Read Paite Chin 1 KUMPIPATE 21 Bible Online

1 KUMPIPATE 21 - Paite Chin bible

1 KUMPIPATE 21

¹Huan, huai thilte nung in hichi ahi a, Jezreel mi Naboth in grephuan a nei a, huai Jezreel ah Samaria kumpipa Ahab inn kiang ah a om ahi.

²Ahab in Naboth kiang ah, “Ka inn kiang a om a hih ziak in anteh louhing huan din na grephuan honpia in. A sik in grephuan hoihzaw k’on pe ding. Ahihkeileh na deihzawk lelah a dangka in aman hun ding k’on pe ding” chi in a gen hi.

³Naboth in Ahab kiang ah, “Ka pu ka pate gou nang k’on pethei hetkei ding” a chi hi.

⁴Jezreel mi Naboth in huchibang thu a kiang a a gen ziak in Ahab ngui leh lungkimlou tak in a in ah a lut hi; ka pu ka pate gou k’on pe thei hetkei ding, a chi bikbek ngal a. Huchi in a lupna ah a lum a, khatlam a nga a, an a ne kei hi.

⁵Huchi in a zi Jezebel a vahoh a, a kiang ah, “Bangchidan ahia na lungsim huchitaka a lungkham a, an na neklouh?” a chi hi.

⁶Aman a kiang ah, “Naboth kiang ah, Na grephuan hon leisak in, ahihkeileh na deihzawk leh a sik in grephuan dang k’on pe ding ka chi hi. Aman, ka grephuan zaw k’on pethei hetkei ding, chi’n a hon dawng a ahi” a chi hi.

⁷A zi Jezebel in a kiang ah, “Israel gam kumpipa na hi ka hia? Thou inla, an ne inla, lungsim nuamtak in om in. Jezreel mi Naboth grephuan ken k’on pe ding” a chi hi.

⁸Huchi in Ahab min in laithonte a gelh a, Ahab chiamtehna in a chiamteh hi. Hiai laithonte Naboth invengte a upate leh makaite kiang ah a khak hi.

⁹Laithonte ah, “An ngolh na phuang unla, mipi lak ah Naboth makai sak un.

¹⁰Belial tate mi nih a ma ah tusak unla, Nang Pathian leh kumpipa na gensia hi, chi a amah hek ding mi a na bawl un. Huchi in amah paw khia unla, suang in a na denglum un” a chi hi.

¹¹A tenna khua a upate leh makaite’n Jezebel in a kiang ua a khak laithon a kigelh bang in a na hihta uhi.

¹²An ngolh a phuang ua, mipi lak ah Naboth a makai sak uhi.

¹³Belial tate mi nih hongpai in a ma ah a va tu ua; Belial tate’n mipite ma ah, Naboth in Pathian leh kumpipa a gensia, chi in amah a hek uhi. Huchi in khua apan a pawkhia ua, suang in a deng ua, a sita hi.

¹⁴Jezebel kiang ah, Naboth suang in a deng ua, a sita chih hilh din mi a sawl uhi.

¹⁵Jezebel in Naboth suang in a deng ua, a sita chih a zak in hichi ahi a, Jezebel in Ahab kiang ah, “Thou inla, Jezreel mi Naboth grephuan, a hon leisak phallouh neita aw le. Naboth a dam nawnta kei, a sita hi” a chi hi.

¹⁶Ahab in Naboth a sita chih a zak in hichi ahi a; Jezreel mi Naboth grephuan nei dia kuansuk din Ahab a thouta hi.

¹⁷TOUPA thu Tishbi mi Elijah kiang ah a hongtung a;

¹⁸“Thou inla, Samaria khua a om Israel kumpipa houpih din hohsuk in. Ngai in, Naboth grephuan ah a om a, neihtum in huai ah a hohsuk hi.

¹⁹A kiang ah, TOUPA’N hichi in a chi. ‘Na that a, na neihsak behlap lai maw? chi inla, a kiang ah, TOUPA’N hichi in a chi, Ui in Naboth sisan a liahna mun mah ah nang sisan leng a liak ding uh’ ” na chi ding a chi hi.

²⁰Ahab in Elijah kiang ah, “Na hong muta maw, ka melmapa?” a chi hi. Aman a dawng a, “Hon muta keive, TOUPA’N mitmuh a thil hoihlou hihdia nang leh nang na kikhot khiattak ziak in.

²¹Ngai in na tung ah thil hoihlou ka tungsak dia, na suante ka lamang dia, Ahab apan a ta pasal taphot Israel gam a mi zalen hi in zalen lou hita leh ka satkhe ding hi.

²²Nang n’on hehsak ziak in leh Israelte thil na hih khelhsak ziak in Nebat tapa Jeroboam inkawte leh Ahijah tapa Baasha inkawte bang mai in na inkawte ka bawl ding, a chi hi.

²³Jezebel tungtang thu leng TOUPA’N a gen a, Jezebel khaw kulh chin ah uite’n a ne ding uh.

²⁴Ahab inkawte lak a mi khopi a si peuhmah uite’n a ne ding ua; gam a si peuhmahte tung a leng vasate’n a ne ding uh” a chi hi.

²⁵A zi Jezebel tohthoh a TOUPA mitmuh a thil hoihlou hihdia amah leh amah kikhawng khia Ahab bang mi kuamah a omkei hi.

²⁶TOUPA’N Israel suante ma a delhkhiaksa Amorte thilhih chi teng bang in milimte bia in thil kihhuaitak a hih hi.

²⁷Ahab in huai thu a zak in hichi ahi a, a puan a botkek a, saiip puan a silh hi. An a ngawl a, saiip puan ah a lum a, kidawmtak in a pai hi.

²⁸TOUPA thu Tishbi mi Elijah kiang ah a hongtung hi.

²⁹“Ka ma a Ahab a kiniamkhiak dan na mu hia? A kiniamkhiat ziak in a damsung in hiai thil hoihlou ka tungsak kei dia, a tapa damsung in bel a inkawte tung ah hiai thil hoihlou ka tungsak ding” a chi hi.