Read Paite Chin 1 KUMPIPATE 17 Bible Online

1 KUMPIPATE 17 - Paite Chin bible

1 KUMPIPATE 17

¹Huan Gilead gam a Tishbi khua a mi Elijah in Ahab kiang ah, “TOUPA, a ma a ka dinna Israelte Pathian hinna lou in ka gen hi. Keimah thu lou in kum bangzah hiam sung daitui leh vuah a zukei ding” a chi hi.

²TOUPA thu a kiang ah a hongtung hi.

³“Hiai apan pawt inla, suahlam zuan in pai inla, Jordan gei a om Kerith lui ah va kibu in.

⁴Hichi ahi ding a, Huai luitui na dawn dia; huai ah nang hon vak din va-ak thu ka pekhin hi” a chi hi.

⁵Huchi in a kuan a, TOUPA thu bang in a hihta hi. Jordan gei a om Kerith lui ah a tengta hi.

⁶Va-akte’n zingsang in tanghou leh sa a hong puakzel ua, nitaklam in tanghou leh sa a hong puaknawn zel uhi. Huai luitui a dawn hi.

⁷A nung deuh in hichi ahi a, huai gam a vuah himhim a zuk louh ziak in lui a hong kangta hi.

⁸TOUPA thu a kiang ah a hongtung a,

⁹“Thou inla, Zidon gam a Zarephath khua ah hoh inla, huai ah om in. Nang honvak din meithai khat thu ka pekhin” a chi hi.

¹⁰Huchi in a thou a, Zarephath khua ah a hohta hi. Huai khaw kulh kongpi a tun in, ngai in, meithai khat sing tom a na om a; amah a sam a, “Bel in tui tawmchik honla dihve, ka na dawn ding” a chi hi.

¹¹La dia kuan a sam a, “Tanghou neuchik bek hontawi lechin” a chi hi.

¹²Aman, TOUPA na Pathian hinna lou in, ka gen hi. “Tanghou ka neikei, bel ah tangbuang pham khat lel leh thawl ah sathau tawmchik kia ka nei hi. Ngai in, ka pai chia ka tapa adia bawlna ding singkang nih hiam lel ka tom a, huchi in ka ne ding ua, ka simai ding uh” a chi hi.

¹³Elijah in a kiang ah, “Lau ken, na gen bang in va hih in. Himahleh huai in tanghou neuchik petmah hon bawlsak phot inla, huai hontawi inla, huaikhit chiang in nang ading leh na tapa ading na bawl ding hi.

¹⁴TOUPA, Israelte Pathian in hichi in a chi. TOUPA’N leitung a vuah a hon zuksak masiah tangbuang bel a vuak tuankei dia, sathau thawl leng a kangkei ding” a chi hi.

¹⁵Huchi in, Elijah gen bang in a hih a; amah leh a inkawte leh Elijah toh ni tamtak a ne uhi.

¹⁶Elijah zang a a gen TOUPA thu bang in tangbuang bel a vuak tuankei a, sathau thawl leng a kang sam kei hi.

¹⁷Huai thilte nung in hichi ahi a, huai numei, inn neinu tapa china in a hong gim mahmah a, a nak a hong beita hi.

¹⁸Aman Elijah kiang ah, “Nang Pathian mi aw, ka tung a lungkim louhna bang nei na hia? Ka khelhna hon thei khesak ding leh ka tapa hon thahsak dia hongpai neive!” a chi hi.

¹⁹Aman a kiang ah, “Na tapa honpia in” a chi hi. Huchi in a pom lai a la a, a omna dantan ah a pom tou a, a lupna ah a sial hi.

²⁰TOUPA a sam a, “Aw TOUPA, ka Pathian, ka tenna meithainu tung ah leh a tapa hihlupsak in thil hoihlou hon tungsakta na hi maw?” a chi hi.

²¹Huchi in, naupang tung ah thumvei bokkhup in, TOUPA a sam a, “Aw Toupa, ka Pathian, hehpih in hiai naupang hinna asung ah hon omsak nawn in” a chi hi.

²²Toupa’n Elijah thu a na ngaihkhiak sak hi. Hichi in naupang hinna amah sung ah a hongom nawn a, a hong halhnawnta hi.

²³Elijah in naupang a pi a, dantan apan inn sung ah a paipih suk a, a nu a pia hi. Elijah in, “En in, na tapa a hing hi” a chi hi.

²⁴Numei in Elijah kiang ah, “Tuin Pathian mi na hi a, na kam a TOUPA thu thutak ahi” chih ka theita, a chi hi.