Read Paite Chin 2 KUMPIPATE 12 Bible Online

2 KUMPIPATE 12 - Paite Chin bible

2 KUMPIPATE 12

¹Jehu kum sagih a lal kum in Joash a lal pan hi. Jerusalem ah kum sawmli a lal a; a nu min Zibiah ahi a, Beer — sheba khomi ahi.

²Siampu Jehoiada in Joash a sinsak sung teng TOUPA mitmuh in thil hoih a hih hi.

³Himahleh munsang teng hihsiat vek ahi tuankei a; munsangte ah mite kithoih lailai in gimlim a hal nilouh lai uhi.

⁴Joash in siampute kiang ah, “TOUPA inn a laklut thilzek tatna sum teng simsate lak a pai peuhmahte a hinna uh tatna sumte, kuapeuh in TOUPA inn a laklut a phal uh sum tengtengte,

⁵siampute’n a meltheihte ua pan la uhenla; inn sia, a siatna na bawl uhen” a chi hi.

⁶Himahleh hichi ahi a, kumpipa Joash bel kum sawmnih leh thum a lal nung in leng siampute’n inn sia a bawlkei lailai uhi.

⁷Huchi in kumpipa Joash in siampu Jehoiada leh siampu dangte a sam a, a kiang uah, “Bangdia inn siatna bawllou na hi ua? Tun zaw na sumkemte apan dangka la nawn kei unla, inn sia bawlna din pekhe zawta un” a chi hi.

⁸Siampute’n mite apan dangka lak nawnlouh leh inn siatna puahphat louh pha a sa uhi.

⁹Himahleh siampu Jehoiada in bawm a la a, a sin gei a vutvang a, TOUPA inn lutna taklam pang, maitam kiang ah a tung hi. Huai bawm ah TOUPA inn a dangka tawilut tengteng kongkhak vengmi siampute’n a na koih zel uh.

¹⁰Hichi ahi a, bawm ah dangka a tamta chih a theih un, kumpipa Laigelhmi leh siampu lianpen TOUPA inn ah a vahoh ua, sumte a sim ua ipte ah a thun khe zel uhi.

¹¹A dangka sim uh nasemmite, TOUPA inn lammite tung a heutute khut ah a pekhia ua; amau TOUPA inn lammite leh khutsiamtmite;

¹²suangsekmite leh suanglaikhe mite kiang ah, TOUPA inn siatna bawlna ding sing leh suangte leh inbawlna,a khawkna peuh a zat din a pekhia uhi.

¹³Himahleh TOUPA insung a dangka a hontawi un, TOUPA inn ading dangka siknoute, khawnvak puan tehnate, maiphiat kuangte, pengkulte, dangkaeng tuium belsuante, dangkasik tuium belsuante a bawl kei uhi.

¹⁴Nasemmite a pe zel ua, TOUPA inn bawlna in a zang uhi.

¹⁵Nasemmite piak dia dangka a kepsak mite uh leng a etzui pih tuankei uh. Amau ginom tak in a hihzel uhi.

¹⁶Mawhna thoihna dia thillat dangka leh khelhna thoihna dia thillat dangkate bel TOUPA inn ah a lalut kei ua; siampute tantuam ahi.

¹⁷Huchi in Suria kumpipa Hazael in Gath khua a vasual a, a la a; Hazael in Jerusalem a hoh a tum hi.

¹⁸Judah kumpipa Joash in Judah kumpipa apu Jehosaphat, Jehoram leh Ahaziah in a na latsa thilzek tengteng leh amah thilzekte leh, TOUPA inn leh kumpipa inn a gou koihkhawmna a dangkaeng om tengteng a la vek a, Suria kumpipa Hazael a khak a; huchi in Jerusalem a pawtsanta hi.

¹⁹Huchi in Joash tanchin dangte, a thilhihte tengteng Judah kumpipate lal lai thugelhna bu ah a tuang ka hia?

²⁰A sikhate a thou ua, a guk in a sim sawm ua, Joash bel Silla zot sukna lampi Millo inn ah a sual ua; a thatta uhi.

²¹Amah Simeath tapa Jozakar leh Somer tapa Jehozabad te’n a that ua; huchi in a pi leh pute lak ah David khopi ah a vui ua; a tapa Amaziah a sik in a hong lalta hi.