Read Paite Chin 1 KUMPIPATE 16 Bible Online

1 KUMPIPATE 16 - Paite Chin bible

1 KUMPIPATE 16

¹Huchi in Baasha kalh in Hanani tapa Jehu kiang ah TOUPA thu a hongtung hi.

²“Leivui apan k’on domsang a, ka mi Israelte tung ah heutu in k’on bawl hi. Nang Jeroboam lampi zuih na tawn a, a khelhnate a hon hehsak din ka mi Israelte thil na hihkhial sak hi.

³Ngai in, Baasha leh a inkawte ka hihmang ding hi. Huchi in Nebat tapa Jeroboam inkawte bang mai in na inkawte ka bawl ding.

⁴Baasha inkawte lak a mi khopi a si peuhmah ui in a ne dia; a inkawte lak a mi gamlak a si peuhmah tungleng vasate’n a ne ding uh” chi in.

⁵Baasha tanchin dangte, a thilhihte leh a thilhih theihdante Israel kumpipate lal lai thugelhna bu ah a tuang kei maw?

⁶Baasha a pute kiang ah a ihmuta a, Tirzah khua ah a vui ua; a tapa Elah a sik in a lalta hi.

⁷Baasha leh a inkawte tungtang thu ah a khutsuak a TOUPA heh sak dia Jeroboam inkawte batna nei a TOUPA mitmuh a thil hoihlou mahmah a hih ziak leh amah a thah ziak in Hanani tapa zawlnei Jehu zang a a gen TOUPA thu a hongtung hi.

⁸Judah kumpipa Asa lal kum sawmnih leh guk na ah Baasha tapa Elah, Tirzah ah Israelte tung ah a lal pan a, kum nih a lal hi.

⁹A sikha Zimri, a kangtalai kimkhat tung a heutu in Tirzah khua ah amah guk thah a sawm hi. Huchih lai in, Tirzah khua ah inn sung lam heutu Arza inn ah zukham in a om hi.

¹⁰Judah kumpipa Asa lal kum sawmnih leh sagih kum in Zimri a valut a, a sual a, a that a, a sik in a lalta hi.

¹¹Hichi ahi a, a hong lal pan a, a mangtutphah a a hongtut tak in, Baasha inkaw tengteng a thatvek a; a tanaute leh a lawmte lak a mi pasal photphot khat leng a hawikei hi.

¹²Huchi in, zawlnei Jehu zang a Baasha kalh a a gen, TOUPA thu bang in, Zimri in Baasha inkaw tengteng a thatvek hi.

¹³TOUPA, Israelte Pathian, a ginnatlouhna ua hehsak dia, a tohthoh ua, a hihkhelh uh, Baasha khelhnate leh Elah tapa khelhna, huai a Israelte a hih khelhsak ziak un.

¹⁴Elah tanchin dangte leh a thilhih tengteng Israel kumpipate lal lai thugelhna bu ah a tuang ka hia?

¹⁵Judah kumpipa Asa lal kum sawmnih leh sagih na ah Zimri, Tirzah ah ni sagih a lal hi. Philistiate neihsa, Gibbethon khua a mite’n a um uhi.

¹⁶A um mite’n “Zimri in a guksawm a, kumpipa a that” chih a gen uh a naza ua; huchi in Israel tengteng in sepaih heutu, Omri, huai nin a giahmun uah Israelte tung a kumpipa in a bawl uhi.

¹⁷Omri bel Israel tengteng toh Gibbethon apan in a hohtou ua, Tirzah a va um uhi.

¹⁸Hichi ahi a, Zimri in khua a la uh chih a theih in, kumpipa inn a kulh ah a tailut a, kumpipa inn ah a kibuhal a, a sita hi.

¹⁹TOUPA mitmuh a thil hoihlou mahmah hih a a khelhnate ziak leh Jeroboam lampi tawn a Israelte thil hihkhial sak a, a khelh ziak in.

²⁰Zimri tanchin dangte leh a sawmgukna thute Israel kumpipate lal lai thugelhna bu ah a tuang kei maw?

²¹Huchi in Israel mite pawl nih in a kikhenta ua; mipi kimkhat in Ginath tapa Tibni kumpipa dia bawl tum in a zui ua; a kimkhat in Omri a zui uhi.

²²Himahleh Omri zuite’n Ginath tapa Tibni zuite a zou ua: huchi in Tibni a si a, Omri a hong lalta hi.

²³Judah kumpipa Asa lal kum sawmthum leh khatna ah Omri Israelte tung ah a lal pan a, kum sawmlehnih a lal a: Tirzah ah kum guk a lal hi.

²⁴Shemer a Samaria tang dangka talent nih in a lei a; tang ah khua a sat a, a khosat min huai neipa Shemer mintam in Samaria a sa hi.

²⁵Omri in TOUPA mitmuh in thil hoihlou mahmah a hih a, a ma a mi tengteng sang in thil a hihkhial thupi tuamse hi.

²⁶Nebat tapa Jeroboam dan tengteng a la a, a ginnatlouhna ziak ua TOUPA, Israelte Pathian hehsak dia Israelte thil a hihkhelh sak bang in a khial samta hi.

²⁷Omri thilhih tanchin dangte leh a thilhih theihdan a hihlat thute Israel kumpipate lal lai thugelhna bu ah a tuang ka hia?

²⁸Huchi in Omri a pute kiang ah a ihmuta a, Samaria khua ah a vui ua; a tapa Ahab a sik in a hong lalta hi.

²⁹Judah kumpipa Asa lal kum sawmthum leh giatna ah Omri tapa Ahab Israelte tung ah a lal pan hi. Omri tapa Ahab Samaria ah kum sawmnih leh nih Israelte tung ah a lal hi.

³⁰Omri tapa Ahab in a ma a mi tengteng sang in TOUPA mitmuh in thil hoihlou mahmah a hih hi.

³¹Hichi ahi a, Nebat tapa Jeroboam khelhna bang hih sam bangmahlou a ngai hileh kilawm tak in, Zidonte kumpipa Eth baal tanu Jezebel zi in a nei a, Baal na sem in a be samta hi.

³²Samaria a Baal inn a lam ah Baal adin maitam a doh hi.

³³Ahab in Aserah a bawl a; a ma a Israel kumpipa tengteng sang in Ahab in TOUPA, Israelte Pathian hehsakna thil a nak hih tungtuan hi.

³⁴A lal lai in Bethel mi Hiel in Jeriko khua a sat a; a ta chil Abiram tanloh in a suangphum a phum hi. A nautum Segub tanloh hial in a kulh kongkhakte ading khesak a, TOUPA’N Nun tapa Joshua zang a a na gensa bang in.