Read Paite Chin 2 SAMUEL 4 Bible Online

2 SAMUEL 4 - Paite Chin bible

2 SAMUEL 4

¹Huan, Saul tapa Ishboshet in Hebron ah Abner a si chih a na zak in a khutte a honghat kei ua, Israel mi tengteng a patau uhi.

²Saul tapa Ishboshet in sepaih pawl heutu nih a nei hi. Khat min Baanah ahi a, a dang min Rekab ahi. Amau Benjamin suan Beeroth mi Rimmon tapate ahi uh. Beeroth bel Benjamin nam a sim tel a ngaih ahi.

³Beeroth khua a mite Gitaim ah a tai ua, tunitan in huai ah a teng uh.

⁴Saul tapa Jonathan in tapa khebai a nei hi. Jezreel apan Saul leh Jonathan tanchin a na theih in kum nga a upa ahi. Amah donnu in a pom a, a taimangpih hi. Hichi ahi a, taimang dia a kintatna lam in a kesak a, a khe a hong baita hi. A min Mephibosheth ahi.

⁵Beeroth mi Rimmon tapate Rekab leh Baanah a pai ua, Ishboshet inn ah sun nisat laitak a lupna a a luplai in a kiang ah a hoh uhi.

⁶Huit buh la ding hileh kilawm in inn sung lam ah a lut ua, a nakguh ngana nuai tak ah a dawt ua, huchi in Rekab leh a unaupa Baanah a taimang uhi.

⁷Inn a valut un a lupna dantan a lupna a lum a vadawt ua, a that ua, a lu a tan ua, a lu a la uh. Arabah kantan in zankhua in a paimang uhi.

⁸Ishboshet lu Hebron ah David kiang ah a honpua ua, kumpipa kiang ah, “Ngai in, nang honthah tum, na melma Saul tapa Ishboshet lu hiai ah a om; TOUPA’N ka toupa phu Saul leh a suante tung ah tuni’n a laksakta” a chi uhi.

⁹David in Beeroth mi Rimmon tapa Rekab leh a unaupa Baanah a dawng a, a kiang uah, “TOUPA ka mangbatna tengteng a hontanpa hinna lou in ka gen ahi.

¹⁰Tanchinhoih hontun a kisep in, ‘Ngai in, Saul a sita, chi a mi khat in a hon hilh lai in, amah ka man a, Jiklag ah ka that hi’. Huai a tanchinhoih a hon puakman a ka na piak ahi.

¹¹Mi diktat, amah inn sung a a ma lupna tungngei a lum, migilou in a thah uh sisan man na tung uah ka honphut nawnsem dia, leitung apan a lamang kei dia hia?” a chi hi.

¹²Huchi in David in a tangvalte thu a pia a, amaute a that uh. A khutte uleh a khete uh a tansak ua, Hebron a dil tung ah a khai uhi. Ishboshet lu bel a la ua, Hebron a Abner han ah a vui uhi.