Read Paite Chin 1 KUMPIPATE 10 Bible Online

1 KUMPIPATE 10 - Paite Chin bible

1 KUMPIPATE 10

¹Huan, TOUPA min a a thilhih tungtang thu a Solomon minthan dan Sheba kumpinu’n a na zak in thu haksa pipi toh amah ettel tum in a kiang ah a honghoh hi.

²Jerusalem khua ah nungzuimi tampi toh, gimlimte leh dangkaeng tampi leh suangmantamte pua sangawngsaute tonpih in a hoh hi. Solomon kiang a tun in a lungtang a thu a pai tengteng suah khevek in a houpih hi.

³Solomon in a thudot tengteng a dawngvek a; kumpipa theihlouh, a hilhchet theihlouh himhim a omkei hi.

⁴Sheba kumpinu’n Solomon pildan tengteng, a inn lam,

⁵A dohkan a nekding, a sikhate tutdan, a nasemte nasep dan, a kivatdante uh, a nou pemite, TOUPA inn a lat haltum thillatte a muh in lungsim chih leng nei zouloukhop in lamdang a sa hi.

⁶Huchi in kumpipa kiang ah, na thilhihte leh na pildante ka gam a ka zak thuthang a dikmah a na hi.

⁷Himahleh keimah mit mahmah a kongmuh masiah a gen uh ka taksang kei hi. Huchi in ngai in, a kimkhat leng a hon na hilh sam ua, a gen uh ka zak sang in na pildan leh na hoih dan a na thupizaw hi.

⁸Na mite, hiai na sikha, na kiang a om gige na pilna thu ngaikhe gigete a hampha uhi!

⁹TOUPA na Pathian, na tung a kipak mahmah, Israelte mangtutphah a hon tusakpa phat in om hen. TOUPA’N Israelte tangtawn in a it a, huaiziak in, diktattak a vaihawm din kumpipa’n a honbawl hi, a chi hi.

¹⁰Huchi in dangkaeng talent za leh sawmnih leh gimlim a tam a tam leh suangmantamte kumpipa a pia a, Sheba kumpinu’n kumpipa Solomon gimlim a piak bang lawmlawm a tam a lut ngeita kei hi.

¹¹Hiram longhon, Ophir apan dangkaeng vapawte’n leng Ophir apan almug sing tampi leh suangmantamte a honpua uhi.

¹²Kumpipa’n almug singte TOUPA inn leh kumpipa inn umna ding in leh lasamite kaihging leh pekging bawlna din a zang hi. Tunitan in hichibang almug sing himhim a lut in, muh leng muh ahi nawnta kei hi.

¹³A nget louh Solomon in a piakte chihlouh leng kumpipa Solomon in Sheba kumpinu’n a deih tengteng, a nget peuhmah a pia hi. Huchi in amah leh lawite a omna gam ah a pai nawnta uhi

¹⁴Solomon kiang a kum khat sung a dangkaeng lut gikdan dangkaeng talent za guk leh sawmguk leh guk ahi.

¹⁵Hiaite lou leng sumsinmite leh thilzuakmite, Arab kumpipate leh gamsung vaihawmmite apan siahpiakte a neilai hi.

¹⁶Kumpipa Solomon in dangkaeng sekpek in lum lian za nih a bawl a; lum khat ah dangkaeng sekel za guk a lut hi.

¹⁷Dangkaeng sekpek in lum za thum a bawl a; lum khat ah dangkaeng mina thum a lut a; huaite kumpipa’n Lebanon gammang inn ah a koih hi.

¹⁸Kumpipa’n saiha mangtutphah thupi mahmah a bawl a, huai dangkaeng hoihpen tui in a luan hi.

¹⁹mangtutphah kaltouhna ah siksan guk a om a, mangtutphah nunglam dawn a bem hi. A tutna siktuak ah douna a om tuaktuak a; a douna zulte ah humpinelkai ding lim nih a om hi.

²⁰Siksan gukte siktuak ah humpinelkai ding sawmlehnih lim a om a; huchibang koi gam ah leng a bawl ngeikei uhi.

²¹Kumpipa nou tengteng dangkaeng ahivek a, Lebanon gammang inn a, a tuium-belsuan tengteng leng dangkaeng ngen mah ahivek uhi. Dangka himhim a omkei. Solomon damlai in huai bangpi in a simkei uhi.

²²Kumpipa’n tuipi ah Hiram longhon kithuahpih Tarsis longhon a nei a; Tarsis longhon in kum thum halzel in dangkaeng, dangka, saiha, zawng leh utong a hon paw zel uhi.

²³Huchi in kumpipa Solomon in khovel a kumpipa tengteng hauh lam leh pillam in a khupvek hi.

²⁴Pathian in a lungtang a pilna thu a koihsak ngaikhe din khovel a mi tengteng in Solomon a hongzuan huthut zel uh.

²⁵Michih in thilpiakte kum teng a piak zah nei in dangka tuium-belsuan, dangkaeng tuium-belsuan, puan, galvan, gimlim, sakol leh sabiltung noute a hong pe zel uh.

²⁶Solomon in kangtalaite leh sakol tungtuangmite a kaikhawm a, kangtalai sang khat leh za li leh sakol tungtuangmi sing khat leh sang nih a nei hi. Huaite kangtalai koihnate ah, Jerusalem khua a kumpipa omna ah a omsak hi.

²⁷Kumpipa’n Jerusalem khua ah a tam mahmah ziak in dangka chite suang bang mai a sehkhop in a omsak a, sidar singte phai a theipi sing banglel a sehkhop in a omsak hi.

²⁸Solomon neih sakolte Aigupta gam apan a hon tolhkhiak ahi a; kumpipa sumsinmite’n huaite a honhon in a na khakzel ua, a hon a leizel ahi.

²⁹Aigupta gam a kangtalai dangka chi sekel za guk zel in leh sakol dangka chi sekel za leh sawmnga zel in a hon pawlut uhi. Huchibang mah in Hitte kumpipa tengteng leh Suria kumpipate adin leng a pawkhia uhi.