Read Paite Chin 1 KUMPIPATE 12 Bible Online

1 KUMPIPATE 12 - Paite Chin bible

1 KUMPIPATE 12

¹Huan, Rehoboam Sekem khua ah a hoh hi. Israel tengteng Sekem khua ah kumpipa a amah bawl din a hoh khinta uhi.

²Hichi ahi a, Nebat tapa Jeroboam in huai thu a na zak in Kumpipa Solomon kiang apan a taimangna Aigupta gam a omlai ahi a, huchi in Jeroboam Aigupta gam a om ahi.

³Amah a va samsak ua, Jeroboam leh Israel kikaikhawm tengteng a hong ua, Rehoboam kiang ah,

⁴“Na pa’n ka hakkol uh a giksak mahmah hi. Huaiziak in, na pa honzat gimna leh a hakkol giktak ka tung ua a ngak hon hihzang sak inla, huchi in nang na ka sem ding uh” chi in a hong gen uh.

⁵Aman a kiang uah, “Ni thum sung va kikhin khephot unla; ka kiang ah hongpai nawn un” a chi hi. Huchi in mite a paikheta uh.

⁶Kumpipa Rehoboam in a pa Solomon damlai a, a kiang a om upate, “Hiai mite bangchi’n ka dawng dia honhilh mah dih uh” chi’n a dong hi.

⁷Amau a kiang ah, “Tuni a hiai mite sikha a na om a, a na uh sem a, amau dawng a, a kiang ua thu hoih na gen leh, tangtawn in na sikha in a om ding uh” a chi uhi.

⁸Himahleh upate hoihsak a zuikei a, amah toh kivual tuailai a kiang a omte a dong zawta hi.

⁹A kiang uah, “Hiai mite, ka kiang a, Na pa’n ka tung ua hakkol a ngak hon hihzang sak in, chi a hong genmite bangchi’n ka dawng dia, honhilh mah dih uh” a chi hi.

¹⁰A khanvual tuailaite’n a kiang ah, “Hiai mite, Na pa’n ka hakkol uh a giksak thei mahmah a, nang hon hihzang sak dihve, na kiang a chi mite kiang ah, hichibang in chi inla, hichibang in a kiang uah gen in.

¹¹‘Ka pa kawng sang in ka khutme a lianzaw. Ka pa’n hakkol giktak a hon na batsak a, ken na hakkol uh ka behlap lai ding hi. Ka pa’n zepna in a honsawi a, ken aikam in k’on sawi ding’ a chi hi.

¹²Huchi in Jeroboam leh mi tengteng kumpipa’n ni thum nung chiang in “Ka kiang ah hong nawn un” chi a a hilh bang in, a ni thum ni’n Rehoboam kiang ah a vahoh uhi.

¹³Kumpipa’n mite khauhtak in a na dawng a, upate hoihsak a paisan hi.

¹⁴Tuailaite hoihsak bang in, “Ka pa’n na hakkol uh a na giksak a, ken na hakkol uh ka behlap lai dia, ka pa’n zepna in a hon na sawi a, ken ahihleh aikam in k’on sawi ding” a chi hi.

¹⁵Huchi in kumpipa’n mite thu a ngaikheta kei a; hiai bang a thil om TOUPA apan lah ahi ngal a. Toupa’n Shiloh mi Ahijah zang a Nebat tapa Jeroboam kiang a, a thugen sepkhiat a hih theihna ding ahi.

¹⁶Israel tengteng in kumpipa’n a thugen uh a pom kei chih a theih un, “David ah tantuan bang i nei ua? Jesse tapa ah gouluah ding i neikei uh. Israelte aw, na puanin chiat uah pai un. David, na inkuan kingaihtuah in” chi in kumpipa a dawng uh. Huchi in Israelte a puanin chiat uah a paita uhi.

¹⁷Himahleh Judah khopite a teng Israel suante tung ah Rehoboam in vai a hawm hi.

¹⁸Huchi in kumpipa Rehoboam in phutluih nasemte heutu Adoram a sawl hi. Israel tengteng in suang in a na deng ua, a sita hi. huaiziak in, Jerusalem a tai din kumpipa Rehoboam kintak in a kangtalai ah a tuang hi.

¹⁹Huchi in tunitan in David inkawte tung ah Israelte a na hel uhi.

²⁰Hichi ahi a, Israel tengteng in Jeroboam a hong kiknawn chih a zak un, kikaihkhawmna a hoh din a samsak ua, Israelte tung ah kumpipa in a bawl uhi. Judah nam chihlouh David inkawte zui kuamah a omkei uh.

²¹Jerusalem a tuntakin Rehoboam in Israel inkawte dou a Solomon tapa Rehoboam gamla nawn din Judah inkuan tengteng leh Benjamin nam apan mi hangsan a telkhiak, nuai khat leh sing giat a kaikhawm hi.

²²Himahleh Pathian mi Shemaiah kiang ah Pathian thu a hongtung hi.

²³Judah gam kumpipa Solomon tapa Rehoboam kiang ah leh Judah leh Benjamin inkuan tengteng kiang ah leh midang teng kiang ah,

²⁴Toupa’n hichi in a chi, “Va hohtou kei un. Israel suan, na unaute vadou kei un. Na inn chiat uah pai nawn vek un. Hiai kei thilhih ahi, chi’n gen in” a chi hi. Huchi in TOUPA thu a zui ua, TOUPA thu bang in a kiknawn ua, a pai nawn vekta uhi.

²⁵Huchi in Jeroboam in Ephraim tanggam ah Sekem khua a sat a, huai ah a teng hi. Huai apan a pawtkhia a, Penuel khua a sat hi.

²⁶Jeroboam in a lungtang in, “Lalgam David inkawte a honghi nawn diam aw” a chi hi.

²⁷“Hiai mite Jerusalem a TOUPA inn a kithoihnate lan dia a hoh touh uleh a lungtang un a toupa uh, Rehoboam, Judah gam kumpipa lam ah a awn nawn mai ding. Huchi in kei a honthat ding ua, Judah gam kumpipa Rehoboam lam ah a belhnawn mai ding uh” a chi hi.

²⁸Kumpipa’n mi a dong a, dangkaeng in bawngnou lim nih a bawl a; a kiang uah, “Nou adin Jerusalem a hohtouh a haksa lawtel hi. Aw, Israel en dih uh, Aigupta gam apan nou hon pikhia na pathiante uh” a chi hi.

²⁹Huchi in khat Bethel ah a koih a, khat pen Dan ah a koih hi.

³⁰Mipite lah hiai bawngnou lim khat be din Dan tanpha a vapai ziak un hiai khelhna a hong hita hi.

³¹Munsang ah innte a lam a, Levi suante hilou, mi niampente lak a mi siampu in a bawl hi.

³²Jeroboam in Judah gam a Ankuanglui a neih mah bang un kha giatna, huai kha ni sawmlehnga ni Ankuanglui ni din a sep hi. Maitam ah a hohtou a; Bethel ah a bawngnou lim kiang ah a kithoih hi. Munsang a bawlte ah siampute sep in Bethel ah a koih hi.

³³Aman a deih bang a, a seh kha mah, kha giatna, ni sawmlehnga ni’n Bethel a maitam a bawl ah a hohtou hi. Israel suante adin Ankuangluina a sep a, maitam a gimlim hal din a hohtou hi.