Read Paite Chin 2 SAMUEL 9 Bible Online

2 SAMUEL 9 - Paite Chin bible

2 SAMUEL 9

¹David in, “Jonathan ziak a hehpihna ka latsak theihna ding in Saul inkawte lak a mi a omlai a om hia?” a chi hi.

²Saul inkawte sikha khat a min Jiba a om hi. David kiang a hoh din a sam uhi. Kumpipa’n a kiang ah, “Jiba na hi hia?” a chi a; aman, “Na sikha amah ka hi” a chi hi.

³Kumpipa’n, “Pathian hehpihna ka latsak theihna di’n Saul inkawte lak a mi omlai omlou uhia? a chi hi. Jiba in kumpipa kiang ah, Jonathan in tapa khat a neilai a, khebai ahi, a chi hi.

⁴Kumpipa’n a kiang ah, “Kaw om ahia?” a chi hi. Jiba in kumpipa kiang ah, “Ngai in, Lodebar ah Amiel tapa Makir inn ah a om” a chi hi.

⁵Huchi in kumpipa David in mi a sawl a, Lodebar apan Ammiel tapa Makir inn apan mi a va pisak hi.

⁶Saul tapa Jonathan tapa Mephibosheth David kiang ah a honghi. A mai a leisi in zahtakna a pia hi. David in, “Mephibosheth,” a chi a; aman, “En in, na sikha” chi’n, a dawng hi.

⁷David in a kiang ah, “Lau ken. Na pa Jonathan ziak in hehpihna k’on musak ngeingei ding. Na pu Saul gam tengteng k’on penawn dia, ka dohkan ah an na ne gige ding” a chi hi.

⁸Huchi in a kun a, “Ui sisa banglel n’on limsak, kei na sikha bang ka hia?” a chi hi.

⁹Kumpipa’n Saul sikha Jiba a sam a, a kiang ah, “Saul thil neih tengteng leh a inkawte thil tengteng na pu tapa ka pevek hi.

¹⁰Amah adin lei na lehsak dia, nang leh na tapate leh na sikhate teng in na pu tapa in nekding a neihtheihna di’n na sepkhiakte na honla ding. Na pu tapa Mephibosheth in bel ka dohkan ah an a um gige ding” a chi hi. Jiba in tapa sawmlehnga leh sikha sawmnih a nei hi.

¹¹Huchi in Jiba in kumpipa kiang ah, Kumpipa ka toupa’n a sikha thu a piak bangzel in na sikha in a hih ding, a chi hi. Kumpipa’n, “Mephibosheth in ka dohkan ah kumpipa tapa bang in an a um ding” a chi hi.

¹²Mephibosheth in tapa naupang a nei a, a min Mik ahi. Jiba inn a om tengteng Mephibosheth sikhate ahi uh.

¹³Huchi in Mephibosheth Jerusalem ah a tengta hi. Kumpipa dohkana an a um gige ziak in; a khe langtuak bai ahi.