Read Paite Chin 1 KUMPIPATE 9 Bible Online

1 KUMPIPATE 9 - Paite Chin bible

1 KUMPIPATE 9

¹Huan, hichi ahi a, Solomon in TOUPA inn leh kumpipa inn lam a, lunggulhtaka, a tup tengteng a hih khitvek nung in,

²Gibeon khua a, a kiang a, a kilak bang in TOUPA Solomon kiang ah a hong kilak nawn hi.

³TOUPA’N a kiang ah, “Na thumna leh na ngetna ka ma a n’on tutte ka na ngaikhia hi. Na inn lam tangtawn a ka min omna din ka hih siangthouta hi. Ka mit leh ka lungtang huai ah tangtawn in a omta ding hi.

⁴Nang leng thu k’on piak peuhmah bang a hih dia na pa David a om bang lungtang hoihtakpu leh lungsim diktakpu a ka mitmuh a na om a, ka thusehte leh ka vaihawmte na zuih gige leh

⁵Israelte tung ah na gam mangtutphah tangtawn adin ka hihkip ding a; na pa David kiang a, Israelte mangtutphah a tu ding na tatlak kei ding, chi a ka na chiamsa bang in.

⁶Himahleh nang hiam na suante hiam in n’on zuih uh kiksan a, ka thupiakte leh ka thusehte leh k’on theihsakte pomlou a, pathian dangte nna nasep ua, na biak uleh,

⁷Gam ka piak apan Israelte ka hihmang dia; hiai inn ka min adia ka hihsiangthou sa ka mitmuh phaklouh ah ka suanmang ding. Huchi in Israel nam chihte lak ah enghouna leh a selam gentehna a zat a honghi ding.

⁸Hiai inn sangtawk lehleng, a kiang a pai peuhmah in lamdang sa in a muk uh a hum ding ua, bangdia TOUPA’N hiai gam leh hiai inn hichitel a hih adiam aw? a chi ding uh.

⁹Mite’n TOUPA a Pathian uh, a pute uh Aigupta gam apan pikhepa a paisan ua, pathian dangte a let ua, a biak ua, a nate uh a sepziak uh ahi. Huaiziak in, Toupa’n hiai siatna tengteng a tung uah a tungsakta hi” chi in a dawng ding uh, a chi hi.

¹⁰Hichi ahi a, Solomon inn nihte; TOUPA inn leh kumpipa inn a lamsung kum sawmnih a beinung in,

¹¹Tura kumpipa Hiram in Solomon sidar singte, meilah singte leh dangkaengte a kulteng a tup sakvek ahi, kumpipa Solomon in Galili gam a khua sawmnih Hiram a pia hi.

¹²Solomon in a piak khuate en din Tura khua apan Hiram a pawtkhia a; a va en a himahleh a lungtung kei hi.

¹³Aman, Unaupa aw, hiai n’on khopiakte bangchibang khua a maizen ua? a chi hi. Huchi in tunitan in aman huai khuate Kabul gam a chi hi.

¹⁴Hiram in dangkaeng talent za leh sawmnih kumpipa a khak hi.

¹⁵Kumpipa Solomon in phutluih nasem pawl a bawl nasan hiai ahi: TOUPA inn leh amah inn lam ding leh Millo, Jerusalem kulh, hazor khua, Meggiddo khua leh Gezer khuate bawl ding in ahi.

¹⁶Aigupta kumpipa Pharo a hohtou a, Gezer khua a vala a, a hal a, huai khua a teng Kanaante a that a, a tanu Solomon zi thilpiak in a na pekhinta ngal a.

¹⁷Solomon in Gezer, Bethhoron khangnung zaw,

¹⁸Baalath leh Israel gamdai a Tadmor khuate,

¹⁹Solomon in thil koihkhawmna khua a neih tengteng, a kangtalai koihna khuate, Jerusalem khua leh Lebanon a vaihawmna gamsung tengteng Solomon in lunggulhtaka bawl a tup tengteng a bawl hi.

²⁰Israel suante hilou, Amorte, Hitte, Perizte leh Jebus omsun tengtengte;

²¹a suan uh, huai gam a omlai Israel suante’n a hihman zohvek theihlouhte lak ah Solomon in sikha, phutluih nasem pawl a bawl a, tunitan in a sem lai uhi.

²²Israel suante bel Solomon in sikha in a bawl kei. Galdou mite, a intekpate, a miliante, a sepaih heutute, a kangtalai leh a sakol tung tuang pawl heutute ahizaw uh.

²³Hiaite Solomon nasep tung a heutu tuam, za nga leh sawmnga, nasep veng mite ahi uh.

²⁴Himahleh Pharo tanu bel David khopi apan amah in, Solomon inn a lamsak ah a paitou hi. Huchi in Solomon in Millo a bawl hi.

²⁵Solomon in TOUPA adia a bawl maitam ah kumteng in thumvei haltum thillat leh kilemna thillat a lan a, TOUPA ma a maitam ah gimlimte a hal hi. Huchi in inn a lamzouta hi.

²⁶Kumpipa Solomon in Edom gam a Tuipi San gei Eloth chin a om Ezion-geber mun ah longhon a bawl hi.

²⁷Hiram in a sikha longmite, tuipi a kiseksa, long a Solomon sikhate kiang ah a sawl hi.

²⁸Huai mite Ophir ah a vahoh ua, dangkaeng talent za li leh sawmnih a honpua ua, kumpipa Solomon kiang a hontun uhi.