Read Paite Chin 2 SAMUEL 8 Bible Online

2 SAMUEL 8 - Paite Chin bible

2 SAMUEL 8

¹Huan, huai nung in hichi ahi a, David in Philistia mite a sual a, a zou hi. Huchi in David in Philistia mite khut apan Metheg ammah a lak khiatsak hi.

²Moab mite a sual a, lei ah a lumsak a, khau in a teh a; vual nih a that a, vual khat bel a hinghawi hi. Huchi in Moab mite David sikhate a hong hita ua, thilpiakte a hontawi uhi.

³David in Euphrates lui a, gam la nawn dia hoh in Zobah kumpipa Rehob tapa Hadadezer leng a that hi.

⁴Huchi in David in a sakol tungtuangmi sang khat leh za sagih leh lei sepaih sing nih a matsak hi. Huchi in kangtalai kai ding za khat chihlouh sakol tengteng a tha uh a sattan sak hi.

⁵Damaska a Suria mite Zobah kumpipa Hadadezer huh dia kuante David in Suria mite lak a mi sing nih leh sang nih a that hi.

⁶Huchi in David in Suria gam a Damaska ah sepaih a koih hi. Suria mite David sikhate a hong hita ua, siah a liau uhi. TOUPA’N a hohna peuh ah David a vualzou sakzel hi.

⁷David in Hadadezer pawlte dangkaeng lumte a laksak a, Jerusalem ah a paipih hi.

⁸Hadadezer khopite Betah leh Berothai apan David in dal tampi a la hi.

⁹Hamath kumpipa Toi in Hadadezer sepaih tengteng David in a zou chih a zak in,

¹⁰Hadadezer a sual a, a zou chih a zak in chibai buk ding leh vualzawl din Toi in a tapa Joram David kiang ah a sawl a; David in lah Hadadezer dou in a na that khinta hi. Huchi in Joram in dangka belte, dangkaeng belte leh dal belte a hontawi hi.

¹¹Huaite leh namdang a zoh tengteng apan a lak dangka leh dangkaeng kumpipa David in TOUPA kiang ah a lan hi:

¹²Suriate, Moabte, Ammon suante, Philistiate, Amalekte leh Zobah kumpipa Rehob tapa Hadadezer a kipan a gallakte.

¹³David chiguam ah Suria mi sing khat leh sang giat a vathat a, a pailam in a minthang ta hi.

¹⁴Edom ah sepaih a koih a; Edom gam teng ah sepaih a koih hi. Huchi in Edom mi tengteng David sikha a hong hita uh. Huchi in TOUPA’N David a paina peuh ah a vualzou sak hi.

¹⁵Huchi in David in Israel mi tengteng tung ah vai a hawm a; David in a mitengteng tung ah diktattak in vai a hawm hi.

¹⁶Zeruiah tapa Joab sepaih heutu pen ahi. Ahilud tapa Jehosaphat bel tanchin gelhpa ahi.

¹⁷Ahitub tapa Zadok leh Abiathar tapa Ahimelek siampute ahi ua; Serai bel Laigelhmi ahi.

¹⁸Jehoiada tapa Benai Kereth mi leh Pelet mite heutu ahi ua, David tapate bel vaihawmtu liante ahi uh.