Read Paite Chin 1 KUMPIPATE 19 Bible Online

1 KUMPIPATE 19 - Paite Chin bible

1 KUMPIPATE 19

¹Huan, Ahab in Elijah thilhih tengteng, namsau a zawlnei tengteng a thah thute toh Jezebel a hilh hi.

²Huchi in Jezebel in Elijah kiang ah, “Huai mite lak a mi khat hinna bang a zingchiang a hichi hun ma a na hinna k’on bawlsak sam kei leh pathiante’n a lohloh uh honloh uhenla, huai sang a sezaw in leng” chi a hilh din mi a sawl hi.

³Huchi in huai a theih in a lau a, a thou a, a hinna humbit din a tai hi. Judah gam a Beer — sheba khua a va tung a, huai ah a sikha a nusia hi.

⁴Amah gamdai ah ni khat lampaina tan ah a hoh a, Juniper sing nuai ah a tuin sih a ngenta hi. “A hunta hi; TOUPA aw, tuin ka hinna la in, ka pute sang in lah ka hoihzaw tuankei” a chi hi.

⁵Juniper sing nuai ah a lum a, a ihmuta hi. Ngai in, angel in a hong khoih a, a kiang ah, “Thou inla ne in” a chi hi.

⁶Aman a en vialvial a, ngai in, a lu chin ah tanghou pei, suangsa a haiminsa leh tuithawl a na om hi. Huchi in hiaite ne in a dawn a, a lum nawn hi.

⁷TOUPA angel a nihveina din a hongpai nawn a, a hong khoih a, “Thou inla, ne in, Na paina ding a gamla lawlai hi” a chi hi.

⁸Huchi in a thou a, ne in a dawn a, an ziak a hatna in Pathian tang Horeb tan ni sawmli leh zan sawmli a pai hi.

⁹Huai a kawkhuk khat a vatung a, huai ah a omta hi. Ngai in, TOUPA thu a kiang ah a hongtung a, a kiang ah, “Hiai a bang hih na hia, Elijah?” a chi hi.

¹⁰Aman, “TOUPA, sepaihte Pathian adin phatuam ka ngai mahmah hi. Israel suante’n lah na thukhun a lehngatsan ua, na maitamte a chimsak ua, na zawlneite namsau in a that ngal ua. A omlai kei kia ka hi a, ka hinna lakmang din a zong uhi” a chi hi.

¹¹Aman, “Pawtkhia inla, huai tang ah TOUPA ma ah va ding in” a chi hi. Ngai in, TOUPA a hongpai a, huihpi hat mahmah in tangte TOUPA ma ah a mut khang a, suangpi a kitam phuakphuak hi. Himahleh huai ah TOUPA a omkei. Huih nun khit in zin a hongling a; himahleh huai zinling ah TOUPA a omkei.

¹²Zinlin khit in mei a hongpawt a; himahleh huai mei ah TOUPA a omkei. Mei nung in aw ngat ngiingei a hongpawt hi.

¹³Hichi ahi a, Elijah in huai a zak in a puanin a mai a khuha, va pawtkhia in kawkhuk lutna ah a va ding hi. Ngai in, huai aw in a kiang ah, “Hiai a bang hih na hia, Elijah?” a chi hi.

¹⁴Aman, “TOUPA, sepaihte Pathian adin phatuam ka ngai mahmah hi. Israel suante’n lah na thukhun a lehngatsan ua, na maitamte a chimsak ua, na zawlneite namsau in a that ua. A omlai kei ka hi a, ka hinna lakmang din a zong uhi” a chi hi

¹⁵TOUPA’N a kiang ah, “Pai nawn inla, gamdai lam a Damaska khua ah pai in. Na tun chiang in Suria kumpipa din Hazael thau na nilh ding hi.

¹⁶Israel kumpipa din Nimshi tapa Jehu thau na nilh ding; na sik a zawlnei din Abel meholah khua a mi Shaphat tapa Elisha leng thau na nilh ding ahi.

¹⁷Hichi ahi ding a, Hazael namsau pel peuhmah Jehu in a that dia; Jehu namsau pel peuhmah Elisha in a that ding.

¹⁸Himahleh Israel gam ah Baal ma a khukdin ngeilou leh amah tawp ngeilou mi sang sagih kei adin ka sit hi” a chi.

¹⁹Huchi in huai apan a pawtkhia a, Shaphat tapa Elisha a va mukhia hi. Aman langkawn bat bawngtal tuak sawmlehnih in lou a na kai hi. A sawmlehnihna a zang hi. Elijah in a va naih a, a puan a va silhsak hi.

²⁰Aman a bawngtalte paisan in Elijah a nungdelh a, “Ka nu leh ka pa hon tawpsak din k’on ngen, huchi in k’on zui ding” a chi hi. Aman a kiang ah, “Pai nawn ve leh, bang k’on chih a eita?” a chi hi.

²¹Amah zuilai a kiknawn a, bawng tuakkhat a gou a, bawng vante in a sa a huan a, mite a pia a, amau a ne uhi. Huchi in a thou a, Elijah a delh a, a na a sepsakta hi.