Read Paite Chin 1 KUMPIPATE 3 Bible Online

1 KUMPIPATE 3 - Paite Chin bible

1 KUMPIPATE 3

¹Huan, Solomon in Aigupta kumpipa Pharo toh kizolhna a bawl hi. Pharo tanu a kitenpih a, amah inn leh TOUPA inn a lamkhit ma leh Jerusalem kulh a umsuak masiah David khopi ah a omsak hi.

²Mipite kia munsangte ah a kithoih ua, huai ma in TOUPA min adia inn a kilam nai takdih louh ziak in.

³Solomon in TOUPA a it a, a pa David thusehte a zui a; mun sangte a kithoih in, gimlimte kia a na hal hi.

⁴Kumpipa kithoih din Gibeon khua ah a hoh hi. Huai lah mun sang poimawhtak ahi ngal a. Solomon in huai maitam tung ah haltum thillat sang khat a lan hi.

⁵Gibeon ah zan in Solomon kiang ah a mang in TOUPA a hong kihil hi. Pathian in a kiang ah, “Ngen in, bang ahia k’on piak ding?” a chi hi.

⁶Solomon in, “Na sikha, ka pa David na mitmuh a thutak leh diktatna leh lungtang diktak pua a om bang in, nang a kiang ah hehpihna thupi mahmah na langsak hi. Nang hiai hehpihna thupi mahmah amah adin na guang a, nang a mangtutphah a tu ding tapa na pia a, tuni a a hongom petmah bang in.

⁷Aw TOUPA, ka Pathian, Nang na sikha, ka pa David sik in kumpipa in n’on bawlta hi. Kei zaw naupang lel ka hi a; thu tunglam leh pawtlam leng ka theikei hi.

⁸Na sikha, na mitelte, mi tampi, a tam ziak ua simseng vual louh leh a zah theihseng vuallouhte lak ah a om hi.

⁹huaiziak in, na mite vaihawmsak din na sikha theihsiamna lungtang pia in, huchi a a sia leh a pha ka khenkak theihna din. Na mi hiai zah zouzai kuan ahia vaihawm sak thei ding?” a chi hi.

¹⁰Solomon in huai ngen a, a thugen in TOUPA a kipaksak hi.

¹¹Pathian in a kiang ah, “Na damsawtna ding, nang adia hauhsaknate, na melmate sihna ding ngenlou a, vaihawm siamna dia theihsiamna na nget zawk ziak in;

¹²Ngai in, na nget bang in ka hihta hi. Ngai in, pilna leh theihsiamna lungtang k’on pia hi. Huchi in, na ma ah nang bang kuamah a omkei ua, na nungchiang in leng nang bang kuamah a hong omkei ding.

¹³Na nget louh, hauhsakna leh zahtakhuaina leng k’on pelai hi. Huchi in na damsung in kumpipate lak ah nang bang a omkei ding uh.

¹⁴Na pa David in a zuih bang a ka thusehte leh ka thupiakte zui dia ka lampite a na pai leh k’on damsawt saklai ding” a chi hi.

¹⁵Solomon a khanglou a, ngai in, mang a na hi. Huchi in Jerusalem ah a hoh a, TOUPA thukhun bawm ma ah ading a, haltum thillat leh lemna thillatte a lan a, a sikhate tengteng adin Ankuang a lui hi.

¹⁶Kizuak numei nih kumpipa kiang ah a hong ua, a ma ah a va ding uhi.

¹⁷Numei khat in, “Aw ka toupa, hiai numei toh inn khat a teng khawm ka hi ua; huai inn a amah toh ka omlai un nau ka nei hi.

¹⁸Hichi ahi a, ka nau neih nung ni thum ni’n hiai numei in leng nau a neisam hi. Omkhawm ka hi ua; huai inn a om koute gellou, kuamah mikhual om a omkei hi.

¹⁹Zan in hiai numei ta a na si a; aman a delhlup khak ahi.

²⁰Zanlai in a thou a, na sikhanu a ihmut kal in, ka sik a ka tapa a na la a, a pom a, a ma ta sipen ka ang ah a na sial hi.

²¹Zingsang a ka ta nawi pedia ka thoh leh, ngai in, a na sikhin hi. Himahleh zingsang a ka etchet leh ngai in, ka suan ka tapa pen a na hi kei” a chi hi.

²²Numei dang in, “Hilou e. A hingpen ka tapa ahizaw, a sipen na tapa ahi” a chi hi. Khat in, “Hilou, a sipen na tapa ahi, a hingpen ka tapa ahi,” a chi chiltel hi. Huchibang in kumpipa ma ah a gen tuaktuak uhi.

²³Kumpipa’n, “Khat in, a hingpen ka tapa ahi a, a sipen na tapa ahi,” a chi hi. Khat pen in, “Hilou, a sipen na tapa ahi, a hingpen ka tapa ahizaw, a chizel hi,” a chi hi.

²⁴Kumpipa’n, “Namsau hon valak un,” a chi hi. Huchi in namsau kumpipa ma ah a honla uhi.

²⁵Kumpipa’n, “Naungek hingpen tumnih suah unla, a kimkhat khat pia unla, a kimkhat a dang nu pia un, a chi hi.

²⁶Naungek hingpen nu in a ta a lainat mahmah ziak in kumpipa kiang ah, “Aw ka toupa, naungek hingpen amah pemai in, that mahmah ken” a chi hi. Khatpen in, “Kei a hituan kei henla, nang a leng lah hituan kei heh. Himahleh tumtan hi hen” a chi hi.

²⁷Huchi in, kumpipa’n a dawng a, “Naungek hingpen amah pia un, that kei un. Amah a nu ahi” a chi hi.

²⁸Israel tengteng in huai thu a kumpipa thukhen dan a naza ua; kumpipa a lau uh. Vaihawm din Pathian pilna amah ah a om chih a thei uhi.