Read Paite Chin 2 KUMPIPATE 13 Bible Online

2 KUMPIPATE 13 - Paite Chin bible

2 KUMPIPATE 13

¹Judah Kumpipa Ahaziah tapa Joash kum sawmnih leh thum a lal kum in Jehu tapa Jehoahaz Israelte tung ah Samaria khua ah a lal pan a, kum sawmlehsagih a lal hi.

²TOUPA mitmuh in thil hoihlou mahmah a hih a, Israelte thil hihkhial sak a, a hih Nebat tapa Jeroboam khelhnate aman leng a hih samta a, a paisan nawn kei hi.

³TOUPA Israelte tung ah a heh mahmah a, huchi in Suria kumpipa Hazael khut leh, Hazael tapa Benhadad khut ah a damsung teng a pevekta hi.

⁴Jehoahaz in TOUPA kiang ah nget chihtak in a ngen a, TOUPA’N a thu a ngaihkhiak sak a; Israel simmawh a om a, Suria kumpipa’n amau a simmawh dan lah a mu kilkel hi.

⁵Huchi in TOUPA’N Israelte hondampa a pia a, huchi in Suriate nuai apan a pawtkhia uh. Israel suante tuma lam bang in amau in ah a om kinken uhi.

⁶Himahleh Israelte thil a na hih khialsak a Jeroboam inkawte khelhnate a paisan kei ua, a hih lailai zawsop ua; Samaria khua ah Aserah leng a om lailai hi.

⁷Jehoahaz in a mite lak a sakol tungtuang mi sawmnga, kangtalai sawm leh sepaih sing khat chihlouh a neih a phalsak ngalkei a; Suria kumpipa’n a hihmang vek a, leivui chilzan bang in a bawl hi.

⁸Huchi in Jehoahaz tanchin dangte, a thilhih tengtengte, a thilhihtheih dante Israel kumpipate lal lai thugelhna bu ah a tuang kei maw?

⁹Hichi in Jehoahaz bel a pi leh pute kiang ah a ihmuta a; Samaria khua ah a vui ua; a tapa Jehoash a sik in a lalta hi.

¹⁰Judah kumpipa Joash kum sawmthum leh sagih a lal kum in Jehoahaz tapa Jehoash Israelte tung ah Samaria khua ah a lal pan a, kum sawmlehguk a lal hi.

¹¹TOUPA mitmuh in thil hoihlou pipi a na hih a; Israelte thil hihkhialsak a a hih Nebat tapa Jeroboam khelhna tengteng a paisan kei a, a ching lailai zawsop hi.

¹²Huchi in Jehoash tanchin dangte, a thilhih tengteng, Judah kumpipa Amaziah toh a kisuallai ua a thilhih theihdante Israel kumpipate lal lai thugelhna bu ah a tuang kei maw?

¹³Huchi in Jehoash a pi leh pute kiang ah a ihmuta a; Jeroboam a mangtutphah ah a tu a, Jehoas bel Samaria Khua ah Israel kumpipate lak ah a vui uhi.

¹⁴Elisha a chi a na a, a chinatna a sihpih hi. Huchi in Israel kumpipa Jehoash a kiang ah a hohsuk a, a kah a, “Aw, ka pa, ka pa, Israelte kangtalai leh sakol tungtuangmite” a chi hi.

¹⁵Elishain a kiang ah, “Thalpeu leh thaltangte honla in” a chi a; aman thalpeu leh thaltangte a honla hi.

¹⁶Israelte kumpipa kiang ah, “Thalpeuh tung ah na khut nga in” a chi hi. Huchi in a khut a nga a; Elisha in kumpipa khut tung ah a khut a nga hi.

¹⁷Aman, “Suahlam tohlet hong in” a chi hi. Huchi in a honghi. Elisha in, “Kap in” a chi a; a kap hi. Aman “TOUPA hotkhiatna thaltang leh Suria apan hotkhiatna thaltang; Aphek khua ah na zoh tanpha in Suriate na sual ding hi” a chi hi.

¹⁸“Thaltangte honla in” a chi a, Israel kumpipa kiang ah, “Lei sun dih” a chi a; huchi in thumvei a sun a, a tawpta hi.

¹⁹Huchi in Pathian mi a tung ah a heh a, “Ngavei ahihkeileh gukvei na sut ding eive; huchi in Suriate mangthang vek khop in na zou ding. Himahleh Suriate thumvei kia zou ding na hita ve” a chi hi.

²⁰Huchi in Elisha a si a, a vui uh. Kum a hong kivei in, Moab pawlte’n a gam uh a hong dou uhi.

²¹Mi khat a vui laitak un hichi ahi a, ngai in, mi pawl khat a mu uh. Huchi in huai mi Elisha han sung ah a khemawk ua; a luang in Elisha guhte a sukkhak tak in, a hong hing nawn a, ading touta hi.

²²Suria kumpipa Hazael in Jehoahaz damsung teng in Israelte a nuaisiah hi.

²³Himahleh TOUPA’N Abraham, Isak leh Jakob kiang a thu a khun ziak in amau a hehpih a, a lainat a, a zahtak a, amau a hihmang nuam kei a, a kiang apan a paikhe kei hi.

²⁴Suria kumpipa Hazael a si a; a tapa Benhadad a sik in a lal hi.

²⁵Jehoahaz tapa Jehoash in Hazael tapa Benhadad in a pa Jehoahaz a dou a, khua a laksakte a sutnawn a, Joash in thumvei a zou a, Israel gam khuate a la kiknawn hi.