Read Paite Chin 2 KUMPIPATE 10 Bible Online

2 KUMPIPATE 10 - Paite Chin bible

2 KUMPIPATE 10

¹Huan Ahab in Samaria ah tapa sawmsagih a nei hi. Jehu in Samaria a, Jezreel khaw heutute, upate leh Ahab tate a na dontei mite kiang ah, laigelh in a khak hi.

²“Hiai laikhakte na muhphet chiang un, na pu tate na kiang uah a om ua, kangtalaite, sakolte, kulhpi nei khuate leng, galvante toh na nei uhi.

³Huchi in na pu tate lak a mi, a hoihpen leh a kizen pen zongkhia unla, a pa mangtutphah ah tusak unla, na pu uh inkawte adin galdou un” a chi hi.

⁴Himahleh amau a lau mahmah ua, “Ngai dih ua, kumpipa nihte’n a zohlouhsa uh ahi a, en bangchi’n i zou mahmah dia?” a chi uhi.

⁵Kumpipa inn sung heutupen, khopi ukpen, upate, naupangte a na dawnteimi teng in Jehu kiang ah, “Na sikhate ka hi uh, hihdia n’on hilh tengteng ka hih ding uh. Kuamah kumpipa in ka bawl kei ding uh; nang hoih na saksak in hih in” chi in mi a sawl uhi.

⁶A kiang uah, “Kei lam a pang na hih ua, ka thu na man ding uleh na pute uh tapate lu honla unla, zingchiang in hichih hun ma in Jezreel khua ah ka kiang ah hong un,” chi in lai a khaknawn hi. Kumpipa tapate sawmsagih ahi ua, khopi miliante, amau dontei mite kiang ah a om uhi.

⁷Laikhak a muh un hichi ahi a, kumpipa tapate a man ua, a sawmsagih un a that ua, a lute uh bawmpi a koih in Jezreel khua ah a kiang ah a khakta uhi.

⁸Thangkou khat a hongtung a, “Kumpipa tapate lu a hon tawita uh” chi’n a hilh uh. Aman “Kulh lutna kongpi gei ah mun nih in sekhawm unla, zingchiang tan in om hen” a chi hi.

⁹A zingchiang in hichi ahi a, a vapawt a, ading a, mi tengteng kiang ah, “Noute diktat hi un, ngai un, ka pu ka guksawm a, ka hihlumta a; ahihleh hiai tengteng kua thah ahia leh?

¹⁰TOUPA’N Ahab inkawte tungtang a gen, TOUPA thu lei ah a ke hetkei ding chih thei un; Toupa’n a sikha Elijah zang a a gen a hontung sakta hi” a chi hi.

¹¹Huchi in Jehu in Jezreel khua a Ahab inkuan a mi omsun teng, a milian tengteng, a lawm tengteng leh a siampute khat lel leng hawi sak hetlou in a that siang vek hi.

¹²Huchi in a thou a, a pawt a, Samaria ah a hohta hi. Lampi a belampute belam mulmetna in a va tun in,

¹³Jehu in Judah kumpipa Ahaziah unaute a mu a, “Kuate na hi ua?” a chi hi. Amau “Ahaziah unaute ka hi uh, Kumpipa tate leh kumpinu tate chibai vabuk dia paisuk ka hi uh” chi in a dawng uh.

¹⁴Aman, “Hing mat un” a chi a; huchi in a hing mat ua, belam mulmetna in khukchin ah a that ua, mi sawmli leh nih ahi ua; khat lel leng a hawikei uhi.

¹⁵Huai apan a pawt nung in Rekab tapa Jehonadab, amah dawn dia hongpai a mu hi. Chibai a buk a, a kiang ah, “Na tung a lungsim dik ka put bang in, lungsim dik na pu sam hia?” a chi hi. Jehonadab in, “Pu e” chi in a dawng hi. “Ahihleh na khut honpe dih” a chi a; huchi in a khut a pia a, aman a kiang ah kangtalai sung ah a kailut hi.

¹⁶Aman ka kiang ah “Hong sam inla, TOUPA adia phatuam ka ngaihdan mu himhim dih” a chi hi. Huchi in a kangtalai ah a tuangsak hi.

¹⁷Samaria a vatun in Ahab inkawte Samaria a omsunte a hihman khitvek masiah a that zel a, Elijah kiang a a gen TOUPA thu bang ngei in.

¹⁸Jehu in mite tengteng a samkhawm a, a kiang uah, Ahab in Baal na a sem zekphet ahi a, Jehu in bel nakpi’n a sem ding hi.

¹⁹Huchi in Baal zawlnei tengteng, a bemi tengteng leh a siampu tengteng ka kiang ah hon samkhawm dih ua. Kuamah kimlou kei uhen; Baal kiang ah kithoihna thupitak lat ding ka nei a; kuapeuh a kimlou a hing hetkei ding, a chi hi. Himahleh Jehu in Baal bemite hihlup tum in, gitlouh piltak a, a hih ahi.

²⁰Jehu in, “Baal min in khawmpi thupi bawl un” a chi hi. Huchi in a genzakta uhi.

²¹Jehu in Israel gam tengteng ah a khakkhia a; huchi in Baal bemi tengteng a hongpai ua, a tellou himhim a omkei uhi. Baal in ah a lut ua; Baal in kongpi apan a phaitam pha in a dim dipdep uhi.

²²Kivatna puan kemmi kiang ah, “Baal bemi tengteng kivatna puan honla in” a chi hi. Huchi in kivatna puante a honla uhi.

²³Jehu, Rekab tapa Jehonadab toh Baal in ah a lut ua; Baal bemite kiang ah, “Hiai ah Baal bemite loungal, TOUPA mite a omkha ding uh, zong unla, en vialvial dih uh” a chi hi.

²⁴Kithoihnate leh haltum thillatte lan dia a lut un, Jehu in inkuan ah mi sawmgiat a na dingsak khin hi. “Na khut ua k’on piak kuapeuh a suahtak leh, a suaktami hinna tang a amah hinna lak ding ahi” a chi hi.

²⁵Haltum thillat a lat khittak in hichi ahi a, Jehu in galvil sepaih leh a heutute uh kiang ah, “Lut unla, vathat un; kuamah suakta sak kei un” a chi hi. Huchi in namsau in a sat ua; galvil sepaih leh a heutute uh a paikhia ua, Baal inn sung ah a lut uhi.

²⁶Baal in a milimte a lakhia ua, a hal uhi.

²⁷Baal lim a laichim ua, Baal in a hihsia ua, tunitan in dailenbuk in a zanglai uhi.

²⁸Huchibang in Jehu in Israel gam apan Baal a hihsia hi.

²⁹Himahleh Nebat tapa Jeroboam khelhna, Israelte thil a hihkhial sak a, a hihte Jehu in a tawpsan kei hi. Huai bel Bethel khua leh Dan khua a dangkaeng bawngnou limte biak ahi.

³⁰TOUPA’N Jehu kiang ah, “Ka mittung tak a thil na hih ziak leh ka lungsim a deihthusam bangtak a Ahab inkawte tung a na hih ziak in, na tapate suan lina tan in Israel mangtutphah ah a tu ding uh” a chi hi.

³¹Himahleh Jehu in TOUPA, Israelte Pathian dan a lungtang tengteng in a zuikei a; Jeroboam in Israelte thil hihkhial sak a, a hih khelh a tawpsan tuankei hi.

³²Huailai in TOUPA’N Israel gam letdan a neusak panta hi. Huchi in Hazael in Israel gam tengteng ah amau a nuaisiahta hi.

³³Jordan apan suahlam, Gilead gam tengteng, Gadte, Reubente, Manassehte, Arnon guam a Aroer apan Gilead leh Vasan gam tan in.

³⁴Jehu tanchin dangte, a thilhih tengteng, a thilhih theihdan tengteng Israel kumpipate lal lai thugelhna bu ah a tuang kei maw?

³⁵Huchi in Jehu a pi leh pute kiang ah a ihmuta a, Samaria khua ah a vui ua; a sik in a tapa Jehoahaz a honglal hi.

³⁶Samaria gam a Israelte tung a Jehu vaihawm sung kum sawmnih leh giat ahi.