Read Paite Chin 2 KUMPIPATE 14 Bible Online

2 KUMPIPATE 14 - Paite Chin bible

2 KUMPIPATE 14

¹Israel kumpipa Jehoahaz tapa Jehoash kum nih a lal kum in Judah kumpipa Joash tapa Amaziah a lal pan hi.

²A lal pattung in kum sawmnih leh nga a upa ahi a, Jerusalem ah kum sawmnih leh kua a lal a; a nu min Jehoadan, Jerusalem mi ahi.

³TOUPA mitmuh in thil dik a hih a, himahleh a pu David zaw a phakei; a pa Joash thilhih bang a hih sam hi.

⁴Munsangte lakmang ahi tuankei a, munsangte ah mite a kithoih lai ua gimlim a hallai uhi.

⁵Lalgam a khut a hong kip tak in hichi ahi a, a pa, kumpipa thatmi amah sikhate a that hi.

⁶Himahleh huai tualthatmite tate a that kei hi. Mosi Dan bu a “Tate ziak in pate hihlup ding ahi kei a, pate ziak in leng tate hihlup ding ahi sam kei, michih amau khelhna ziak in a si ding uh” chi a Toupa thupiak gelh a hih bang in.

⁷Edomte chi guam ah sing khat a that a, Selah khua a sual a, a la a, a min din Joktheel a sa a, tunitan in hiai ahilai hi.

⁸Huchi in Amaziah in Israel kumpipa Jehu tapa Jehoahaz tapa Jehoash kiang ah, hong kuan in, kimai tuah ni, chi in mi a sawl hi.

⁹Israel kumpipa Jehoash in Judah kumpipa Amaziah kiang ah, “Lebanon tang a ling in Lebanon tang a sidar sing kiang ah, Na tanu ka tapa zi din neisak dihve, chi in a thukhak a; Lebanon tang a gamsa a hongpai a, huai ling a hong tuanpuk hi.

¹⁰Nang Edomte na zou ngei a, na lungtang a hong kisathei hi; na kisaktheihna ompih maimai in; nang leh Judah nangawn tan a siatna, nang adia hoihlou ding thil bang ding a khoihkhe ding na hia?” chi in a dawng hi.

¹¹Himahleh Amaziah in a na ngaikhe nuam kei a; huchi in Israel kumpipa Jehoas a va hohtou a vadouta hi. Judah kumpipa Amaziah toh Judah gam Beth-shemesh ah a va kimaituahta uhi.

¹²Judah bel Israelte ma ah a zahlakta a; michih amau in chiat ah a taikekta uh.

¹³Israel kumpipa Jehoash in Judah kumpipa Ahaziah tapa Joash tapa Amaziah Beth-shemesh ah a man a, Jerusalem khua ah a paipih a, Jerusalem kulh, Ephraim kongpi apan kulh ning kongpi pha in tong za li a hihchim hi.

¹⁴TOUPA inn leh kumpipa in a gou koihkhawmna a dangkaeng leh dangka leh tuium-belsuan om tengteng a la a, thuchiam tangtunna dia mat a om mite toh, huchi in, Samaria kholam ah a pai nawnta hi.

¹⁵Huchi in Jehoash thilhih tanchin dangte, a thilhihtheih dante, Judah kumpipa Amaziah a dou thute Israel kumpipate lal lai thugelhna bu ah a tuang ka hia?

¹⁶Huchi in Jehoash a pi leh pute kiang ah a ihmu a, Samaria khua ah Israel kumpipate lak ah a vui ua; a tapa Jeroboam a sik in a lalta hi.

¹⁷Judah kumpipa Joash tapa Amaziah Israel kumpipa Jehoahaz tapa Jehoash sih nung in kum sawmlehnga a damlai hi.

¹⁸Huchi in Amaziah tanchin dangte Judah kumpipate lal lai thugelhna bu ah a tuang kei maw?

¹⁹Jerusalem khua ah amah a guksawm ua; huchi in Lakish khua ah mi a delhsak ua, huai ah a thatta uhi.

²⁰A luang sakol in a paipih ua, a pi leh pute lak ah David khopi Jerusalem ah a vui uhi.

²¹Judah mi tengteng in kum sawm leh kum guk a upa, Azariah a pi ua, a pa Amaziah sik in kumpipa in a bawl uhi.

²²Aman Elath khua a bawl hoihnawn in Judah gam ah a pangsak nawn a; huai nung in kumpipa a pi leh pute kiang ah a ihmuta hi.

²³Judah kumpipa Joash tapa Amaziah kum sawmlehnga a lal kum in Israel kumpipa Jehoash tapa Jeroboam Samaria khua ah a lal pan a, kum sawmli leh khat a lal hi.

²⁴TOUPA mitmuh in thil hoihlou a hih a; Israelte thil a hihkhial sak a, Nebat tapa Jeroboam khelhna tengteng a paisan kei hi.

²⁵TOUPA, Israelte Pathian in a sikha, Gath hepher mi Amittai tapa zawlnei Jonah zang a a thugen bang in, Hamath lutna apan a Arabah Tuipi pha in Israel gam ah a pangsak nawn hi.

²⁶TOUPA’N Israelte haksatna a thupi mahmah chih lah a thei ngal a; sal hin noplen hitaleh a thuakdan uh a kibang a; Israelte panpih ding kuamah omsam kei hi.

²⁷TOUPA’N Israel min van nuai ah a chimitsak zenzen ding chih ahihleh a genkei him a; Jehoash tapa Jeroboam zang in a hondam zawta hi.

²⁸Huchi in Jeroboam tanchin dangte, a thilhih tengtengte, a thilhihtheih dante, a galdou thute, tuma lam in Judah gam tan hi gige Damaska leh Hamath khua Israelte adia a na laksak nawn thute Israel kumpipate lal lai thugelhna bu ah a tuang kei maw?

²⁹Jeroboam a pi leh pu, Israel kumpipate kiang ah a ihmu samta a; huchi in a tapa Zakariah a sik in a lalta hi.