Read Paite Chin 1 KUMPIPATE 4 Bible Online

1 KUMPIPATE 4 - Paite Chin bible

1 KUMPIPATE 4

¹Huchi in Kumpipa Solomon Israel tengteng kumpipa ahi.

²Hiai a milian neihte ahi uh: “Zadok tapa Azariah siampu ahi.

³Shisha tapa Elihoreph leh Ahiah Laigelhmi ahi uh. Ahilud tapa Jehosaphat tanchin gelhmi ahi.

⁴Jehoiada tapa Benaiah sepaih heutu ahi a; Zadok leh Abiathar siampu ahi uh.

⁵Nathan tapa Azariah heutute tung a mi ahi a; Nathan tapa Zabud siampu leh kumpipa lawm ahi khawm hi.

⁶Ahishar inn sung lam heutu ahi a; Abda tapa Adoniram phutluih a nasemte heutu ahi.”

⁷Solomon in Israel tengteng tung ah heutu sawmlehnih a nei hi. Huaite’n kumpipa ading leh a inkawte adin nek leh tak a ngaihtuah zel uh. Mi khat in kum khat in kha khatzel nekding tak ding a pezel hi.

⁸Hiaite a min uh ahi: “Ephraim tang gam ah Benhur.

⁹Makaz, Shaalbim, Beth-shemesh leh Elon bethhanan ah Ben deker ahi.

¹⁰Arutboth ah Benhesed ahi a, aman Sokoh leh Hepher gam teng leng a tangkhawm hi.

¹¹Dor gam tengteng ah Ben Abinadab ahi a, aman Solomon zi tanu Taphath zi in a nei.

¹²Tanak khua leh Meggiddo khote, Jezreel khaw nuai, Zarethan khochin a om Beth shean bial teng ah, Beth shean apan Abel meholah, Jokmeam gam bul tan in Ahilud tapa Baana ahi.”

¹³“Ramoth Gilead ah Ben Geber ahi a, aman Manasseh tapa Jair khote, Gilead gam a omte a tang khawm hi. Bashan gam a Argob bial, khua thupi taktak sawmguk, kulh leh a kalhna daltawn neite leng a tangkhawm hi.

¹⁴Mahanaim ah Iddo tapa Ahinadab ahi.

¹⁵Naphtali ah Ahimaaz ahi a, aman leng Solomon tanu Basemath zi in a nei hi.

¹⁶Asher leh Bealoth khua ah Husai tapa Baanah ahi a;

¹⁷Issakar ah Paruah tapa Jehosaphat;

¹⁸Benjamin ah Elah tapa Shimei

¹⁹Amorte kumpipa Sihon leh Bashan kumpipa Og gam, Gilead gam ah Uri tapa Geber ahi a, Amah huai gam heutu omsun ahi.”

²⁰Judahte leh Israelte tuipi piau a piaunel zah mahmah in a tam ua, a ne un a dawn ua, nuamtak in a om zel uhi.

²¹Solomon in lui apan Philistiate gam leh Aigupta gamgi pha in gam teng ah vai a hawm hi. Thilpiakte a hon tawizel ua, Solomon damsung teng a na a sem uhi.

²²Solomon ni khat annek, tangbuang nel mahmah pawt a sawmthum leh tangbuang pawt a sawmguk;

²³Bawngtal thau tak sawm, gam a bawngtal sawmnih leh belam za khat ahi uh. Hiaite lou leng sakhite, sangaite, sakhital, ak vakthaute leng ahilai uhi.

²⁴Luigal khenlam gam teng, Tiphsah apan Gaza tan, luigal khenlama kumpipate tung ah a lal hi. A kimvel a miteng toh kilem in a om hi.

²⁵Solomon damsung in Judahte leh Israelte Dan apan Beer — sheba tan in michih amau grep leh theipi chinna nuai ah bittak in a teng chiat uhi.

²⁶Solomon in kangtalai kai sakol sing li leh sakol tungtuang mi sing khat leh sang nih a nei hi.

²⁷Hiai heutute’n amau tankha kha in Solomon leh kumpipa Solomon dohkan hongum teng nekding a pia ua, piak kimlouh a nei ngeikei uh.

²⁸Michih in a hih dia seh bang dungzui in a omna ding mun ah sakolte leh gan taihat mahmahte adin barli buh leh buhpawlte a honpua uhi.

²⁹Pathian in Solomon pilna leh theihsiamna thupi mahmah leh lungsim letna tuipi piau a piaunel bang mai a pia hi.

³⁰Solomon pilna in suahlam ta tengteng pilna leh Aigupta mite pilna tengteng a khupvek hi.

³¹Mi tengteng sang in a pilzaw a, Mahol tate, Ezrah mi Ethan, Heman, Kalkol leh Darda sang in leng. Huchi in a kim a nam tengteng lak ah a min a thangkheta hi.

³²Paunak sang thum a gen a, a late sang khat leh nga ahi uh.

³³Sing tanchin, Lebanon tang a Sidar sing apan kulhbang a hong selkhia hussop tan in a gen hi. Gamsate tanchin, vasate tanchin, bokvak a paite tanchin leh ngasate tanchin leng a gen hi.

³⁴Huchi in Solomon pilna ngaikhe din a pilna zasa lei a kumpipa teng a hongpai uhi.