Read Paite Chin 1 KUMPIPATE 11 Bible Online

1 KUMPIPATE 11 - Paite Chin bible

1 KUMPIPATE 11

¹Himahleh Solomon in Pharo tanu ban ah namdang numei tampi a it hi. Amau Moabte, Ammonte, Edomte, Zidonte leh Hitte ahi uhi.

²Huai namte tungtang thu TOUPA’N Israel suante kiang ah, “Amau toh na kitentuah hetlouh ding uh ahi. Na kitentuah uh leh a pathiante uh lam a na lungtang uh hon ngasak ngeingei ding uh ahi” chi a na hilhkhit tak namte ahi uh. Hinapi in Solomon in amau it in a len chinten hi.

³Huchi in zipi za sagih, kumpipa tanute a nei a, mei za thum a nei hi. Huai a zite’n amah a lam pialsakta uhi.

⁴Hichi a honghi a, Solomon a hong upat nung in, a zite’n pathian dangte lam ah a lungtang a pikawi sak uh. Huchi in a pa David lungtang bang in TOUPA a Pathian lam ah a lungtang a hoihkim takei hi.

⁵Solomon in Zidonte pathiannu Ashtaroth leh Ammonte pathian kihhuai mahmah Milkom a zuita hi.

⁶Huchi in Solomon in TOUPA mitmuh in thil gilou a hihta a, a pa David bang in TOUPA a zui tettet kei hi.

⁷Huchi in Solomon in Jerusalem chin a tang ah Moabte pathian kihhuai mahmah Khemosh ading leh, Ammon suante Pathian kihhuai mahmah Molech adin munsang a bawlta hi.

⁸Huai mah bang in namdang a zi tengteng a pathiante uh kiang a kithoih a gimlim halzelte ading leng a bawlsak hi.

⁹Huchi in, TOUPA Israelte Pathian, a kiang a nihvei kilak khinsa a lungtang in a lehngatsan ziak in, Solomon tung ah TOUPA a hehta hi.

¹⁰Hiai thu, pathian dangte na zui ding ahi kei, chih thu a na pepa TOUPA thupiak lah a zuikei hi.

¹¹Huaiziak in, TOUPA’N Solomon kiang ah, “Hichibang in na omta a, ka thukhun leh ka thusehte zuih dia thu k’on piak lah na zuita kei hi. Gam k’on sut ngeingei dia, na sikha ka pe ding.

¹²Himahleh na pa David ziak in na damsung tel in zaw ka hih tadih kei ding. Himahleh na tapa khut apan gam pen konsut ding hi.

¹³Gam tengteng k’on sutvek kei dia; himahleh ka sikha David ziak leh ka tel Jerusalem ziak in nam khat na tapa ka pe ding” a chi hi.

¹⁴Toupa’n Edom mi, Hadad Solomon melma din ading khesakta a; amah Edom gam kumpipa suan ahi.

¹⁵Huan hichi ahi a, David Edom gam a, a omlai a, a mi thahte uh vui dia a sepaih heutu Joab a hohtou a, Edom mi pasal peuhmah a vathah khitnung in,

¹⁶Joab leh Israel mi tengteng kha guktak Edom gam a pasal tengteng a hihlup khit masiah om uh ahi ngal a.

¹⁷Hadad leh a pa sikhate lak a Edom mi khenkhatte Aigupta gam ah a tai ua; Hadad ahihleh naupang neu ahilai hi.

¹⁸Midian gam apan a pawt ua, Paran a hongtung uh. Paran apan mite a pi ua, Aigupta gam, Aigupta gam kumpipa Pharo kiang a tungsuk ua; aman inn a na pia a, nek dingte a na ngaihtuahsak a, gam leng a na pia hi.

¹⁹Hadad Pharo mit a tung mahmah a, huchi in a ma zi sanggamnu, kumpinu Tahpenes sanggamnu a zi din a pia hi.

²⁰Tahpenes sanggamnu in tapa Genubath a neihsak a, Tahpenes in Pharo inn ah a nawinek tawpna a bawlsak hi. Genubath Pharo inn ah Pharo tate lak ah a omta hi.

²¹Hadad in Aigupta gam apan David a pute kiang ah a ihmuta chih leh sepaih heutu Joab leng a sita chih a na zak in, Hadad in Pharo kiang ah, “Ka gam ua ka paitheihna din hon pawtsak ve” a chi hi.

²²Huchi in, Pharo in a kiang ah, “Ka kiang a na om in taksap bang na nei a? Ngai in, huchi a na gam ua pai nawn na tup maimah?” a chi hi. Aman, “Bangmah neilou e. Bang teng hileh hon paisak himhim in” a chi hi.

²³Pathian in a melma din Eliadah tapa Rezon, a toupa Hadadezer, Zobah kumpipa apan taimangsa a dingsak nawn hi.

²⁴David in Zobah khua a mite a thahlai in aman a kiang ah mite a kaikhawm a, sepaih heutu in a na pang hi. Damaska khua ah a hoh ua, huai ah a teng ua, Damaska khua ah kumpipa in a tuta hi.

²⁵Hadad in buaina tut behlap in Solomon damsung teng Israelte melma ahi gige a; Israelte a haw mahmah a, Suria gam tung ah vai a hawm hi.

²⁶Nebat tapa Jeroboam, Zered a Ephraim mi Solomon sikha mah, a nu min Zeruah ahi a, meithai ahi, huai mi’n leng kumpipa tung ah a khut a lik sam hi.

²⁷Kumpipa tung a a khut a hon likna san hichibang ahi: Solomon in Millo a bawl a, a pa David khua siatna lailai a bawlhoih hi.

²⁸Jeroboam ahihleh mihat leh hangsan ahi a; huchi in Solomon in huai tangval mi thanuamtak ahi chih a theih ziak in Joseph inkawte nasep tengteng tung ah heutu in a bawl hi.

²⁹Huailai in hichi ahi a, Jeroboam Jerusalem khua apan a pawt khiak lai in Shiloh mi zawlnei Ahijah in lampi ah a na mu a; Ahijah in puan thak a silh a; amau gel kia in gamlak ah a om uh.

³⁰Ahijah in a puanthak silh a la a, nen sawmlehnih in a botkek hi.

³¹Jeroboam kiang ah, “Nen sawm la in.” TOUPA, Israelte Pathian in hichi in a chi, “Ngai in, Solomon khut apan lalgam ka sut dia, nam sawm nang k’on pe ding.

³²Himahleh ka sikha David ziak leh Israel nam tengteng lak a ka tel khopi, Jerusalem ziak in nam khat a nei ding.

³³Amau hon paisan a , Zidonte pathiannu Ashtaroth, Moabte pathian Kemosh leh Ammonte pathian Milkom a biak ziak un leh ka mitmuh a thil hoih hih ding leh ka sehte leh ka vaihawmte zui dia a pa David bang a ka lampite a zuihlouh ziak in.

³⁴Gam pumpi ka sutkei dia; himahleh ka thupiakte leh ka thusehte zuipa, ka tel, ka sikha David ziak in a damsung in kumpipa in ka om saklai ding.

³⁵Himahleh lalgam a tapa khut apan ka sutkhe dia, nang k’on pe ding, nam sawmte tan in leng.

³⁶Ka sikha David in ka min omna dia ka tel khopi Jerusalem a ka ma a vak a neih gige theihna din nam khat bel a tapa ka pe ding hi.

³⁷Nang k’on sep dia, na ut tengteng bang in vai na hawm dia, Israelte kumpipa na hi ding.

³⁸Hichi ahi ding a, thu k’on piak peuhmah na pom a, ka lampite na zuih a, ka sikha David bang a ka thusehte leh ka thupiakte zui dia ka mitmuh a thil hoih na hihleh na kiang ah ka om dia, David adia ka dinkip sak bang in inkuan kip k’on din khiaksak dia, Israelte k’on pe ding hi.

³⁹Huchi in David suan ka hihgim dia, himahleh tangtawn in zaw ahi kei ding” a chi hi.

⁴⁰Huaiziak in, Solomon in Jeroboam thah a tuma, Jeroboam ading a, Aigupta gam ah, Aigupta gam kumpipa Shishak kiang ah a tai a, Solomon sih matan Aigupta gam ah a omta hi.

⁴¹Solomon tanchin dangte leh a thilhih tengteng leh a pilna Solomon thilhih gelhna bu ah a tuang ka hia?

⁴²Solomon in Israel tengteng tung a Jerusalem a vai a hawm sung kum sawmli ahi.

⁴³Huchi in Solomon a pute kiang ah a ihmuta a, a pa David khopi ah a vui uhi. Huchi in a tapa Rehoboam a sik in a hong lalta hi.