Read Paite Chin 1 KUMPIPATE 7 Bible Online

1 KUMPIPATE 7 - Paite Chin bible

1 KUMPIPATE 7

¹Huan, Solomon in a inn kum sawmlehthum a lam a, huchi in a inn teng a lamzou vekta hi.

²Lebanon gammang inn, khuamvual li, khuam tung a sidar singpek tung ah a lam a; a dunglam tong za khat ahi. A vailam tong sawmnga ahi a, a sanlam tong sawmthum ahi.

³Huai khuam a kinga dantan sawmli leh nga tunglam ah sidar singphel a khuh ahi a; vual khat ah sawmlehnga zel ahi.

⁴Vual thum ah tohlette a om a, vak leh vakte bel vual thum in a kigalsai vek uhi.

⁵Kongkhak leh khuam tengteng singpek a ning li nei a bawl ahi a, vak leh vakte vual thum in a kigalsai vek uhi.

⁶Inlim khuam nei a bawl a; a dunglam tong sawmnga ahi a, a vailam tong sawmthum ahi. Huaite ma ah inlim a bawl a; a khuamte leh a ma a lutna tung kah toh.

⁷A vaihawmna ding mangtutphah inlim, vaihawmna inlim, a vaihawmna ding a bawl hi. Huai pialkhang langkhat apan langkhat pha a sidar sing a khuh ahi.

⁸A ma tenna din, inn lim nung a, huangsung intual dang nei om pen huchi mah bang a bawl ahi. Huai inlim mah bang in Pharo tanu Solomon in zi a a neih in a lamsak lai hi.

⁹Hiai tengteng suang manpha pipi, a hun geihgeih a sek zel suang, atna a at a lam ahi. Sunglam leng, pawlam leng a suangphum apan a lek pha in. Huchi mah bang in pawlam ah huangsung intual lianpi tanpha in.

¹⁰Suangphum suang manpha pipi, suang lian pipi, suang tong sawm leh suang tong giatte a lep ahi.

¹¹Huai tung lam ah suang manpha pipi, suang a hun geihgeih zel a sek leh sidar sing ahi.

¹²A kimvel in huangsung intual lianpi suangsek chial thum leh sidar singpek thuah khat a um ahi. TOUPA inn huangsung intual sunggil zaw leh inn inlim mah bang in.

¹³Kumpipa Solomon in Tura khua apan mi sawl in, Hiram a sam hi.

¹⁴Huai mi Naphtali nam meithai tapa ahi, a pa Tura khua mi, dalsekmi ahi. Amah dalseklam himhim ah a pil in a theihsiam in a khutsiam petmah hi. Kumpipa Solomon kiang ah a hoh a, a na tengteng a sepsak vek hi.

¹⁵Dal khuam nih, tong sawmlehgiat a sang; a kimvel a teh a tong sawmlehnih a lian tuaktuak a bawl hi.

¹⁶Khuam lu a koih ding dalsun bawk nih a bawl a; bawk khat sanlam tong nga ahi a, bawk khat pen sanlam tong nga mah ahi.

¹⁷Khuampite dawn ah lubawkte gial im iam leh kihek ngin ngian a om a; hiai lubawk kisuangsawn bel khainiang kiphan sagih, bawk khat pen adin leng sagih mah a kituam ahi.

¹⁸Huchi in khuamte a bawl a; khuam lu a bawkte tuamna din gial im iam khat tung ah a kimvel vual nih a om a; huchi mah bang in khat tung ah leng a omlai hi.

¹⁹Inlima khuamdawna bawk ah lili lim a tuanga, huai tong li ahi.

²⁰Khuam nih dawna bawkte gei ah gial im iam kiang ah theibuhfaite a om a; theibuhfaite bel huai bawkte ah za nih tuaktuak a volh in a om uhi.

²¹Biakin inlim ah khuamte a dingsak a; taklam khuam a dingsak a, a min Jakin a sa a; veilam khuam leng a dingsak a; a min Boaz a sa hi.

²²Khuamte dawn ah lili lim a tuang a; huchi in khuam lam nasep teng zoh siang ahita.

²³Dal tuibem lianpi, tong sawm, a sanlam tong nga asung a; a gei tong sawmthum kimkot ahi.

²⁴A gei nuai ah pakmum lim in a kimvel vek a, tong sawm ahi a, tuibem kimvel in a om hi. Huai pakmumte vual nih in a om ua, sun khawm pah ahi.

²⁵Huai bawngtal sawmlehnih tung ah a kinga a, thum in mallam a nga ua, thum in tumlam a nga ua, thum in simlam a nga ua, thum in suahlam a nga uhi. Tuibem a tung uah a kitung a, a mei lam un a sunglam a doh hi.

²⁶Khutpek chia a sah ahi a; a gei lili pak bang, nou gei bang a bawl ahi. Bath sang nih takna ahi.

²⁷Tun sawnna sawm dal in a bawl a; tunsawnna khat saulam tong li ahi a, a vailam tong li mah ahi a, a sanlam tong thum ahi.

²⁸Tunsawnna bawl dan hichibang ahi. Huai in kuak a nei a, huai kuakte a geite kikal ah a om hi.

²⁹A geite kikal a kuakte ah humpinelkaite, bawngtalte leh cherubte a tuang a; a gei tungte ah tunsawnna a om hi. Humpinelkaite leh bawngtalte nuailam ah kilawmsaknate a om dindian hi.

³⁰Tunsawnnate ah dal kangtalai li leh dal tung chih a om chiat a; a ning lite ah kingakna a om chiat hi. Kisilna nuai lam ah a kingakna sun a om a, a sik chiat ah kilawmsakna a omchiat hi.

³¹Valh gongsung tong khat ahi; a kam kimvel valh bang a bem ahi a, tong khat leh a kim ahi. A kam gei kimvel gial kilawm ahi a, a kuakte ning li ahi a, a bem kei uh.

³²Kangtalai lite a kuak nuai lam ah a om ua; kangtalai tungchihte tunsawnna ah a om uh. Kangtalai sandan tong khat leh a kim ahi.

³³Huai kangtalaite bawldan sakol kangtalai khe bawldan bang ahi a; a tungchihte, a valhte, a sutkalhnate leh laibawkte avek a sun ahi.

³⁴Tunsawnna ning li chiat ah kingakna li a om a; huai kingaknate tunsawnna toh pumkhat vek ahi uh.

³⁵Tunsawnna tung ah valh, tong kimkhat a sang a om a; tunsawnna tung a a tunna khete leh a kuakte pumkhat vek ahi.

³⁶A tunna khepekte leh a kuakte ah a zat bangbang in cherubte, humpinelkaite leh tumsingte a tuangsak a, a kimvel in kilawmsakna a om dindian hi.

³⁷Huchibang vek in tunsawnna sawm a bawl a; avek in pumkhat a sun ahi chiat ua, kikim chiat, bawldan kibang geih ahi chiat uh.

³⁸Kisilna bel sawm dal in a bawl a; kisilna bel khat in bath sawmli a dong a; kisilna bel tong li chiat ahi uh. Tunsawnna sawm tung ah kisilna bel khat a kitung chiat hi.

³⁹Tunsawnnate inn taklam pang ah nga a tung a, inn veilam pang ah nga mah. Tuibem pen inn taklam pang ah suahlam ah simlam nga in a tung hi.

⁴⁰Hiram in kisilna belte, vutluahte, maiphiatkuangte a bawl a, huchi in, TOUPA inn adia Solomon a bawlsak teng a zousiangta hi.

⁴¹Khuam nihte, khuam dawn a bel bang a bawk nihte, khuam dawn a bel ban a bawk nih tuamna gial im iam nihte,

⁴²tuamna gial im iam nih adia theibuhfai za lite, khuam dawn a bel bang a bawk nih tuamna ding gial im iam tuaktuak adia theibuhfai vual nihte;

⁴³tunsawnna sawm leh tunsawnna tung a kisilna bel sawmte;

⁴⁴tuibem khat leh tuibem nuai a bawngtal sawmlehnihte,

⁴⁵belte, vutluahte leh maiphiatkuangte toh. Tuium-belsuan tengteng TOUPA inn adia Hiram in kumpipa Solomon a bawlsak dal nawttet a bawl vek ahi.

⁴⁶Jordan phaizang ah Sukkoth leh Zarethan kikal a bellei omna ah hiai teng kumpipa’n asung hi.

⁴⁷Huai tuium-belsuan tengteng a tam mahmah ziak in Solomon in buk khelou in a koih a; dal bukzah pen theihkhiak ahi kei hi.

⁴⁸Solomon in TOUPA inn a tuium-belsuan om tengteng a bawl a; dangkaeng maitam leh tanghou koihna dohkan dangkaeng in a luan hi.

⁴⁹Mun siangthou pen ma a khawnvak koihnate, taklam a nga leh veilam a ngate dangkaeng siang in; pakte, khawnvakte leh taitehte dangkaeng in a luan hi.

⁵⁰Noute, khawnvak puantehnate, maiphiatkuangte, keute leh meilaknate dangkaeng siang in; inn sunggil zaw, Mun Siangthou pen kongkhakte leh inn, biakin, kongkhak bulhnate dangkaeng in a luan hi.

⁵¹Huchi in, kumpipa Solomon in TOUPA inn adia a bawl tengteng a zouvekta hi. Huchi in Solomon in a pa David inn a na latkhitsa dangkachite, dangkaeng leh tuiumbelsuante a lalut a, TOUPA inn a goute lak ah a koihta hi.