Read Paite Chin 2 SAMUEL 5 Bible Online

2 SAMUEL 5 - Paite Chin bible

2 SAMUEL 5

¹Huchi in, Israel chi tengteng Hebron a David kiang ah a hongpai ua, “Ngai in, na guh leh na sa ka hi uh.

²Hun paisa in leng Saul ka tung ua kumpipa ahihlai a leng Israelte pikhia leh pilutpa na hi. TOUPA’N na kiang ah, Ka mi Israelte na vak dia, Israelte tung ah heutu in na om ding, a chi” a chi uhi.

³Israel upa tengteng Hebron ah kumpipa kiang ah a hoh uh. Kumpipa David in Hebron ah TOUPA ma ah amau toh thu a khung hi. Huchi in Israelte tung a kumpipa din David thau a nilh uhi.

⁴Vai a hawm pattung in David kum sawmthum a upa ahi a, kum sawmli sung vai a hawm hi.

⁵Hebron ah Judahte tung ah kum sagih leh kha guk vai a hawm a; Jerusalem ah Israelte leh Judah tengteng tung ah kum sawmthum leh thum vai a hawm hi.

⁶Kumpipa leh a mite huai gam a teng Jebus mite sim din Jerusalem ah a hoh uhi. Huai mite’n David a honglut theihlouh gingta in, David kiang ah, “Hiai ah na honglut hetkei ding. Mittaw leh khebaite’n a hon na dal ding uh” a chi uhi.

⁷Himahleh David in Zion kulh a lazou a, huai David khua ahi.

⁸David in huai nin, “Jebus mi sual peuhmahte tuiluanna ah paitou uhenla, David mudah khebai leh mittawte that uheh” a chi hi. Huaiziak in ahi, “Mittaw leh khebaite inn ah a honglut kei ding uh,” a chih uh.

⁹Huchi in David kulh ah a teng a, David khua a chi uhi. David in Millo apan a kimvel leh a sunglam ah kulh a bawl hi.

¹⁰David in TOUPA, sepaihte Pathian a kiang a a om ziak in thupi lam a manoh zel hi.

¹¹Tura kumpipa Hiram in David kiang ah mi a sawl a, sidar singte a khak a, khutsiamte leh suangseksiamte a sawl a, David adin inn a lamsak uhi.

¹²David in TOUPA’N amah Israel mite tung a kumpipa din a kipsak a, a mi Israelte ziak in a lalgam a tawisang chih a thei hi.

¹³David in Hebron a pawtsan nung in Jerusalem apan mei leh zi a nei behlap hi. Huchi in David in tapate leh tanute a neinawn lai hi.

¹⁴Jerusalem a neihte min hiaite ahi: Shammua, Shobab, Nathan leh Solomon,

¹⁵Ibhar, Elishua, Nepheg leh Japhia,

¹⁶Elishama, Eliada leh Eliphalet.

¹⁷Himahleh Philistia mite’n David Israel mite kumpipa din thau a nilh uh chih a zak un Philistia mi tengteng David zong din a hohtou uh. David in a naza a, kulh sung ah a paisuk hi.

¹⁸Philistia mite Rephaim guam ah a kiphalh uhi.

¹⁹David in, “Philistia mite sual din ka hohtou diam? Amaute ka khut ah n’on pe diam?” chi’n TOUPA a dong hi. TOUPA’N David kiang ah, “Hoh tou in. Philistia mite na khut ah k’on pe ngeingei ding” a chi hi.

²⁰Huchi in David Baal-perazim ah a hoh a, huai ah David in amaute a sual a, “TOUPA’N ka melmate tuichin khah bang mai in ka ma ah a hon hihdalh sakta” a chi hi. Huaiziak in huai mun min “Baal-perazim” a sa hi.

²¹Huai ah a milim pathiante uh a nusia ua, David leh a mite’n a hal uhi.

²²Philistia mite a paitou nawn ua, Rephaim guam ah a kiphalh uhi.

²³David in TOUPA a dot leh Aman, “Hoh tou ken. A nunglam uah khelh inla, singtheimi kung zawn ah sual in.

²⁴Hichi ahi ding, singtheimi lek a pai husa na zak leh gamtang in. Philistia sepaihte sual din na ma ah TOUPA a kuankheta chihna ahi” a chi hi.

²⁵Huchi in TOUPA’N thu a piak bang in David in a hih a; Philistia mite Geba apan Gazer tan in a sual hi.