Read Paite Chin 2 SAMUEL 24 Bible Online

2 SAMUEL 24 - Paite Chin bible

2 SAMUEL 24

¹Huan, TOUPA hehna Israelte tung ah a hongtung nawn hi. Amau kalh a David tokthou in, “Kuan inla, Israel mite leh Judah mite simvek in” a chi hi.

²Kumpipa’n a kiang a om sepaih heutu Joab kiang ah, “Israel nam tengteng lak ah Dan apan Beer — sheba pha in vialvak inla, mi bangzah ahi ua ka theihtheihna din simvek in” a chi hi.

³Joab in kumpipa kiang ah, “TOUPA na Pathian in mite pungsak in bangzah a tam, a mun za leng, toupa ka pu in muta ve, himahleh toupa ka kumpipa’n bangdia huai thei ut se ahia?” a chi hi.

⁴Himahleh kumpipa thu in Joab leh sepaih heutute thu a zouta hi. Huchi in Joab leh sepaih heutute Israel mite sim din kumpipa kiang apan a paikheta uhi.

⁵Jordan gal a va kah ua, Gad guam laitak taklam a khaw om Aroer ah Jazer pha in om mun a khoh uhi.

⁶Gilead gam leh Tahtim hodshi gam a tung ua; Danjaan, leh Zidon kimvel a tung uhi.

⁷Tura kulh leh, Hivmite khaw tengteng leh, Kanan mite khaw tengteng a va tung ua; Beer — sheba a, Judah simlam ah a paikhia uhi.

⁸Huchi in gam tengteng a totsuah khit un kha kua leh ni sawmnih a bei in Jerusalem a hong tungkik uhi.

⁹Joab in mihing zah kumpipa a pia a; Israel gam ah namsau tawi mi hangsan nuai giat a om uhi. Judah mi bel nuai nga a om hi.

¹⁰Mihing a sim khit un David lungtang a nuam hetkei. David in TOUPA kiang ah, “Ka thilhih ah nakpitak in ka na khialta hi. Himahleh tuin aw TOUPA, na sikha thulimlouhna koihmang din ka hon ngen hi. Haihuai mahmah in ka na hihta” a chi hi.

¹¹Zingsang a David a thoh leh David zawlnei Gad kiang ah TOUPA thu a na tung hi.

¹²“Kuan inla, David kiang ah, TOUPA’N hichi in a chi. ‘Thil thum k’on tah a, na tung a ka hih ding in khat tel in’ ” a chi, chi in.

¹³Huchi in David kiang ah Gad a hoh a, a hilh a, a kiang ah, “Na gam a na tung a kum sagih sung kial a kiak hia? Na melmate’n a hondelh ua kha thum sung amau apan na taimang hia, Na gam a ni thum sung hipi a hong len? Hon sawlpa bangchi’n ka dawng dia? Kingaihtuah inla, honhilh in” a chi hi.

¹⁴David in Gad kiang ah, “Ka lung a zing mahmah mai hi. TOUPA khut sung ah hon puklut sak in; a chitna lah a thupi mahmah ngal a. Mihing khut sung ah zaw hon puklut sakken” a chi hi.

¹⁵Huchi in TOUPA’N Israel mite tung ah zingsang apan hunseh tan hipi a lengsak hi. Huchi in Dan apan Beer — sheba tan mi sing sagih a sita uh.

¹⁶Angel in hihse dia Jerusalem lam a, a khut a lik leh TOUPA’N thil hoihlou hih a tup a lunghei thaka, mite hihmangpa angel kiang ah, “A hunta; na khutlik nawnken” a chi hi. TOUPA angel bel Jebus mi Araunah phual chin ah a om hi.

¹⁷David in mi that angel a muh in TOUPA a houpih a, “Ngai in, ka na khialta hi, dikloutakin thil ka na hihta hi. Himahleh hiai belamte’n bang a hih ua? Na khut in kei leh ka pa inkawte honkhoih zaw hen” a chi hi.

¹⁸Huai nin David kiang ah Gad a hoh a, a kiang ah, “Kuantou inla, Jebus mi Araunah phual ah TOUPA adin maitam va doh in” a chi hi.

¹⁹Huchi in David, TOUPA thupiak bang a Gad in a hilh bang in a kuan touta hi.

²⁰Araunah in a malam a et leh, amah lamzuan a kumpipa leh a sikhate hongpai a mu hi. Huchi in Araunah a pawt a, a mai a leisi in kumpipa ma ah a khupboh hi.

²¹Araunah in, “Bang a chia ahia toupa ka kumpipa, a sikha kiang a a hong?” a chi hi. David in, “Mipite lak a hipi a khawl theihna dia TOUPA adia maitam doh dia na phual lei din ahi ka hongpai” a chi hi.

²²Araunah in David kiang ah, “toupa ka kumpipa’n hoih a sak bang in la henla, lan hen: En in, haltum a lat din bawngtalte a om ua, sing din phual vanzatte leh bawngvante a om uh.

²³Aw toupa, hiai tengteng Araunah in kumpipa a pevek hi” a chi hi. Araunah in kumpipa kiang ah, “TOUPA na Pathian in hon dawng hen” a chi hi.

²⁴Kumpipa’n Araunah kiang ah, “Hilou e, a man pia in k’on lei teitei ding ahi. Kei lam a bangmah senna omlou in TOUPA ka Pathian kiang ah haltum thillatte ka lan kei ding” a chi hi. Huchi in David in phual leh bawngtalte dangka sekel sawmnga in a leita hi.

²⁵David in huai ah TOUPA adin maitam a doh a, haltum thillatte leh lemna thillatte a lan hi. Huchi in TOUPA a gam tung ah a lungkimta a, Israel gam apan hipi a khawlta hi.