Read Paite Chin 1 KUMPIPATE 8 Bible Online

1 KUMPIPATE 8 - Paite Chin bible

1 KUMPIPATE 8

¹Huchi in Solomon in Israel upate, a nam intekpen tengteng Israel suan inkuan intekpente, Jerusalem khua a kumpipa Solomon kiang ah David khopi Zion apan TOUPA thukhun bawm zawngtou din a kaikhawm vek hi.

²Israel mi tengteng Ethanim kha, kha sagihna ah, Ankuangluina ah kumpipa Solomon kiang ah a kikaikhawm vek uhi.

³Israel upa tengteng a hong ua, siampute’n bawm a zawng uhi.

⁴TOUPA bawm leh Kihoupihna Puanin leh puanin a tuium-belsuan siangthou tengteng tan in siampute leh Levi chite’n a zawngtou uhi.

⁵Kumpipa Solomon leh Israel kikaikhawm tengteng a kiang a hong kikhawmte bawm ma ah a omkhawm uh. Belam leh bawngtal a tam ziak a simseng vuallouh leh a zah theih seng vuallouh in a kithoih uhi.

⁶Siampute’n TOUPA thukhun bawm a omna ding, inn sung a biakna mun a Mun Siangthou pen ah cherubte kha nuai ah a lalut uhi.

⁷Cherubte’n bawm omna tungzawn ah a kha uh a zak gige ngal ua, cherubte’n bawm leh a zawnna chiangtawnte a huapvek uhi.

⁸A zawnna chiangtawn a sau mahmah a, a zawnna chiangtawn mongte biakna mun ma, Mun Siangthou apan a muhtheih hi. Himahleh in pawlam ah zaw a dawk kei, tuni tan huai ah a om nilouh hi.

⁹Aigupta gam apan a pawt ua TOUPA Israel suante toh thu a khunlai a Mosi in Horeb tang a suangpek nih a koihte kia louzaw, huai bawm sung ah bangmah dang a omkei.

¹⁰Hichi ahi a, siampute Mun Siangthou apan a hongpawt khiak tak un TOUPA inn meipi in a hong dim meuhmouh hi.

¹¹Meipi ziak in siampute nasem in a om theikei uh. Toupa thupina in TOUPA inn lah a dimsak vek ngal a.

¹²Solomon in thu a gen a: “TOUPA’N, mial bikbek ah ka om ding, a chi hi.

¹³Na tenna din, tangtawn a na om gige na ding inn k’on lamsak petmah hi” a chi hi.

¹⁴Kumpipa a kinunghei a, Israel kikaikhawm tengteng a vualzawl a, Israel kikaikhawm tengteng ading dipdep uhi.

¹⁵Aman, “TOUPA, Israelte Pathian, ka pa David kiang a amah kam mahmah a,

¹⁶Aigupta gam apan ka mi Israelte ka pikhiak ni apan Israel nam lak a koilai khua leng ka min omna ding, inlamna ding ka tel ngeikei hi. Himahleh ka mi Israelte heutu din David ka tel hi, chi a a na genpa, amah khut mahmah a hon pichingsakpa phat in om hen.

¹⁷Ka pa David in Israelte Pathian, TOUPA min dia inlam a lungsim in a na tum hi.

¹⁸Himahleh TOUPA’N ka pa David kiang ah, Na lungsim in ka min adin inn lam na tuma, hichibang lungsim na put na hihhoih hi.

¹⁹Himahleh nang zaw, inn na lam kei ding. Na tapa, na khal a hong pawtkhe ding in ka min adin inn a lamzaw ding, a na chi hi.

²⁰TOUPA’N a thugen a hon hihkip a; Toupa’n a na chiamsa bang ngei in ka pa David mun k’on luah in, Israel mangtutphah ah kongtuta a, Israelte Pathian, TOUPA min adin inn ka na lamta ngei hi.

²¹Huai ah bawm omna ding mun ka na sep a, huai ah Aigupta gam apan a pikhiaklai a i pute uh kiang a a thukhun, TOUPA thukhun a om” a chi hi.

²²Solomon TOUPA maitam ma, Israel hong kikhawm tengteng muh in ading a, vanlam ah a khut a zaktou hi.

²³“Aw TOUPA, Israelte Pathian, na sikha lungtang tengteng na mit muh a omte kiang a thukhun tangtun a hehpihna hihlang zel, na sikha ka pa David kiang a thuchiam tangtunpa, tunglam ah leh nuailam lei ah nang bang Pathian dang a omkei.

²⁴Ahi, nang na kam in thu na gen a, na khut in n’on lohching sakta a, tuni a, a hong omta ngei bang in.

²⁵huaiziak in, aw TOUPA Israelte Pathian, na sikha ka pa David kiang a, na suante ka mitmuh a na om bang a ka mit muh a omsam dia a omdan ua a pilvan peuhmah uleh ka mitmuh in Israelte mangtutphah a tu ding na tatlak kei ding, chi a na chiam tangtun in.

²⁶Aw Israelte Pathian, na sikha ka pa David kiang a thu na gensa hehpih in tungsak in.”

²⁷“Himahleh Pathian lei ah a teng petmah dia hia? Ngai in, van leh vante van a leng talou na hi a; hiai ka inn lam ah naktat tuakkei na tel chia!

²⁸Himahleh TOUPA ka Pathian, tuni a na sikha in a honsapna thumna, a thusam ngaihkhiaksak in, na sikha thumna leh ngetna hon limsak in.

²⁹Hiai mun lamnga a na sikha in thum a a thusam ding ngaikhia a, nang, huai ah ka min a om ding, na chihna mun ngei a, inn lam a sun leh zan in na mit a hah gige theihna ding in.

³⁰Na sikha leh na mi Israelte’n hiai munlam nga a, a hong thum chiang un a ngetnate uh na ngaihkhiak sakzel in. Ahi, na tenna mun, van ah na ngaikhia in; ngaikhia inla, ngaidam in.”

³¹“Mi kuapeuh in a invengte tung ah thil hihkhial in, kichiam sak hial a hong kiphatmoh leh hiai inn a na maitam ma ah hong kichiam henla,

³²Nang van ah na ngaikhia inla, gamtang inla na sikhate vaihawm sak in, migilou pen mawhpaih in a lu tung ah a omdan nga inla, midiktat pen siamtang sak in a diktatna bangbang amah pia in.

³³Na mi Israelte’n na tung a thil a hihkhelh ziak ua melmate lak a a vuallelh ua nang lam a hong ngatnawn ua, na min a phat ua, hiai inn a thum a thil a honnget uleh,

³⁴Nang van ah a na ngaihkhiak sak inla, na mi Israelte khelhna ngaidam inla, a pute uh gam na piak ah pikik nawn in.”

³⁵“Na tung a thil a hihkhelh ziak ua van a kikhak a, vuah a hong zuklouh hun chiang in, hiai munlam nga a hongthum ua, na min a puankhiat ua, amau na bawl gentheih ziak a a khelhnate uh a kisik uleh,

³⁶Nang van ah a na ngaikhia inla, na sikhate leh na mi Israelte khelhna ngaidam inla, a paina ding uh lampi hoih sinsak inla, na mite goutan dia na piak na gam ah vuah zusak in.”

³⁷“Ka gam ua kial a hong kiaka, hipi a honglen a, keuna hiam, muatna hiam, khaukhup hiam, lung hiam a hongom a, a melmate un a kongpi kim ua a hongum ua, hipi khat peuh, chinatna bangpeuh a hongtun leh,

³⁸Na mi Israel tengteng lak a amau lungtang a hipi om a thei a, hiai inn lam nga a khut zankhia a, thumna leh ngetna a honlat uleh;

³⁹Na omna van ah a na ngaikhia inla, ngaidam inla, gamtang inla, nang a lungtang uh theipa, michih a omdan bangbang in lohching sak in; Nang zaw, nangmah kia mihingta tengteng lungtang theipa lah na hi ngal a.

⁴⁰Ka pute uh na piak gam a a ten laiteng uh nang a honlauh theihna ding un.”

⁴¹“Na mi Israelte hilou namdang, na min ziak a gam gamlapi apan hongpaite tungtang thu leng;

⁴²Na min thupi mahmah, na khut hat mahmah, na ban na zak thu a na zachiat ding ahi ngal ua, huaite’n hiai inn lam nga a, a hongthum chiang un,

⁴³Nang na omna van ah a na ngaikhia inla, namdang in a hon nget a na hihsak in. Na mi Israelte bangmah a namchih in na min a theih ua, laudan a hong siam ua, hiai ka inn lam in na minpu ahi chih a hon theihtheihna ding un.”

⁴⁴“Na mite’n a melmate uh na sawlna lamlam ah a dou ua, na khopi tel lam nga leh, na min adia ka lam inn lam nga a, TOUPA kiang a a hong thum uleh,

⁴⁵A thumna uleh ngetna uh nang van ah a na ngaikhia inla, a thu uah gamtang in.”

⁴⁶“Na tung a thil a hihkhelh uleh, kuamah thil hihkhial lou lah a om ngal kei a; a tung ua na hehna, melma gam gamla mahmah hiam, naichik hiam a leng sal a a pi ua;

⁴⁷Sal a a pina gam ua a hong kingaihtuah khiak ua, a kisik ua, thil i na hihkhial hi, diklou tak leh gil mahmah in i na gamtata uh, chi a sal a pimite gam a nang a honnget uleh,

⁴⁸A melma amau sal a pite gam a a lungtang tak uleh a lungsim tak ua nang lam a hong ngat ua, a pute uh na piak gam lam leh na khopi tel lam leh na min adia ka inn lam lamnga a na kiang a a hongthum uleh;

⁴⁹A thumna uleh a ngetna uh nang na omna van ah a na ngaikhia inla, a thu uah gamtang in.

⁵⁰Na mi na tung a thil hihkhialte leh na tung a a na tatlekna uah a tatleknate tengteng uh ngaidam inla; sal a pite’n a hehpih theihna ding un hehpihna neisak in.

⁵¹Na mi na goutan, Aigupta gam apan sik haltuina sung apan na pikhiakte lah ahi uhi.”

⁵²“A honsap chiang ua na ngaihkhiak dia, na sikha ngetna leh na mi Israelte ngetna lam a na mit na hah gige theihna ding in.

⁵³Aw TOUPA Pathian, ka pute uh Aigupta gam apan na pikhiak lai a na sikha Mosi zang a na gen bang in na goutan din khovel namchih lak apan na hihtuam lah ahi ngal ua, a chi hi.”

⁵⁴Hichi ahi a, Solomon in TOUPA kiang a a thumna leh ngetna tengteng a genkhit in, TOUPA maitam ma a khukdin a, vanlam ah a khut zaktou a omlai a thou hi.

⁵⁵A ding tou a, aw ngaihtak in Israel kikhawm tengteng a vualzawl hi.

⁵⁶“A thuchiam tengteng bangzel a, a mi Israelte khawlna pepa TOUPA phat in om hen. A sikha Mosi zang a a thuchiam hoih tengteng thu khat leng a vuaksuak kei, chi in.

⁵⁷TOUPA i Pathian, i pute kiang a, a om bang in i kiang uah om henla; hon paisan in hon donsak lou kei hen.

⁵⁸Huchi in a lampi tengteng tawn ding leh i pipute a na piak khitsa bang a, a thupiakte, a thusehte, a vaihawmte zui dia i lungtangte Amah lam a a ngatsak theihna ding in.

⁵⁹A sikha thu leh a mi Israelte thu ah a ni omdan bangzel a, a gamtat theihna din hiai ka thugen, TOUPA ma a ngetna ka tutte sun leh zan in TOUPA i Pathian ma ah om gige hen.

⁶⁰TOUPA Pathian ahi a, kuamah dang a omkei uh chih khovel a namchih in a theihtheihna ding in.

⁶¹Huchi in a thuseh bang a om ding leh a thupiakte zui din TOUPA i Pathian lam ah na lungtangte uh hoihkim hen, tuni a bang in.”

⁶²Israel tengteng leh Solomon in TOUPA ma ah kithoihna a lan uhi.

⁶³Solomon in TOUPA adia a lat kilemna kithoihna din bawngtal sing nih leh sang nih leh belam nuai khat leh sing nih ahi. Huchibang in kumpipa leh Israel suan tengteng in TOUPA inn a lan uhi.

⁶⁴Huai ni mah in kumpipa’n TOUPA inn ka zawn a intual huangsung laitak a hih siangthou hi. Huai ah haltum thillatte, tangbuang thillatte, kilemna thillat thaute a lan hi. A ziak bel huai haltum thilatte, tangbuang thilatte, kilemna thillat sathaute huai dal maitam a tat zohlouh ziak ahi.

⁶⁵Huchi in, huai hun in Solomon leh Israel tengteng, mipi kikhawm tampi, Hamath lutna apan Aigupta gamlui pha a mite’n TOUPA i Pathian ma ah ni sagih leh ni sagih, ni sawmlehli sung Ankuang a lui khawm uhi.

⁶⁶A ni giat ni’n mipite a kikhen sak a, amau kumpipa a vualzawl ua, huchi in TOUPA’N a sikha David leh a mi Israelte tung a a hoihna huchi lawmlawma a latsak ziak in lungsim nuamsa leh kipak mahmah in a inlam uah a paita uhi.