Read Paite Chin 2 SAMUEL 3 Bible Online

2 SAMUEL 3 - Paite Chin bible

2 SAMUEL 3

¹Saul inkuante leh David inkuante sawtpi a kidou ua; David in hatlam a manoh a, Saul inkuante’n hatlouh lam a manoh uhi.

²David in Hebron ah tapate a nei a, a ta masapen, Ammon, Jezreel mi Ahinoam lak a ahi.

³A zom Kileab, Karmel mi Nabal zi Abigail lak a ahi. A thumna Absalom, Geshur kumpipa Talmai tanu Makah tapa ahi.

⁴A lina Adonijah, Haggith tapa ahi a; a ngana Shephatiah, Abital tapa.

⁵A gukna Ithream, David zi Eglah lak a ahi. Hiai teng David tapa Hebron a piangte ahi uh.

⁶Hichi ahi a, Saul inkuante leh David inkuante a kidou sung un Saul inkuante adin Abner a kihat sak semsem hi.

⁷Saul in mei a nei a, a min Rizpah ahi. Amah Aiah tanu ahi. Ishboshet in Abner kiang ah, “Bangdia ka pa mei luppih na hia?” a chi hi.

⁸Ishboshet thugen in Abner a heh sak mahmah hi. Judahte ui lutang leltak ka hi ahia? Tunitan in na pa Saul inkuante leh a unaute leh a lawmte tung ah chitna ka hihlang a, David khut ah k’on pe kei hi. Hinapi a nang hiai numei tung a khial a n’on ngoh mawk!

⁹Pathian in Abner a lohloh in loh henla, huai sang a se zaw in leng. David kiang a TOUPA a kichiam bang a, huchibang ngei a tung a ka hih kei leh.

¹⁰Saul inkuante lak apan a gam laksak ding, Israel leh Judahte tung a Dan apan a Beer — sheba tan a David mangtutphah tungding ding.

¹¹Huchi in aman Abner dawn himhim leng a dawng theikei, a lau mahmah ziak in.

¹²Abner in amah sik in David kiang ah mi a sawl a, “Hiai gam kua a ahia? Ka kiang ah thu khung in. Huchi in, ngai in, Israel mi tengteng na lam a pang din ka khut nang lam ah a pang ding” chi in a va gensak hi.

¹³Aman, “Hi hen. Na kiang ah thu ka khung ding. Himahleh na tung ah thil khat k’on phut hi. Huai hiai ahi. Hong mu dia na hongpai chiang in Saul tanu Mikal n’on pi phot kei leh ka mel na mu theikei ding,” a chi hi.

¹⁴David in Saul tapa Ishboshet kiang ah, “Philistia mite zekvun za khat a ka lei ka zi Mikal honpia in” chi din mi a sawl hi.

¹⁵Ishboshet in mi a sawl a, a pasal Laish tapa Paltiel mahmah apan a pita hi.

¹⁶A pasal in a zui a, kap kawm in a nung a zui zel a; Bahurim tan a zui hi. Abner in a kiang ah, Pai in, kiknawn in, a chi hi. Huchi in a kiknawnta hi.

¹⁷Abner in Israel upate a houpih a, “Tuma siah David na kumpipa ding un na zong uh.

¹⁸Tuin na kumpipa un bawl un. TOUPA’N David tung tang thu ah, Ka sikha David khut in ka mi Israelte Philistia mite khut apan leh a melma teng khut apan ka hunkhe ding a na chi” a chi hi.

¹⁹Abner in Benjamin mite bil a zak in a gen hi. Israel mite leh Benjamin inkuan tengteng in hoih a sak bangbang un Hebron a David bil a zak dia gen ding in Abner a hoh hi.

²⁰Abner leh a mite sawmnih Hebron a David kiang ah a pai uhi. David in Abner leh a kiang a mi sawmnihte adin Ankuang a lui hi.

²¹Abner in David kiang ah, “Ka thou dia, na kiang a thu a khun theihna ding un leh na deihthusam bangtak a vai na hawm theihna din Israel mi tengteng ka toupa kiang a kaikhawm ding in ka kuan ding” a chi hi. David in Abner a kuansak a, lungmuang tak in a kuanta hi.

²²Ngai in, David mite leh Joab galdou zou a hongtung ua, gallak tampi a honpua uh. Himahleh Abner bel Hebron a David kiang ah a na om nawn kei hi. A na paikik sak khinta a, amah leng lungmuang tak in a na paita hi.

²³Joab leh a kiang a mipi tengteng a hongtun un, Ner tapa Abner kumpipa kiang ah a hoh hi. Aman a na paisak nawn khin a, “Lungmuangtakin a pai nawnta” chi in Joab a hilh uhi.

²⁴Joab kumpipa kiang ah a hoh a, “Na thilhih bangchidan ahia oi? Ngai in, Abner na kiang ah a hong a, bangdia paimang sak a, a paimang vengveng mawk?

²⁵Ner tapa Abner na thei a, nang hon zekhem dia na pawt lam leh na lut lam leh na thilhih peuhmah theih tuma hongpai ahi,” a chi hi.

²⁶David kiang apan Joab a hongpawt khiak in Abner delh din mi a sawl hi. Sirah a tuileh apan a va pikik uh. Himahleh David in a theikei hi.

²⁷Abner Hebron a hongtun in Joab in sim houpih din kulh kongpi ah a pi tuam hi. A unau Asahel sisan pawt thukna din a nakguh ngana nuai tak a dawt a, huchi in a sita hi.

²⁸A nung a David in a zak in, “Ner tapa Abner sisan thu ah keimah leh ka gam TOUPA mitmuh in tangtawn in ka siang uh.

²⁹Joab lu tung ah kia henla, a pa inkawte tengteng tung ah toh. Joab inkawte lak ah meima sia vei hiam, phak natna nei hiam, chiangkhun ngai a pai hiam, namsau a si hiam, kial thuak hiam kitatlak lou in hongom hen” a chi hi.

³⁰Huchi in a unaupa uh Asahel Gibeon a kidouna a a thah ziak in Joab leh a unau Abisai in Abner a that uhi.

³¹David in Joab leh a kiang a mi om tengteng kiang ah, “Na puante uh botkek unla, saiip puan silh unla, Abner sun in a ma ah pai un” a chi hi. David in leng siluang a zui hi.

³²Abner Hebron ah a vui ua, kumpipa’n a aw a suak khesakin Abner han ah a kap a, mipi tengteng leng a kap uhi.

³³Kumpipa’n Abner a kah a: “Abner, mihai sih in a si dia hia?

³⁴Na khut hen ahi kei a, na khete leng sikkol butsak ahi sam kei. Migiloute ma a mi a puk bang a na puk maizen? a chi hi.” Mi tengteng in a kah nawn uhi.

³⁵Huchi in sun a hih lai in mi tengteng David an ne sak din a hongpai uh. Himahleh David in, “Nitum ma a an nek hiam, thil dang hiam leng ka nek leh Pathian in a lohloh honloh hen; huai sang a se zaw in leng” chi in, a kichiam hi.

³⁶Mi tengteng in huai a theih un a kipak mahmah uh. Kumpipa thilhih peuhmah in mite a kipaksak hi.

³⁷Mi tengteng leh Israel mi tengteng in huai ni’n Ner tapa Abner thah a hih kumpipa thu ahi kei chih a thei uhi.

³⁸Kumpipa’n mite kiang ah, “Tuni in Israel mi lian, mi thupitak a si, chih thei lou na hi umaw?

³⁹Kumpipa dia thaunilh himah leng, tuni in ka hat kei hi. Hiai Zeruiah tapate kei adin a thuak hak lua uh. TOUPA’N thil hoihlou hihmi a gitlouh dungzui zel in thuk hen” a chi hi.