Read Paite Chin 1 KUMPIPATE 2 Bible Online

1 KUMPIPATE 2 - Paite Chin bible

1 KUMPIPATE 2

¹Huan, David sihni ding a hong naita a; a tapa Solomon thu a pia hi.

²“Lei tengteng lampi ah ka pai sam dia; nang hattak leh pasalphatakin om in.

³Na thilhih peuhmah leh na kiheina lam peuhmah a na lamzan theihna din Mosi dan a gelh a hih bang in, TOUPA na Pathian in a lampite zui ding leh a thusehte, a thupiakte, a vaihawmte leh a thu theihsakte pom dia thu a piakte zui in.

⁴Toupa’n ka tungtang thu a, ‘Na suante’n a lungtang tengteng uleh a lungsim tak ua ka mitmuh a thutak a om ding a, a omdan ua a pilvan uleh Israelte mangtutphah a tu ding mi na tatlak kei ding, chi a a gen a hihkip ding hi.’ ”

⁵“Zeruiah tapa Joab in a hon bawldan, Israelte sepaih heutu nih Ner tapa Abner leh Jether tapa Amasa a bawldan na thei hi. Amaute a thah a, kileplai a kidou sisan suah a, a tai a kawnggak leh a khedap but a kidouna sisan a bansak dan.

⁶Huchi in pha nasak dan bang in hih inla, a lu a kelsam pou han ah lungmuang tak in tumsak ken.

⁷Gilead mi Barzillai tate tung ah hehpihna hihlang in. Na dohkan a an ummi din telsak in. Na unau Absalom apan ka taimang lai in ka kiang ah a hong ngal a.

⁸Ngai in Bahurim mi, Benjamin suan, Gera tapa Shimei na kiang ah a om hi. Aman Mahanaim a ka hohlai in hamse hoihlou pi a honloh khum hi. Himahleh Jordan ah hong dawn din a hong kuan hi. Huai ah, namsau in k’on that kei ding, chi in TOUPA minlou in a kiang ah ka na kichiamta hi.

⁹Huchi in mawhlou in zaw koih ken; Mi pil na hi ngal a. A tung ah bangchi’n na hihdia chih ahihleh na theimai ding. A lu a kelsam pou sisan toh han ah na tumsak ding ahi” a chi hi.

¹⁰David bel a pute kiang ah a ihmu samta a, David khopi ah a vui uhi.

¹¹Israelte tung a David lal sung kum sawmli ahi. Hebron ah kum sagih a lal a, Jerusalem ah kum sawmthum leh thum a lal hi.

¹²Solomon a pa David mangtutphah ah a tu a; huchi in a gam nakpitak a hihkip in a hong omta hi.

¹³Haggith tapa Adonijah Solomon nu Bathsheba kiang ah a hoh a. Aman, “Hoih lam thu a hong na hi maw?” a na chi hi. Aman, “Hoihlam thu ah hi e” a chi hi.

¹⁴“Na kiang ah banghiam gen ding ka nei hi” a chi nawn a, aman, “Genve,” a chi hi.

¹⁵Aman, “Lalgam kei a ahita chih leh Israelte tengteng in leng kumpipa din kei a hon en gige uh chih na thei. Himahleh ka unaupa adin lalgam hei a om a, TOUPA seh dan in ka unaupa a a hong hita hi.

¹⁶Tuin thil khat nget ding k’on nei a, hon nial ken” a chi hi. Aman a kiang ah, “Genve” a chi hi.

¹⁷Aman, “Hehpih in kumpipa Solomon hon houpihsak inla, na thu sellou ding ahi ngal a, Shunam mi Abishag zi din hon neisak in” a chi hi.

¹⁸Bathsheba in, “Hileh a ke, kumpipa k’on na houpihsak ding” a chi hi.

¹⁹Bathsheba in Adonijah adia kumpipa Solomon houpih din a kiang ah a hohta hi. Amah mu din kumpipa ading a, a ma ah a kun a, a mangtutphah ah a tuta hi. Kumpipa nu adin mangtutphah a koihsak a; a taklam ah a tuta hi.

²⁰“Thil neuchik khat k’on ngen ut hi. Hon nial mahmah ken, a chi hi. Kumpipa’n a kiang ah, “Nu ngenve” k’on phalsaklou kei ding“, a chi hi.

²¹Aman, “Shunam mi Abishag na unaupa Adonijah zi din neisak in” a chi hi.

²²Kumpipa Solomon in a dawng a, a nu kiang ah, “Bangchidan a Shunam mi Abishag Adonijah adia ngen na hia oi? Gam leng ngetsak vanglak tan la; amah ka u a vo oi. Amah ading leh siampu Abiathar leh Zeruiah tapa Joab adin leng ngen tan la” a chi hi.

²³Kumpipa Solomon in TOUPA minlou in, “Adonijah thilnget in amah tung a sihna thu gen ahihkei himhim leh Pathian in a lohloh in honloh mai hen, huai sang a thupizaw in leng.

²⁴TOUPA, a thuchiam bang a hon hihkip, ka pa David mangtutphah a hon tusak, inkuan hon na phuhkhiak sakpa hinna lou in ka gen ahi. Adonijah tuni mahmah a sihsak ngeingei ding ahi” chi in a kichiamta hi.

²⁵Huchi in, kumpipa Solomon in Jehoiada tapa Benaiah a sawl a, aman a vasual a, a thatta hi.

²⁶Siampu Abiathar kiang ah kumpipa’n “Anathoth khua a na in leh lou ah pai in, sitak lah na hi ngal a. Himahleh ka pa David ma a TOUPA Pathian bawm nana zawn zel ziak in leh ka pa haksatna thuak tengteng nana thuaksam zel ziak in, tuin zaw k’on that kei ding” a chi hi.

²⁷Huchi in, Solomon in Abiathar TOUPA siampu a hihna a tawpsak hi. Hiai Toupa’n Shiloh a Eli inkuante tungtang thu a gen a tangtun theihna ding ahi.

²⁸Huai thu Joab kiang a hongtung a, Joab Absalom lam ah a pang kei na a, Adonijah lam ah a pang hi. Joab TOUPA puanin ah a tai a, maitam kite a len hi.

²⁹“TOUPA puanin ah Joab a tai a, ngai in, maitam bul ah a om” chi in kumpipa Solomon a hilh uhi. Kumpipa Solomon in Jehoiada tapa Benaiah, vasual in, chi in a sawl hi.

³⁰Benaiah TOUPA puanin ah a hohtou a, a kiang ah, “Kumpipa’n hong pawtkhia heh,” a chi, a chi hi. Aman, “Hilou e. Hiai ah ka si ding,” a chi hi. Benaiah in, “Joab in huchi in a hon na dawng hi” chi in kumpipa kiang ah thu a tun nawn hi.

³¹Kumpipa’n a kiang ah, “A chih bang in hih inla, va sual inla, vui in, a ziak om hetlou a Joab in sisan a suahna apan kei leh ka pa inkawte na hulsak theihna din, a chi hi.

³²Amah sang a kizenzaw leh hoihzaw mi nih, Ner tapa Abner, Israelte sepaih heutu leh Jether tapa Amasa, Judahte sepaih heutu ka pa David theihlouh a sual a, namsaua a thah ziak in Toupa’n a sisan a lu tung ah a kiksak nawn ding hi.

³³huaiziak in, a sisan uh Joab lu tung leh a suante lu tung ah tangtawn in a kiknawn dia; David leh a suante leh a inkawte leh a mangtutphah tung ah TOUPA apan lungmuanna tangtawn in a om nilouh ding” a chi hi.

³⁴Huchi in, Jehoiada tapa Benaiah va hohtou in a vasual a, a thatta hi. Huchi in gamdai ah amah inn mah ah vui in a om hi.

³⁵Kumpipa’n Jehoiada tapa Benaiah sepaihte tung ah a sik in a pang sak hi. Siampu Zadok kumpipa’n Abiathar sik in a pangsak hi.

³⁶Kumpipa’n Shimei a samsaka, a kiang ah, “Jerusalem ah inn kilam inla huai ah teng inla, huai apan koi dangmah ah pawt ken.

³⁷Na pawt ni, Kidron lui na kan ni’n na si ngeingei ding chih thei in. Na sisan nangmah lu tung mah ah a om ding” a chi hi.

³⁸Shimei in kumpipa kiang ah, “A dik hi. TOUPA ka kumpipa’n a gen bang in na sikha in a hihzel ding” a chi hi. Huchi in Shimei Jerusalem ah sawtkuam tak a teng hi.

³⁹Hichi ahi a, kum thum nung in Shimei sikhate lak a nih, Gath kumpipa Maakah tapa Akish kiang ah a taimang uhi. “Ngai in, na sikhate Gath ah a om uh,” chi in Shimei a hilh uhi.

⁴⁰Shimei a thou a, a sabiltung a van a, a sikhate zongdin Gath a Akish kiang ah a hohta hi. Shimei in Gath apan a sikhate a vapi hi.

⁴¹Shimei Jerusalem apan a pawt a, Gath ah a hoh a, a hong kiknawn chi in Solomon a hilh uhi.

⁴²Kumpipa’n Shimei a samsaka, a kiang ah, “Na pawt ni, gam dang a na pawtkhiak ni’n na si ngeingei ding, chi in TOUPA minlou a hon kichiam sak in, k’on theisak ahi kei maw? Nangmah in leng ka kiang ah, Na thugen ka zak a hoih hi, na chi hi.

⁴³Bangdia TOUPA kichiamna leh k’on thupiak zuilou na hia?” a chi hi.

⁴⁴Kumpipa mah in Shimei kiang ah, na lungtang sunggil a gitlouh dan, ka pa David tung a na gamtatdante na thei vek hi. Huchi in Toupa’n na gitlouhna nangmah lu tung ngei ah a kiksak nawn ding.

⁴⁵Kumpipa Solomon vualzawl in a om dia, David mangtutphah TOUPA ma ah tangtawn in hihkip ahi ding” a chi hi.

⁴⁶Huchi in kumpipa’n Jehoiada tapa Benaiah thu a pia hi. Amah a kuan a, a vasual a, a thatta hi. Huchi in gam Solomon khut a hihkip in a omta hi.