Read Paite Chin 1 KUMPIPATE 5 Bible Online

1 KUMPIPATE 5 - Paite Chin bible

1 KUMPIPATE 5

¹Huan Tura kumpipa Hiram in Solomon kiang ah a sikhate a sawl hi. A pa mun ah kumpipa in amah thau a nilh uh chihlah a na zata ngal a. Hiram in David a it gige him ahi.

²Solomon in mi sawl in Hiram kiang ah,

³“Ka pa David in TOUPA’N a khepek nuai a a koih masiah a kimvel a munchih mualchih a kidounate ziak a TOUPA a Pathian min adia inn a lam theihlouh dan na thei hi.

⁴Tuin TOUPA ka Pathian in munchih mualchih ah muanna a hon neisakta hi. Melma leh vangsiatna leng a omkei hi.

⁵Ngai dih, TOUPA’N ka pa David kiang ah, ‘Na tapa na sik a na mangtutphah ka luahsak ding in ka min adin inn a honlam ding, chi a a na gensa bang in, TOUPA ka Pathian min adin inn lam ka tum hi.’

⁶huaiziak in, tuin Lebanon tang a sidar singte hon phuksak din thupia inla, ka sikhate leng na sikhate lak ah a hong telsam ding ua, na sikhate loh ahihleh na chih peuhmah k’on pe ding. Zidon mite bang a sing phuksiam ka lak uah kuamah a omkei uh, chih na theingal a” chi in a gensak hi.

⁷Hichi ahi a, Hiram in Solomon thu a zak in a kipak mahmah hi. “Hiai mi tampi tung a vaihawm dia tapa piltak David pepa TOUPA tuni in phat in om hen” a chi hi.

⁸Huchi in Hiram in Solomon kiang ah, “N’on thukhah ka naza hi. Sidar sing thu leh meilah sing thu na deih peuhmah ka hih ding.

⁹Ka sikhate’n Lebanon tang apan tuipi pha in a hon lasuk ding uh. N’on mun sehsak a tuipi a tolh din ka gaklomsak ding hi. Huai ah ka phelsak dia, nang nana la ding hi. Nang leng ka inkawte nekding tum in ka deih n’on hihsak sam ding” chi in mi a sawl hi.

¹⁰Huchi in, Hiram in sidar sing leh meilah sing Solomon deih teng a pia hi

¹¹Solomon in Hiram inkawte nek din buh pawt a sing nih leh sathau suk pawt a sawmnih a pia hi. Hiai Solomon in kumtenga Hiram a piak dan ahi.

¹²TOUPA’N a chiam bangtak in Solomon pilna a pia hi. Hiram leh Solomon kikal ah kilemna a om a; a nih un kilemna thukhun a bawl uhi.

¹³Kumpipa Solomon in Israel tengteng lak a phutluih nasemmi a bawl a; amau mi sing thum ahi uh.

¹⁴Lebanon ah kha khat a kikheng zel in sing khat a sawl zel hi. Kha khat Lebanon ah a om ua, kha nih amau in ah. Adoniram phutluih nasem mite heutu ahi

¹⁵Solomon in thilpawmi sing sagih leh suang sekmi sing giat tangte ah a nei hi.

¹⁶Huaite simlouh in Solomon in a nasep tung a heutu tuam, nasep vengmi sang thum leh za thum a neilai hi.

¹⁷Kumpipa thupiakin inn suangphum dia lepdin suang lian pipi, suangmantam pipi leh suang seksa a honpua uhi.

¹⁸Inlammite, Solomon mite leh Hiram mite leh Gebal mite’n suangte a sek ua, huai inlamna din sing leh suangte a bawl uhi.