Read Paite Chin 2 KUMPIPATE 11 Bible Online

2 KUMPIPATE 11 - Paite Chin bible

2 KUMPIPATE 11

¹Huan, Ahaziah nu Athaliah in a tapa a si chih a theih in, a thou a, kumpipa tapa tengteng a that vek hi.

²Ahaziah tapa Joash bel kumpipa Jehoram tanu, Ahaziah sanggamnu Jehoseba in kumpipa tapa a thahte uh lak apan pimang in, a donmi toh lupna dantan ah a omsak a; Athaliah muhtheih louh din a sel ua, huchi in thah ahita kei hi.

³Amah bel amah toh TOUPA inn ah kum guk a kibu ua, huchi in, Athaliah in huai gam ah vai a hawmta hi.

⁴A kum sagihna ah Jehoiada in Keroth mite leh galvil sepaihte lak a mi sepaih za heutute a samsaka, TOUPA inn ah a kiang ah a pi lutsak hi. A kiang uah thu a khung a, Toupa inn ah a kichiamsak a, kumpipa tapa a musak hi.

⁵Aman, “Na hih ding uh hichibang ahi. Na lak ua sabbath a hong dingte seh thum suah seh khat in kumpipa inn na veng ding uh.

⁶Seh thum suah seh khat bel Sur kulh kongpi ah na om ding uh. Huchibang in na veng ding ua, a siat ding na dal ding uhi.

⁷Na lak ua pawl nih, Sabbath a pai dingte’n kumpipa kiang ah TOUPA inn na veng ding uhi.

⁸Michih in galvantawi in kumpipa na umsuak ding ua; kuapeuh huai huamsung a honglut na thahzel ding uh ahi. Huchi in kumpipa a lut leh a pawt zui vialvial un” chi’n thu a pia hi.

⁹Sepaih za heutute’n siampu Jehoiada thupiak bangbang in a hih ua; amau heutu chiat khawlni a hong dingte leh sabbath a pai dingte a pi ua, siampu Jehoiada kiang ah a hoh uhi.

¹⁰Siampu in sepaih za heutute TOUPA inn a om, kumpipa David teipite leh lumte a pia hi.

¹¹Galvil sepaihte’n galvan tawichiat in, Tempul sik taklam a kipan veilam tan in maitam leh inn zul ah kumpipa adin umkhum uhi.

¹²Huchi in kumpipa tapa a hon pikhia a, lallukhu a khusak hi. Theihsakna thu a pia a; kumpipa in a bawl ua, sathau a nilh ua; a khut uh a beng ua, “Pathian in kumpipa hondam hen” a chi uhi.

¹³Galvilmi leh mipite husa Athaliah in a na zak in, TOUPA inn ah mipite lak ah a vahoh hi.

¹⁴A en a, ngai in, kumpipa dan dungzui in khuam zul ah a na ding a, sepaih heutute leh pengkul mutmite bel kumpipa kiang nai ah ading uhi. Huai gam mite’n nuam a sa mahmah ua, pengkul a mut uh. Huchi in Athaliah in a puante a botkek a, “Guk sawmna! Guk sawmna ahita ve!” chi’n a kikou hi.

¹⁵Siampu Jehoiada in sepaihte tung a heutute dia a seh sepaih za heutute thu a pia a, a kiang uah, “Sepaihte kikal ah pawtsak in. Kuapeuh amah zui namsau a satlup ding ahi” a chi hi. Siampu in, “TOUPA inn a thah ding ahi kei” a na chita ngal a.

¹⁶Huchi in a man ua; kumpipa inn a sakolte lutna lampi a pai in, huai ah a thatta uhi.

¹⁷Jehoiada in TOUPA leh kumpipa leh mipite kikal leh kumpipa leh mipite kikal ah Toupa mite a hihna ding un thukhun a bawl hi.

¹⁸Huai gammi tengteng Baal inn ah a hoh ua, a hihchim ua; a maitamte leh a limte a hihnen dimdem ua, Baal siampu Mattan leng maitam bul ah a that uh. Huchi in siampu in TOUPA inn vengmi heutute a septa hi.

¹⁹Aman sepaih za heutute, vengmite, galvil sepaihte leh huai gam a mi tengteng a pi a, TOUPA’N in apan kumpipa a pikhia ua, galvilmite kongpi tawn in kumpipa inn a lut in, kumpipa mangtutphah ah a tuta hi.

²⁰Huchi in huai gam a mi tengteng a kipak ua, khopi buai lou in a omta hi; Athaliah namsau in kumpipa inn ah a that uhi.

²¹Joash in vai a hawm patlai in kum sagih a upa ahi.