Read Paite Chin 1 KUMPIPATE 6 Bible Online

1 KUMPIPATE 6 - Paite Chin bible

1 KUMPIPATE 6

¹Huan, hichi ahi a, Israel suante Aigupta gam apan a pawt nung uh kum za li leh sawmgiatna kum, Israelte tung a Solomon a lal kum lina, Ziv kha, kha nihna in TOUPA inn lam apan uhi.

²Solomon in TOUPA adia a inlam a dunglam tong sawmguk ahi a, a vailam tong sawmnih ahi, a sanlam tong sawmthum ahi.

³Huai inn a Mun Siangthou malam a inlim a vailam tan tong sawmnih a sau ahi a, a malam a pen a vailam tong sawm ahi.

⁴inn adin tohlet neuchik vathang kalh om in a bawl hi.

⁵Huai inn bang kimvel leh biakin bang kimvel in biakin mun bang kimvel leng huai inn bangsi in inn chial nei a lam hi.

⁶A kimvel in dantan a bawl a; a chial nuainung pen a vailam tong nga ahi a, a lai a pen a vailam tong guk ahi. A thumna a vailam tong sagih ahi. Kalvaite ahihleh inn bang a kigolh a kiphamoh kei. Inn pawlam ah a kimvel in bang ah a kingakna a kibawl ziak ahi.

⁷Huai inn a lamlai un suang a laihna mun a seksa vek a bawl ahi. Huchi in a lamsung un sek ging, heipi ging leh sik vangzat ging huai inn ah zak ahi kei hi.

⁸Dantan laita pente kongpi huai in taklam pang ah a om a; a laita ah kahna kivial in a kahtou ua, a laita apan a thumna ah.

⁹Huchi in huai inn a honlam a a zou a, inn bel sidar inkam leh a pek in a khuh hi.

¹⁰Inchial neite a kisituah vek in tong nga chiat a sang in a lam a; huaite in toh sidar sing a peh ahi.

¹¹Solomon kiang ah TOUPA thu a hongtung hi.

¹²Hiai inn na lam laitak tung tangthu, ka thusehte na pom a, ka vaihawmte na zuih a, ka thupiak tengteng zui dia na pom peuhmah leh, na pa David kiang a ka gensa, huai ka thu na tung ah ka hihkip ding.

¹³Israel suante lak ah ka teng dia, ka mi Israelte ka limsaklou kei ding, a chi hi.

¹⁴Huchi in, Solomon in huai inn a lam a, a zouta hi.

¹⁵Inn sung lam bang din sidar singpek a zang a; a pialkhang apan a tunglam bang pha in asung lam ah sing a belhvek hi. A pialkhang din meilah singpek a phah beh hi.

¹⁶inn phaitam lam tong sawmnih pen pialkhang apan bangte tan in sidar singpek vek in a bawl a; biakna mun, Mun Siangthou pen adin leng a sunglam ah a zang hi.

¹⁷Huai inn, a malam a biakin a dung lam tong sawmli ahi.

¹⁸Huai inn sunglam ah a pakmum leh a pakpalh limgelh kilawm sidar sing a khuak a om a; avek in sidar singvek ahi a; suang himhim muh ahi kei hi.

¹⁹TOUPA thukhun bawm koihna din huai inn sung ah biakna lam ah mun a bawl hi.

²⁰Huai, biakna mun sung a dunglam tong sawmnih, a vailam tong sawmnih, a sanlam tong sawmnih ahi a, dangkaeng hul ngen in a luan a; sidar sing a bawl maitam leng a luan hi.

²¹Huchi in, Solomon in huai inn sung dangkaeng hul ngen in a luan a; biakna mun malam dangkaeng khainiang in a daikaih a; huai dangkaeng in a luan hi.

²²Huai in avek a a zohpha in a pumpi in dangkaeng in a luan tawmtawm hi. Biakna mun maitam pumpi leng dangkaeng in a luan hi.

²³Biakna mun ah tong sawm tuaktuak a sang, Cherub nih olive sing in a bawl hi.

²⁴Cherub kha khatpen tong nga ahi a, Cherub kha langkhat pen tong nga mah ahi. A kha mong khat apan a kha langkhat mong kikal tong sawm ahi.

²⁵Cherub khat pen leng tong sawm ahi a; Cherubte a kikim geih a, a kibang geih uhi.

²⁶Cherub khat sanlam tong sawm ahi a, Cherub khat pen leng huai toh kikim mah ahi.

²⁷Cherubte inn sunggil zaw ah a koih a; cherubte kha a kizak a, khat kha in bang lang khatlam a va khoih a, Cherub khat pen kha in leng bang langkhat a khoihsama; huai inn laitak ah a kha uleh a kha uh a ki hihkha uhi.

²⁸Huai cherubte dangkaeng in a luan hi.

²⁹inn bang tengteng a kimvel in cherubte, tumsing leh pak palh limte gelh kilawm inn sunglam leh pawlam ah a bawl hi.

³⁰A inn pialkhang sunglam leh pawlam dangkaeng in a luan hi.

³¹Biakna mun lutna din olive sing kongkhak a bawl a; kongpi lutung leh kongpi biangte a bang seh nga suah seh khat chiat ahi.

³²Huchi in, olive sing inn kongkhak nih a bawl a; huai ah cherubte tum sing leh pak palh limte gelh kilawm in a bawl hi. Huai dangkaeng in a luan a; cherubte leh tum singte dangkaeng in a luan hi.

³³Biakin lutna din a bang seh li suah seh khat chia in olive kongpi khuam a bawllai hi.

³⁴Meilah sing kongkhak nih toh; kongkhak khat a pek nihte kheptheih ahi a, kongkhak khat pen a pek nih leng kheptheih ahi.

³⁵Huaite ah cherubte tum sing leh pak palh limte a gelh a; huai gelh kilawm mamtakin dangkaeng in a luan hi.

³⁶Biakin huangsung intual sung gilzaw pen suangsek chial thum leh sidar singpek thuah khat in a bawl hi.

³⁷A kum lina, Ziv kha in TOUPA inn suangphum lepkhit ahi.

³⁸A kum sawm leh khatna, Bul kha, kha giatna in huai inn zuih ding bangbang a, bangkim mansa vek ahi. Huchi in kum sagih sung a lam hi.