Read Paite Chin 2 SAMUEL 7 Bible Online

2 SAMUEL 7 - Paite Chin bible

2 SAMUEL 7

¹Huan, hichi ahi a, kumpipa a inn a om a, TOUPA’N a kimvel a melmate tengteng apan galmuanga a omsak nung in;

²Kumpipa’n zawlnei Nathan kiang ah, “Tuin en in kei sidar sing inn ah ka teng a, himahleh Pathian bawm puanin ah a om” a chi hi.

³Nathan in kumpipa kiang ah, “Na lungsim a om bangtak in va hih in, TOUPA na kiang ah a om hi” a chi hi.

⁴Hichi ahi a, huai zan mah in TOUPA thu Nathan kiang ah a hongtung hi.

⁵“Ka sikha David vahilh in, TOUPA’N hichi in a chi: Ka tenna ding inn n’on lamsak ding maw?’

⁶Israel suante Aigupta gam apan ka pikhiak apan tunitan in inn ah ka tengkei a, puanin ah leh biakbuk ah ka teng zaw hi.

⁷Israel suante lak a ka paina tengteng ah leng, ka mi Israel vak dia thu ka piak vaihawmmite kiang ah, “Bangdia sidar sing a inn hon lamsak lou?” chi in ka gen ngei ahia?

⁸Huaiziak in, ka sikha David kiang ah, Sepaihte TOUPA’N hichi in a chi: Belam tatna mun apan belam na ven lai in ka mi Israel mite tung a heutu din k’on la hi.

⁹Na hohna peuh ah na kiang ah ka om zel a, na ma ah na melmate ka hihmang zel hi. Lei a mi thupitakte bang in min thupitak k’on bawlsak hi.

¹⁰Hiai ban ah ka mi Israelte adin mun ka sep dia, amau ka suan ding a, amau mun mah ah a teng ding ua, tuma lam bang in gitlouhna tate’n a hih genthei nawn kei ding uh.

¹¹Na melmate tengteng lak apan k’on khawlsak hi. Huailou him in TOUPA’N inn k’on bawlsak ding, chi in a honhilh hi.

¹²Na ni a bei a na pute kiang a na lup chiang in, nanung a na suan, na gil a gah ding ka tungding dia, a gam ka hihkip ding.

¹³Aman ka min adin inn a lam dia, a gam mangtutphah tangtawn adin ka hihkip ding.

¹⁴A pa ka hi ding a, amah ka tapa ahi ding. Thil a hihkhelh leh, mihing chiang leh mihing tate khetna in ka thunun ding.

¹⁵Himahleh, na ma a ka suanmang Saul kiang apan ka lakmang bang in ka chitna in a hon paisan kei ding hi.

¹⁶Na inkuan leh na gam tangtawn a hihkip ngiungeu ahi dia, na mangtutphah lah tangtawn a hihkip ahi ding, chi’n TOUPA thu a hongtung hi.

¹⁷Huai thute tengteng bangzel leh huai kilak na banggeih in Nathan in David kiang ah a gen hi.

¹⁸Huchi in kumpipa David a lut a, TOUPA ma ah a tu hi. “TOUPA Pathian aw, kua ahia ka hih a, ka inkuante bang ahia a hih uh, hiai tantan n’on pi?

¹⁹TOUPA Pathian aw, huaite leng nang mitmuh in thil bangmah tham ahi kei uh. Himahleh na sikha inkuan omdan ding thu kum tampi sung a din leng na gen khinta hi. TOUPA Pathian aw, hiaite mihing hihdan ahi ahia?

²⁰David in na kiang ah bang a gennawn tuan ding a? TOUPA Pathian aw, na sikha lah na thei vek ngal a.

²¹Na sikha theih din na thu ziak leh nangmah lungtang bangzel in hiai thil thupi tengteng na hihta hi.

²²Huaiziak in, TOUPA Pathian aw, nang na thupi hi. Ka bil ua ka zak bang un nang bang kuamah a omkei a, nangmah loungal Pathian a omkei hi.

²³Aigupta gam apan leh namte leh a pathiante ua apan tankhia a, min bawlsak ding leh na gam adia na mite ma a thil thupitak leh thil lauhuai tak hih ding na mi Israelte bang khovel ah namdang kua a om a?

²⁴Huchi in Israel mite tangtawn a na mite a hong hihtheihna ding un nang adin na hihkipta hi. TOUPA, nang a Pathian uh na hong hita hi.

²⁵Huchi in TOUPA Pathian aw, na sikha tungtang thu leh a inkuante tungtang thu na gen tangtawn adin hihkip inla, na gensa bang in hih in.

²⁶Sepaihte TOUPA Israelte Pathian ahi, chi in na min tangtawn in pahtawi in om hen. Huchi in na sikha David inkuante na ma ah hihkip in a om ding uhi.

²⁷Sepaihte TOUPA aw, Israel Pathian, na sikha kiang ah, inkuan k’on phuhsak ding, chi in lah na phuangta ngal a. Huaiziak in na sikha in hiai thumna na kiang k’on tun ngam hi.

²⁸Tuin TOUPA Pathian aw, nang huai Pathian na hi a, na thudik hen, hiai thil hoih na sikha kiang ah na chiamta hi.

²⁹Huaiziak in, tuin na sikha inkuante na ma a tangtawn a a om gige theihna ding un vualzawl in. TOUPA Pathian aw, nang lah na genta ngal a. Na vualzawlna in na sikha inkuante tangtawn in vualzawl in om uhen” a chi hi.