Read Paite Chin 2 KUMPIPATE 1 Bible Online

2 KUMPIPATE 1 - Paite Chin bible

2 KUMPIPATE 1

¹Huan, Ahab sih nung in Israelte tung ah Moabte a hel uhi.

²Ahaziah Samaria khua a dantan tungnung vathangkalh tohlet apan a kekhia a, a kihihnata hi. Huchi in mi a sawl a, a kiang uah, “Kuan unla, hiai ka natna a hoihkhe nawnthei hiam Ekron khaw pathian Baal zebub va dong un” a chi hi.

³Himahleh TOUPA angel in Tishbi mi Elijah kiang ah, “Thou inla, Samaria kumpipa misawlte houpih din kuantou inla, a kiang uah, Israel gam a Pathian a omlouh ziak in hia Ekron khaw pathian Baal zebub dong dia na hong kuan uh?

⁴TOUPA’N hichi in a chi. Na kahtouna lupna apan na hong kumsuk nawn kei dia, na si ngeingei ding, chi’n vagen in” a chi hi. Huchi in Elijah a kuanta hi.

⁵A mi sawlte a kiang ah a hong kiknawn un a kiang uah, “Bang a chi a ahia na hong kiknawn mawk uh?” a chi hi.

⁶Amau a kiang ah, “Mi khat hong houpih din a hong a, ka kiang uah, Pai unla, nou hon sawlpa kumpipa kiang ah kiknawn unla, a kiang ah, TOUPA’N hichi in a chi, Israel gam a Pathian a omlouh ziak in hia Ekron khaw pathian Baal zebub dong dia na sawl? Huchi in na kahtouhna lupna apan na hong kumsuk nawn kei ding a, na si ngeingei ding, chi’n va hilh un a honchi” a chi uhi.

⁷Aman a kiang uah, “Nou hon houpih dia hong, huai thute hong hilhpa mi bangchibang ahia oi?” a chi hi.

⁸Amau a dawng ua, “Samul puan a kizem ahi a, a kawng savun kawnggak in a gak,” a chi ua; aman “Tishbi mi Elijah eive” a chi hi.

⁹Kumpipa’n sepaih sawmnga heutu, a heute sawmnga toh a kiang ah a sawl hi. A kiang ah a hohtou uhi. Huchi in ngai in, amah mualvum ah a na tu hi. Aman “Nang, Pathian mi, kumpipa’n hong paisuk in, a chi ve” a chi hi.

¹⁰Elijah in a dawng a, sepaih sawmnga heutu kiang ah, “Pathian mi ka hihleh van apan mei hong kesuk henla, nangmah leh na heute sawmnga hong kangmang vek hen” a chi hi. Huchi in van apan mei a hong kia a, amah leh a heute sawmnga a kangmang vek uhi.

¹¹A kiang ah sepaih sawmnga heutu dang, a heute sawmnga toh a sawlnawn hi. Aman a kiang ah, “Nang Pathian mi, kumpipa’n, hong paisuk meng in, a chi ve” a chi hi.

¹²Elijah in a dawng a, a kiang a ah, “Pathian mi ka hihleh van apan mei hong kesuk henla, nang leh na heute sawmnga hong kangmang vek hen” a chi hi. Huchi in Pathian mei van a kipan a hongkia a, amah leh a heute sawmnga a kangmang vekta uhi.

¹³Sepaih sawmnga dang heutu, a heute sawmnga toh a sawl nawn a, huai sepaih sawmnga dang heutu a kuantou a, Elijah ma ah a va khukdin a, a kiang ah, “Pathian mi aw, ka hinna leh hiai na sikha mi sawmngate hinna na mitmuh in manpha hen.

¹⁴Ngai in, van apan mei a hong ke suk a, sepaih sawmnga heutu nihte a heute sawmnga u toh a kang mangta ua; huaiziak in ka hinna na mitmuh in manpha hen” chi’n a ngen hi.

¹⁵Huchi in TOUPA angel in Elijah kiang ah, “Kum suk pih in, amau lau ken” a chi hi. Huchi in a thou a, amah toh kumpipa kiang ah a kum suk khawm uhi.

¹⁶Aman a kiang ah, TOUPA’N hichi in a chi: “Ekron khaw pathian Baal zebub dong dia mite na sawl, Israel gam a dot ding Pathian a omlouh ziak hia? Huaiziak in, na kahtouhna lupna apan na hong kumsuk nawn kei ding a, na si ngeingei ding” a chi hi.

¹⁷Huchi in Elijah in a gen TOUPA thu bang in a sita hi. Tapa a neih louh ziak in Judah kumpipa Jehosaphat tapa Jehoram kum nih a lal kum in Jehoram a sik in a lalta hi.

¹⁸Ahaziah thilhih tanchin dangte Israel kumpipate lal lai thugelhna bu ah a tuang ka hia?