tui a lunggulh mahmah a, “Bethlehem a tuileh tui, kulh kongkhak kiang a dawn ding hongpia om le uh aw!” a chi hi.

¹⁶Huchi in sepaih hangsan thumte’n Philistia sepaihte a paltan ua, kulh kongkhak kiang a Bethlehem tuileh a vatawi ua, a hontawi ua, David kiang ah a paipih uh. Himahleh aman a na dawn ngamkei a, TOUPA adin a bung khe zawta hi.

¹⁷“Aw TOUPA, hiai ka hihlouh ding dan; sihngap a kuante sisan ka dawn dia hia?” a chi hi. Huchi in a dawn nuam kei hi. Huai thilte sepaih hangsan thumte’n a hih uhi.

¹⁸Zeruiah tapa Joab unau Abisai thumte lak a a heutupen uh ahi. Teipi in mi za thum a sual a, a that a, thumte lak ah minhoih a loh hi.

¹⁹Thumte lak ah pahtawi tuak pen ahi kei maw? Huaiziak in, a heutu ding un a bawl uhi. Himahleh tungnungpen thumte lak a tung zou kei hi.

²⁰Kabjil mi hangsan tapa Jehoiada tapa Benaiah thil thupitak hihpa in Moab mi Ariel tapate nih a that a; huchi in a hohsuk a, vukkiak hun lai in leikawhawm ah humpinelkai leng a vathat hi.

²¹Aigupta mi, milian tak a that a; huai Aigupta mi in teipi a tawi hi. Himahleh aman chiang tawi in a vazuan a, Aigupta mi teipi tawi a va sut a, amah teipi in a sunlumta hi.

²²Jehoiada tapa Benaiah in huchibang thil a hih ziak in sepaih hangsan thumte lak ah min hoih a loh hi.

²³Mi sawmthumte sang in pahtawi tuak ahi. Himahleh tungnungpen thumte lak a sim tel ahi zoukei hi. David in amah vengtu heutu in a koih hi.

²⁴Joab unau Asahel bel sawmthum lak a khat ahi: Bethlehem khua a mi Dodo tapa Elhanan;

²⁵Harod mi Shammah, Harod mi Elika;

²⁶Pal mi Helez, Tekoa mi Ikkes tapa Ira:

²⁷Anethot mi Abiezer, Hushathmi Mebunnai:

²⁸Ahohmi Zalmon, Netophath mi Maharai:

²⁹Netophath mi Baanah tapa Heleb, Benjamin suan, Gebeah a mi Ribai tapa Ittai;

³⁰Pirathon mi Benaiah, Gaash luite a mi Hidai;

³¹Arbath mi Abialbon, Barhum mi Azmaveth;

³²Shaalbon mi Eliaba, Jashen tapate lak a Jonathan;

³³Harar mi Shammah, Arar mi Sharar tapa Ahiam;

³⁴Mankat mi Ahasbai tapa Eliphelet, Gilon mi Ahitophel tapa Eliam;

³⁵Karmel mi, Hezrai, Arba mi Paarai;

³⁶Zobah mi Nathan tapa Igal, Gad mi Bani;

³⁷Ammon mi Jelek, Beeroth mi Nahari, Zeruiah tapa Joab galvan tawi;

³⁸Ith mi Iraan, It mi Gareb;

³⁹Hit mi Uriah ahi uh. Avek un sawmthum leh sagih ahi uh.