Read Paite Chin 1 KUMPIPATE 18 Bible Online

1 KUMPIPATE 18 - Paite Chin bible

1 KUMPIPATE 18

¹Huan, ni sawtkuamtak nung in hichi ahi a, a kum thum kum in TOUPA thu Elijah kiang ah a hongtung hi. “Vakuan inla, Ahab kiang ah va kihil in. Huchi in leitung ah vuah ka zusak ding” a chi hi.

²Elijah Ahab kiang a kihil din a kuanta hi. Samaria gam ah kial a na mahmah hi.

³Ahab in Obadiah, a in sunglam heutu a sam hi. Obadiah bel TOUPA laudan siam mahmah mi ahi a;

⁴Hichi ahi a, Jezebel in TOUPA zawlneite a satkhiak lai in Obadiah in zawlnei za khat a pi a, kawkhuk ah sawmnga nga in a sel a, tanghou leh tui in a vak hi.

⁵Ahab in Obadiah kiang ah, “Tui naknei tengteng leh luiguam tengteng omna gam vatuan vialvial dihve. Sakol leh sabiltungte i hut hing theihna din loupa i muhsak theikha hiam, huchilou in zaw gante i tanvek kha ding” a chi hi.

⁶Huchi in gam totsuak ding in a kihawm ua; Ahab amah kia in lampi dang ah a pai a, Obadiah leng amah kia in lampi dang ah a pai hi.

⁷Huchi a Obadiah a pailai in, ngai in, Elijah in a natuak a; aman a theilai a, huchi in a khupboh a, “Ka toupa Elijah na hi maw?” a chi hi.

⁸Aman a dawng a, “Hi e, kuan inla, ngai in, Elijah huai ah a om hi, chi’n na toupa vahilh in” a chi hi.

⁹Aman, “Thil bang ahia ka hihkhelh a, na sikha thah dia Ahab khut a na honpiak ding?

¹⁰TOUPA na Pathian hinna lou in ka gen ahi, ka pu in nang a hon zonsak louhna nam leh gam himhim a omkei. Hiai ah a omkei, a chih chiang un nang a hon muhlouhna thu uah gam leh nam a kichiamsak hi.

¹¹Tuin nang, kuan inla, ngai in, Elijah hiai ah a om, chi’n na toupa vahilh in, na chi hi.

¹²Hichi ahi ding a, nang k’on nutsiattakin TOUPA Kha in ka theihlouhna ah nang a hong lamang dia; huchi in Ahab ka va hilh a, nang a hon muhtheih ngal kenzaw, kei a hon that mai ding hi. Himahleh na sikha in ka valnou tung apan TOUPA ka lau hi.

¹³Jezebel in TOUPA zawlneite a thahlai a ka thilhih, TOUPA zawlneite lak a mi za khat, sawmnga nga a kawkhuka, tanghou leh tui a ka vak dan ka toupa hon hilhlou uhia?

¹⁴Tuin nang, kuan inla, ngai in, Elijah huai ah a om hi, chi’n na toupa va hilh in na chimawk a; aman kei a honthat mahmah ding, a chi hi.

¹⁵Elijah in, a ma ka dinna sepaihte TOUPA hinna lou in ka gen hi, tuni in a kiang ah ka kihil ngeingei ding” a chi hi.

¹⁶Huchi in Ahab houpih din Obadiah a kuan a, a hilhta a; huchi in Elijah mu din Ahab a kuanta hi.

¹⁷Hichi ahi a, Ahab in Elijah a muh in Ahab in a kiang ah, “Nang na hi maw, Israelte buaisakpa?” a chi hi.

¹⁸Aman a dawng a, “Israelte ka buaisak kei. Nang leh na pa inkawte eive a buaisak zaw. TOUPA thupiakte lehngatsan a, Baal na zuihzawk na ah.

¹⁹Huchi in tuin Israel tengteng leh Baal zawlnei za li leh sawmnga leh Asher zawlnei, Jezebel dohkan a Ankuang um za lite ka kiang ah Karmel tang ah va samkhawm in” a chi hi.

²⁰Huchi in Ahab in Israel suan tengteng kiang ah mi a sawl a, zawlneite Karmel tang ah a samkhawm hi.

²¹Elijah in mipi tengteng a vanaih a, “Vanglak a bang tan om ding na hi ua? TOUPA Pathian ahihleh, Amah zui unla; Baal ahihleh amah zui un” a chi hi. Mipite’n kam khat in leng a dawng kei uhi.

²²Huchi in, Elijah in mipite kiang ah, “TOUPA zawlnei omsun kei kia ka hi a; Baal zawlneite bel mi za li leh sawmnga ahi uh.

²³Huchi in bawngtal nih hongpia uhenla; amau bawngtal khat amau a tuam din tel uhenla, sem nen uhenla, singtung ah koih uhenla, a nuai ah mei tohlou in. Ken leng bawngtal khat ka bawl sam dia, sing tung ah ka koih dia mei ka toh sam kei ding.

²⁴Nou na pathiante min uh sam unla, ken TOUPA min ka sam ding. Huchi in mei a hon dawng Pathian pen Pathian hi hen, a chi hi. Huchi in mi tengteng in a thugen a hoih hi” chi’n a dawng uhi.

²⁵Elijah in Baal zawlneite kiang ah, “Nou bawngtal khat nou a tuam din tel unla, bawl masa un; nou na tamdeuh ua; na pathiante min sam unla, himahleh a nuai ah mei toh kei un” a chi hi.

²⁶Bawngtal a tan pen uh a la ua, a bawl ua, “Baal aw, hon dawng in” chi in zingsang apan sun tan in Baal min a sam uh. Himahleh aw a omkei a, a dawng leng a omsam kei a, maitam kibawl tung ah a tawm uhi.

²⁷Sunlai in hichi ahi a, “Elijah in amau enghou in, kikou ngaih ve ua; pathian khat ahi ngal a. Midang houpih hiam, nungdelh neilel hiam, khualzin ahihkeileh ihmu lel phawn teitei ngai houh hinte” a chi hi.

²⁸Huchi in a ngaih a ngaih in a kikou ua, a hihzel dan bang un sisan pawt khop hial in temta in a ki atkeh ua, thilzum in a kisun uhi.

²⁹Sun nung a hong hih in hichi ahi a, nitaklam kithoih hun tan in thu a gen uhi. Himahleh aw hiam, dawngtu hiam limsaktu leng a omkei.

³⁰Huchi in Elijah in mipi tengteng kiang ah, “Hongnai dih ua” a chi hi. Huchi in mipi tengteng in a vanaih uhi.

³¹TOUPA maitam kichimsa a bawlpha a; na min Israel ahi ding, chi a TOUPA thu a na mupa Jakob tate nam zah suang sawmlehnih Elijah in a la hi.

³²Huai suangte in TOUPA min in maitam a bawl a; maitam kim buhchi tehna nih takna ding a toukuak hi.

³³Sing a koih hoih sipsip a, bawngtal a semnen a, singtung ah a koih hi. “Bel li tui in dimsak unla, haltum thillat leh sing buakun” a chi hi.

³⁴A nihveina din “Buaknawn un” a chi a; a buaknawn uhi. A thumveina din “Buaknawn un,” a chi a, a buaknawn uhi.

³⁵Huchi in tui maitam kim ah a luang zuazua a; tohkuak tui in a dimta hi.

³⁶Nitaklam kithoih hun in hichi ahi a, zawlnei Elijah in a va naih a, “TOUPA Abraham, Isak leh Israel Pathian, nang Israel gam a Pathian na hihleh, kei na sikha ka hih, hiai tengteng nang thu a ka hih tuni in theih sak hi hen.

³⁷Hon ngaikhia in, Aw TOUPA hon ngaikhia in, hiai mipite’n nang TOUPA Pathian na hi a, a lungtang uh na heikik nawnta chih a theihna ding un” a chi hi.

³⁸Huchi in, TOUPA mei a hong kia a, haltum thillat, a sing, a suang leh a leivui a kangtum a, tohkuak a tui a hipkang hi.

³⁹Huchi in mipi tengteng in huai a muh un a khupboh ua, “TOUPA Amah Pathian ahi, TOUPA Amah Pathian ahi” a chi uh.

⁴⁰Elijah in a kiang uah, Baal zawlneite man unla, khat leng suaktasak kei un, a chi hi. Huchi in a man ua, Elijah in Kishon lui ah a pi suk a, huai ah amau a that hi.

⁴¹Elijah in Ahab kiang ah, paitou inla, ne in dawnta in; vuahpi zu ding husa a om, a chi hi.

⁴²Ahab ne leh dawn di’n a paitouta hi. Elijah bel Karmel tang vum ah a paitou a; lei ah a kunsuka, a khukte kikal ah a mai a phual hi.

⁴³A sikha kiang ah, “Va paitou inla, tuipi lam va en mahdih!” a chi hi. A va paitou a, tuipi lam a en a; “Bangmah a omkei ” a chi hi. Aman sagihvei kuannawn in, a chi hi.

⁴⁴A sagihvei na ah hichi ahi a, ngai in, tuipi apan mihing khuttum chia lel meipi a leng tou viaiviai, a chi hi. Aman vapai inla, Ahab kiang ah, na kangtalai bawl inla, paisukta in, vuah in a honkhum kha ding, chi in, a chi hi.

⁴⁵Sawtlou nung in hichi ahi a, huih leh meipite in van a dup keih kuih a, vuahpi petmah a hongzuta hi. Ahab kangtalai a tuang in Jezreel khua ah a paita hi.

⁴⁶TOUPA khut Elijah tung ah a om a; a puan a teng a, Ahab ma ah Jezreel kholutna tan a taita hi.