Read Paite Chin 1 KUMPIPATE 1 Bible Online

1 KUMPIPATE 1 - Paite Chin bible

1 KUMPIPATE 1

¹David hong upata in, a hongtek mahmahta hi. Huchi in puan in a khuh zel ua, himahleh lum a sathei tuankei hi.

²A sikhate’n a kiang ah, “Ka toupa kumpipa adin nungak zong le ungla; Kumpipa kiang chin ah om gige henla, kem leh; na angsung ah honglum leh, ka toupa Kumpipa’n lum a honsa thei ding” a chi uhi.

³Huchi in Israel gam tengteng ah nungak melhoih a zong ua, Shunam mi Abishag a va mu ua, Kumpipa kiang ah a pi uhi.

⁴Huai nungak a mel a hoih mahmah a, Kumpipa a kem a, a nektak a bawlsak hi. Himahleh, Kumpipa’n amah a kithuahpih kei hi.

⁵Haggith tapa Adonijah in, “Kei Kumpipa a pang ding kei ve” chi in a kingai thupi mahmah hi. Kangtalai leh sakol tungtuang mi sawmnga a ma a tai dingte toh a kisa sak hi.

⁶Apan lah chiklai in leng, “Bangdia hichibang a hih na hia?” chi in a lungkham sak ngeikei hi. Amah melhoih mahmah a, Absalom sang ahi.

⁷Aman Zeruiah tapa Joab leh siampu Abiathar thu a dong a; amau Adonijah lam ah a pang ua, amah a panpih uhi.

⁸Siampu Zadok, Jehoiada tapa Benaiah, zawlnei Nathan, Shimei, Rei leh David pawl a mihangsante bel Adonijah lam ah a pangkei uhi.

⁹Adonijah in belamte, bawngtalte, ganvak thaute Zoheleth suang ah a gou a, huai bel En-rogel kiang chin a om ahi. Kumpipa tapate, a unau tengteng leh Judah gam a Kumpipa sikha tengteng a chial hi.

¹⁰Zawlnei Nathan, Benaiah, mi hangsante leh a unaupa Solomon bel a chial kei hi.

¹¹Nathan in Solomon nu Bathsheba kiang ah, “Haggith tapa Adonijah, i toupa David theihlouh in vaihawm in a om chih zalou na hi maw?

¹²Na bitna ding leh na tapa Solomon bitna ding k’on hilh ding.

¹³Kumpipa David kiang ah valut inla, a kiang ah, Aw toupa, ka kumpipa, na sikhanu kiang ah na tapa Solomon, ka nung in a honglal ngeingei dia, amah ka mangtutphah ah a tu ding, chi in na kichiam ahi kei maw? Bang achia Adonijah in vaihawm ahia?” vachi dih a chi hi.

¹⁴“Ngai in, Kumpipa na va houpih laitak in ken leng k’on zui lut sam dia, na thugen k’on hihkippih ding” chi in a gen hi.

¹⁵Bathsheba Kumpipa kiang ah indan ah a valut a; Kumpipa a upa mahmahta a, Shunam mi Abishag in Kumpipa nektak a na bawl hi.

¹⁶Bathsheba in Kumpipa kun in zahtakna a pia hi. Kumpipa’n, “Bang na deih a?” a na chi hi.

¹⁷Aman, “Ka toupa aw, TOUPA na Pathian minlou in na sikhanu kiang ah, na tapa Solomon ka nung in a hong lal ngeingei ding, amah ka mangtutphah ah a hongtu ding, chi in na kichiam khinta hi.

¹⁸Ngai in, tuin Adonijah lah a lal a; nang ka kumpipa toupa’n lah na theikei hi.

¹⁹Bawngtalte, ganvak thaute leh belamte a gou liapluap a, kumpipa tapa tengteng leh, siampu Abiathar leh sepaih heutu Joab a chial a, na sikha Solomon a chial kei hi.

²⁰Huchi in, toupa aw, ka toupa nung a a mangtutphah a kua hong tu ding ahia chih na gen ding in, Israelte tengteng mit nang ka toupa kumpipa tung ah a tu hi.

²¹Huchilou in zaw hichi ahi ding a, toupa kumpipa a pute kiang a a ihmut sam hun chiang in, kei leh ka tapa Solomon thil hihkhial in a hon sepmai ding uh: a chi hi.

²²Ngai in, huchi a kumpipa a houpih laitak in, zawlnei Nathan a valut sam hi.

²³“En dih, zawlnei Nathan a hong,” chi in kumpipa a hilh uh. Kumpipa kiang a vatun in, kumpipa ma ah a mai a leisi in a khupboh hi.

²⁴Nathan in, “Ka toupa, kumpipa aw, ka nung ah Adonijah a lal dia, ka mangtutphah ah a tu ding na chi maw?

²⁵Tuni in a kuansuk a, bawngtalte, ganvak thaute leh belamte a gou zengzung a, kumpipa tapa tengteng, sepaih heutute leh siampu Abiathar a chial hi. Ngai in, a ne un a dawnkhawm ua, Pathian in kumpipa Adonijah hondam hen, a chi uh.

²⁶Himahleh kei na sikha ngei leh siampu Zadok, Jehoiada tapa Benaiah leh na sikha Solomon a hon chial kei hi.

²⁷Hiai toupa ka kumpipa thu a hih a hih ngal leh toupa ka kumpipa’n a nung a mangtutphah a tu dingpa a kuapen ahia chih na sikhate na hilh nailou na hi ding maw?” a chi hi.

²⁸Kumpipa David in a dawng a, Bathsheba hon sapsak dih ua, a chi hi. Kumpipa kiang ah a vahoh a, kumpipa ma ah a va ding hi.

²⁹Kumpipa a kichiam a, lungzinna tengteng a ka hinna humbitpa TOUPA hinna lou in,

³⁰Na kiang a TOUPA Israelte Pathian minlou a, na tapa Solomon ka nung in a honglal ngeingei ding. Ka sik in ka mangtutphah ah a hong tu ding, chi a ka kichiam bang in, tuni in ka hih ding” a chi hi.

³¹Bathsheba a mai a leisi in a khupboh a, kumpipa zahtakna pia in, “Ka toupa, kumpipa David tangtawn in damzel hen” a chi hi.

³²Kumpipa David in, “siampu Zadok leh zawlnei Nathan, Jehoiada tapa Benaiah hon va sapsak dih ua” a chi hi. Amau kumpipa ma ah a vapai uhi.

³³Kumpipa’n a kiang uah, “Na toupa uh sikhate pi unla, ka tapa Solomon keimah sabiltung mahmah ah tuangsak unla, Gihon ah pisuk un.

³⁴Siampu Zadok leh zawlnei Nathan in Israelte kumpipa din thaunilh uhen. Pengkul mut unla, Pathian in kumpipa Solomon hondam hen, chi un.

³⁵Huchi in amah na zuitou ding ua, ka mangtutphah ah a hong tu ding hi. Amah lah ka sik a lal ding ahi ngal a. Amah Israel gam leh Judah gam vaihawmtu dia ka seh ahi” a chi hi.

³⁶Jehoiada tapa Benaiah in kumpipa a dawng a, “Amen, TOUPA, ka toupa kumpipa Pathian in leng phasa hen.

³⁷TOUPA ka toupa kumpipa kiang a a om bang in, Solomon kiang ah leng omsam henla, ka toupa kumpipa David mangtutphah sang in a mangtutphah hih thupizaw hen” a chi hi.

³⁸Huchi in, siampu Zadok, zawlnei Nathan, Jehoiada tapa Benaiah, Kereth mite leh Pelet mite a hohsuk ua, Solomon David sabiltung tung ah a tuangsak ua, Gihon ah a pi uhi.

³⁹Siampu Zadok in puanin apan thau koihna a la a, Solomon a nilh hi. Pengkul a mut ua, huchi in mi tengteng in, “Pathian in kumpipa Solomon hondam hen” a chi uhi.

⁴⁰Mi tengteng in amah a zuitou ua, mite’n tamngaite a tum ua, a kipak mahmah ua, a husa ging un lei a kheng hi.

⁴¹Adonijah leh a michial, a kiang a om tengteng in Ankuang a lui khit un a za ua, Joab in pengkul mutging a zak in, “Khopi sung a husa ging zuazua bangchidan ahia leh?” a chi hi.

⁴²Huai a chih laitak in, ngai in, siampu Abiathar tapa Jonathan a va hoh a, Adonijah in, “Hongpai dihve, nang zaw mi kizen na hi a, tanchinhoih na hontun mahmah ding” a na chi hi.

⁴³Jonathan in a dawng a, Adonijah kiang ah, “Tun keng e, toupa aw, kumpipa David in Solomon kumpipa in a bawlkhinta hi.

⁴⁴Amah toh siampu Zadok, zawlnei Nathan, Jehoiada tapa Benaiah, Kereth mite leh Pelet mite kumpipa’n a sawl a, kumpipa sabiltung tung ah a tuangsak uhi.

⁴⁵Siampu Zadok leh zawlnei Nathan in Gihon ah kumpipa din thau a nilh uh. Huai apan nuamsatak in a paitou ua, huai in khopi sung a thawn zuazua hi. Husa na zak uh huai ahi” a chi hi.

⁴⁶Huchi in Solomon leng lalgam tutphah ah a tuta hi.

⁴⁷Kumpipa sikhate i toupa kumpipa David vualzawl din a hong ua, “Pathian in na min sang in Solomon min hihhoih zaw henla, na mangtutphah sang in a ma mangtutphah hih thupizaw hen” a hong chi uh. Huchi in kumpipa lupna tung ah a kun hi.

⁴⁸Kumpipa’n leng, “TOUPA, Israelte Pathian, tuni mahmah a ka mangtutphah a tuding hon pepa phat in om hen. Ka mit mahmah in a muta,” a chi hi.

⁴⁹Adonijah mi chial tengteng in a lauta ua, a thou ua, a lampi chiat uah a paivekta uhi.

⁵⁰Adonijah in Solomon a lau a, a thou a, maitam ki a va len hi.

⁵¹“Ngai in, Adonijah in kumpipa Solomon a lau a; kumpipa Solomon in a sikha namsau a thatlou din ka kiang ah kichiam phot hen” chi in maitam ki a len hi chi’n Solomon a hilh uhi.

⁵²Solomon in, mi ginomtak a hih a suklat peuhmah leh a samzang khat leng lei ah a ke kei ding. Gitlouhna a nei chih theihna a om leh a si ding, a chi hi.

⁵³Huchi in kumpipa Solomon in mi a sawl a, maitam apan a va pisuk ua, a vahoh a, kumpipa Solomon ma ah a kun hi. Solomon inn a kiang ah, “Na in ah pai in” a na chi hi.