Read Paite Chin 1 KUMPIPATE 14 Bible Online

1 KUMPIPATE 14 - Paite Chin bible

1 KUMPIPATE 14

¹Huailai in Jeroboam tapa Abijah a china hi.

²Jeroboam in a zi kiang ah, “Thou inla, Jeroboam zi na hi chih a hon theihtheih louhna ding un ki hihlamdang inla, Shiloh ah vahoh dih; ngai in, huai ah zawlnei Ahijah, hiai mite tung a kumpipa dia k’ong om ding ka tungtang thu genpa a om hi.

³Tanghoubeu sawm leh tanghou pei lianloute leh khuaizu thawl khat tawi inla, a kiang ah vahoh dih. Naupang omdan ding hon na hilh ding” a chi hi.

⁴Jeroboam zi in huchibang in a hih a, a thou a, Shiloh ah a hoh a, Ahijah inn ah a va hohta hi. Ahijah in khua a muthei nawn kei a; a upat ziak in a mitlah a mialta hi.

⁵TOUPA’N Ahijah kiang ah, “Ngai in, Jeroboam zi a tapa tungtang a thu dong din a hong. A chi a na a, hichibang in na hilh ding ahi. Hichi ahi ding a, a honglut chiang in numei dang hileh kilawmtak in a hong kibawl ding” a chi hi.

⁶Hichi ahi a, Ahijah in a honglut lai a khesik ging a na zak tak in, “Nang Jeroboam zi honglut dihve. Bang a chia ahia midang a na kibawl? Tanchin hoihlou tak nang honhilh dia sawl ka hi.

⁷Pai nawn inla, Jeroboam kiang ah, TOUPA’N, Israelte Pathian in hichi in a chi. Mipite lak apan k’on tawisang a, ka mi Israelte tung ah heutu in k’on bawl hi.

⁸David inkuante gam ka sut a, huai nang k’on pia hi. Himahleh nang ka sikha David bang in na omkei. Aman zaw ka thupiakte a zui a, ka mitmuh a thil hoih kia hih tum in a lungtang tengteng in a honzui hi.

⁹Himahleh nang bel na ma a mite tengteng sang in thil na hihkhial mahmah se a, n’on hehsakna din pathian dangte leh milim sunte na bawl a, n’on nungngatsanta hi.

¹⁰Huaiziak in, ngai in, Jeroboam inkuan tung ah thil hoihlou ka tungsak dia, Jeroboam apan ta pasal taphot Israel gam a mi nehden leh den louh leng ka hihmang dia, min ek a phiatsiang sipsip bang in Jeroboam inkuan a gamvek masiah ka phiatmang ding hi.

¹¹Jeroboam inkaw lak a mi, khopi a si peuhmahte ui in a ne dia; gam a si peuhmahte tung a leng vasate’n a ne ding uh. Hiai TOUPA’N a genkhinta hi.

¹²Huchi in, thou inla na inn ah pai nawn mai in, khopi sung na siktakin huai naupang a si ding hi.

¹³Huchi in Israel tengteng in a sun ding ua, a vui ding uh. Jeroboam inkawte lak ah amah kia han a koih ahi ding hi. Jeroboam inkaw lak ah amah kia a TOUPA Israelte Pathian lam a thil hoih omsun ahi.

¹⁴TOUPA’N Amah adia Israelte tung a kumpipa hi ding; Jeroboam inkuan hihmang ding mi khat a tungkhe ding hi. Himahleh bang eita? Huai ni ding, tu mah ahi.

¹⁵TOUPA’N lah tui a phaiphek lingling bang mai in Israelte a honsat ling dia; huchi in TOUPA hehsak a Asherte uh a bawl ziak un a pute uh a na piaksa, hiai gam hoihtak apan Israelte a botkhe siangvek dia, luikhen lam ah a hon hihzak vek ding hi.

¹⁶Israelte thil hihkhial sak a, a hih Jeroboam khelhnate ziak in Israelte a lehngatsan ding” a chi hi.

¹⁷Jeroboam zi a thou a, a pawtkhia a, Tirzah khua a vatung a; inn kongpi bul a tuntak in huai naupang a sita hi.

¹⁸TOUPA’N a sikha zawlnei Ahijah zang a thu a gen bang ngei in Israel tengteng in a vui ua, a sunta uhi.

¹⁹Jeroboam tanchin dang, a galdou thute leh a vaihawm thute, ngai in, Israel kumpipate vaihawm lai thugelhna bu ah a tuang hi.

²⁰Huchi in Jeroboam vaihawm sung kum sawmnih leh nih ahi a, a pute kiang ah a ihmuta a, a tapa Nadab amah sik in a hong lalta hi.

²¹Solomon tapa Rehoboam Judah gam ah a lal hi. A lal tung lai in Rehoboam kum sawmli leh khat a upa ahi. TOUPA’N a min omsakna dia Israel nam tengtengte lak a a tel khopi Jerusalem ah kum sawmlehsagih a lal hi. A nu min Naamah ahi a, amah Ammon mi ahi.

²²Judahte’n TOUPA mitmuh in thil gilou a hih ua; a pute uh thilhih tengteng khup in a khelhnate un a mullitna a tokthou uhi.

²³Tangsang teng ah leh sing hing teng nuai ah suangphuhte phut in mun sangte leh Asherte nangawn a bawl ngal ua.

²⁴Huai gam ah pasal kizuakte leng a om ua; Israel suante ma a TOUPA’N a delhkhiak namte thilhih kihhuai chiteng a hihsamta uhi.

²⁵Kumpipa Rehoboam lal kum nga kum in hichi ahi a, Aigupta kumpipa Shishak in Jerusalem a sual hi.

²⁶TOUPA inn a goute leh kumpipa inn a goute a la a, avek in a la khin hi. Solomon dangkaeng lum bawl tengteng leng a la telvek hi.

²⁷Kumpipa Rehoboam in huaite tang in dal lumte a bawl a, kumpipa inn kongpi vengmi heutute a kem sak hi.

²⁸Hichi ahi a, TOUPA inn a kumpipa a lut peuhmah chiang in vengmite’n huaite a tawi ua, dantan ah a koih nawn zel uhi.

²⁹Rehoboam tanchin dangte leh a thilhih tengteng Judah kumpipate lal lai thugelhna bu ah a tuang kei maw?

³⁰Rehoboam leh Jeroboam a damsung teng un a kidou uhi.

³¹Huchi in Rehoboam a pute kiang ah a ihmuta a, David khopi ah a pute lak ah a vuita uh. A nu min Naamah ahi a, Ammon mi ahi. A tapa Abijam a sik in a hong lalta hi.