Read Paite Chin 1 KUMPIPATE 13 Bible Online

1 KUMPIPATE 13 - Paite Chin bible

1 KUMPIPATE 13

¹Huan, ngai in, TOUPA thu in Judah gam apan Pathian mi khat Bethel ah a honghi. Jeroboam maitam chin ah gimlim hal di’n a na ding hi.

²Aman TOUPA thu in maitam a kikou khum a, “Maitam aw, maitam, TOUPA hichi in a chi. ‘Ngai in, David inkuan ah tapa, a min Josiah a hong piang dia, aman na tung a gimlim halna munsang a siampute na tung ah a lan dia, na tung ah mihing guhte a hal ding’ ” a chi hi.

³Huai ni mah in chiamtehna a pia hi. “Hiai TOUPA chiamtehna ding a chih ahi. Ngai in, maitam a hong khangkham dia, a tung a meivute a hong bawvek ding” a chi hi.

⁴Hichi ahi a, Pathian mi in Bethel a maitam a kikou khum thu kumpipa’n a zak in, Jeroboam in, “Manun” chi’n maitam apan a khut in a sawk hi. Mat tuma a sawkna khut a zawta a, a khut a kai kiknawn theita kei hi.

⁵Pathian min TOUPA thu a chiamtehna dia a gen bang in maitam leng a khangkhama, maitam a meivute leng a bawvek hi.

⁶Kumpipa’n a dawng a, Pathian mi kiang ah, “Ka khut a hong damnawn theihna din TOUPA na Pathian hehpihna ngen inla, hon thumsak in” a chi hi. Pathian min TOUPA kiang ah a ngen a, Kumpipa khut a hong damnawn a, a malam a bangmah in a hongom nawnta hi.

⁷Huchi in Kumpipa’n Pathian mi kiang ah, “Ka inn ah kei toh i pai dia hong kihihhalh tadih inla, huchi in kipahman k’on pe ding” a chi hi.

⁸Pathian mi’n kumpipa kiang ah, “Na inn kimkhat zah honpe ding himah lechin leng na kiang ah k’ong pai tuankei ding, hiai ah tanghou ne in tui himhim leng ka dawnsam kei ding.

⁹Tanghou va ne in tui himhim leng va dawn kenla, ‘na va hohna lampi ah leng kiknawn ken chi a TOUPA thu a sawl ka hi’ ” a chi hi.

¹⁰Huchi in lampi dang ah a pai a, Bethel a a hong kuanna lampi ah a paita kei hi.

¹¹Bethel ah zawlnei putek khat a om hi. A tapate’n huai ni a Bethel a Pathian mi thilhih tengteng a hilh vek uhi. Kumpipa kiang a a thu gente leng a pa uh a hilhlai uhi.

¹²A pa un a kiang uah, “Koi lampi a tawn a?” a chi hi. A tapate’n Judah gam apan hongpai Pathian mi painawnna lampi a kawkmuh uh.

¹³Huchi in a tapate kiang ah, “Sabiltung hon bawlsak dih uh” a chi hi. Sabiltung a bawlsak ua; a tung ah a tuangta hi.

¹⁴Pathian mi a delhta a, tawsaw sing nuai a tuin a va mu hi. A kiang ah, “Nang na hi maw Judah gam apan hongpai Pathian mi?” a chi hi. Aman, “Hi e” a chi hi.

¹⁵Huchi in aman a kiang ah, “Ka inn ah kei toh hongpai inla; tanghou hong ne dihve” a chi hi.

¹⁶Aman, “Nang toh kiknawn thei ka hi kei, na kiang a hongthei leng ka hi sam kei. Hiai ah na kiang ah thanghou ne in tui himhim leng ka dawn sam kei ding.

¹⁷Tanghou va ne in tui himhim leng va dawn kenla, na va hohna lampi ah leng kiknawn ken, chi a TOUPA thu a hilhlah ka hi ngal a” a chi hi.

¹⁸Aman a kiang ah, “Keileng nangmah bang a zawlnei ka hi. Angel in TOUPA thu in, tanghoute ne a tuite dawn din na inn ah pi kiknawn in, chi in a hon houpih hi” a chi hi. Himahleh a kiang ah zuau a gen hi.

¹⁹Huchi in a kiang ah a kiknawn a, a inn ah tanghoute ne in tui a dawnta hi.

²⁰Hichi ahi a, dohkan a umlai un, a pi kiknawnpa zawlnei kiang ah TOUPA thu a hongtung hi.

²¹Huchi in Judah gam apan hongpai Pathian mi kiang ah, TOUPA’N hichi in a chi. “TOUPA thugen manglou a, TOUPA na Pathian in thu a honpiak na zuihlouh a,

²²hong kiknawn a, tanghou ne in tui leng dawn ken, ka chihna mun mahmah a tanghou ne a, tui na dawn ziak in na luang na pute han a koih ahi kei ding” chi in a genkheta hi.

²³Hichi ahi a, tanghou ne a, tui a dawn zoh in, zawlnei a pi kiknawnpa’n sabiltung a bawlsak hi.

²⁴Huchi in a paita a lamkal ah humpinelkai toh a kituak ua, a na thatta hi. A luang lampi ah a kipai a, sabiltung a kiang ah ading a, humpinelkai leng siluang kiang ah ading hi.

²⁵Ngai in, mi a vapai ua, lampi a siluang kipai leh siluang kiang a humpinelkai ding a mu ua; zawlnei putek tenna khua ah a vagen uhi.

²⁶Lam kal apan vapikik nawnpa zawlnei in huai thu a na zaktak in, “Pathian mi, TOUPA thugen mang nuam loupa eive. Huchi in TOUPA’N a kiang a, a gen, a thu bangbang a TOUPA’N humpinelkai kiang a pia a, a na ham a, a na keilumta eive” a chi hi.

²⁷A tapate kiang ah, “Sabiltung hon bawlsak dih uh” chi in a gen a; a bawlsak uhi.

²⁸Huchi in a kuanta a, a luang lampi a kipai leh sabiltung leh humpinelkai a luang kiang a ding a va mu hi. Humpinelkai in luang a na ne nai kei a, sabiltung leng a na ham kei hi.

²⁹Zawlnei in Pathian mi luang a dom a, sabiltung tung ah a koih a, a kikpihta hi. Huchi in zawlnei putek tenna khua ah sun ding leh vui din a la lutta hi.

³⁰A luang amah han ah a sial a; “Ka unaupa khawk hina mah e!” chi’n a sun uhi.

³¹Hichi ahi a, a vui khitnung in a tapate kiang ah, “Ka sih chiang in Pathian mi kivuina han ah hon vuisam un. A guhte kiang ah ka guhte koih un.

³²Pathian thu a Bethel a maitam leh, Samaria gam khopite a munsangte inn tengteng a kikou khumna thu hongtung ngeingei ding ahi” a chi hi.

³³Huai thilzoh in Jeroboam in a omdan diklou a tawpsan tuankei hi. Mi niampente lak a munsang siampu dia a bawl siampute a om theihna ding un a deihdeih a hihtuam hi.

³⁴Huai thil Jeroboam inkuan khelhna amau in-gam saktu leh khovel apan hihmangthangtu a hong hita.