Read Paite Chin 2 KUMPIPATE 15 Bible Online

2 KUMPIPATE 15 - Paite Chin bible

2 KUMPIPATE 15

¹Israel kumpipa Jeroboam kum sawmnih leh sagih a lal kum in Judah kumpipa Amaziah a lal pan hi.

²A lal pattung in kum sawmlehguk a upa ahi a; Jerusalem ah kum sawmnga leh nih a lal a; a nu min Jekoliah, Jerusalem mi ahi.

³A pa Amaziah thilhih bangbang hihsam in TOUPA mitmuh in thil hoih a hih hi.

⁴Himahleh munsangte lakmang ahi tuankei. Munsangte ah mite kithoih lailai in, gimlim a hal lai uhi.

⁵TOUPA’N kumpipa a gawt a, huchi in a sih ni pha in a phak a, inn tuam ah a tengta hi. Kumpipa tapa Jotham in a gam ua mite vai hawmsak in inkuan tung a heutu in a om hi.

⁶Huchi in Azariah tanchin dangte a thilhih tengteng Judah kumpipate lal lai thugelhna bu ah a tuang kei maw?

⁷Azariah bel a pi leh pute kiang ah a ihmuta a; a pi leh pute lak ah David khopi ah a vui ua; huchi in a tapa Jotham a sik in a lalta hi.

⁸Judah kumpipa Azariah kum sawmthum leh giat a lal kum in Jeroboam tapa Zakariah Israelte tung ah Samaria ah kha guk a lal hi.

⁹A pute hih mah bang in TOUPA mitmuh in thil hoihlou a hih a; Israelte thil a hihkhial sak Nebat tapa Jeroboam khelhnate a paisan kei hi.

¹⁰Jabesh tapa Shallum in a guksawm a, mipite ma ah a sual a, a that a, a sik in a lalta hi.

¹¹Huchi in Zakariah tanchin dangte bel ngai dih, Israel kumpipate lal lai thugelhna bu ah a tuang hi.

¹²Huai bel TOUPA’N Jehu kiang a, “Na tapate suan lina tan in Israelte mangtutphah ah a tu ding uh” chih thu a gen ahi. Huchi in huai bang geih a hong hita hi.

¹³Judah kumpipa Uzziah kum sawmthum leh kua a lal kum in Jabesh tapa Shallum a lal pan a; Samaria khua ah kha khat sung a lal hi.

¹⁴Gadi tapa Menahem Tirzah khua apan a hohtou a, Samaria ah a hoh a, Jabesh tapa Shallum Samaria khua ah a sual a, a that a, a sik in a lalta hi.

¹⁵Huchi in Shallum tanchin dangte, a sawmgukna thute ngai dih, Israel kumpipate lal lai thugelhna bu ah a tuang hi.

¹⁶Huchi in Menahem in Tirzah apan Tiphsah leh asung a om tengteng leh a gamte a sual a; amah adia a ki honlouh ziak un a sual a; huai ah naupai lai numei tengteng a pik kek hi.

¹⁷Judah kumpipa Azariah kum sawmthum leh kua a lal kum in Gadi tapa Menahem Israelte tung ah a lal pan a, Samaria ah kum sawm a lal hi.

¹⁸TOUPA mitmuh in thil hoihlou a hih a; Israelte thil hihkhialsak Nebat tapa Jeroboam khelhna a damsung in a paisan kei hi.

¹⁹Assuria kumpipa Pul in a gam a hongsual a; gam a neihkip pih theihna din Menahem in Pul dangka talent sang khat a pia hi.

²⁰Menahem in Assuria kumpipa piak din Israel mi neizou tengteng lak ah dangka sekel sawmnga chiat a khon a; huchi in Assuria kumpipa a pai nawn a, huai gam ah a tam nilouh kei hi.

²¹Menahem tanchin dangte, a thilhih tengteng Israel kumpipate lal lai thugelhna bu ah a tuang kei maw?

²²Huchi in Menahem a pi leh pute kiang ah ihmuta a; a tapa Pekahiah a sik in a lal hi.

²³Judah kumpipa Azariah kum sawmnga a lal kum in Menahem tapa Pekahiah Israelte tung ah Samaria khua ah a lal pan a, kum nih a lal hi.

²⁴TOUPA mitmuh in thil hoihlou a hih a; Israelte thil hihkhial sak, Nebat tapa Jeroboam khelhnate a paisan kei hi.

²⁵A sepaih heutu Remaliah tapa Pekah in amah a guksawm a, Samaria khua a kumpipa in a kulh ah Argob toh, Arieh toh a thatta a; a kiang ah Gilead mi sawmnga toh; huchi in Pekahiah a that a, a sik in a lalta hi.

²⁶Huchi in Pekahiah tanchin dangte, a thilhih tengtengte ngai dih, Israel kumpipate lal lai thugelhna bu ah a tuang hi.

²⁷Judah kumpipa Azariah kum sawmnga leh nih a lal kum in Remaliah tapa Pekah Israelte tung ah Samaria khua ah a lal pan a, kum sawmnih a lal hi.

²⁸TOUPA mitmuh in thil hoihlou a hih a; Israelte thil hihkhial sak, Nebat tapa Jeroboam khelhnate a paisan kei.

²⁹Israel kumpipa Pekah lal lai in Assuria kumpipa Tiglath-pileser in Ijon, Abel beth maakah, Janoah, Kadesh, Hazor, Gilead leh Galili gamte leh Naphtali gam tengteng a la a Assuria gam ah sal in a pi hi.

³⁰Elah tapa Hosea in Remaliah tapa Pekah a guksawm a, a sual a, a that a, Uzziah tapa Jotham kum sawmnih a lal kum in a sik in a lalta hi.

³¹Huchi in Pekah tanchin dangte, a thilhih tengteng, ngai dih, Israel kumpipate lal lai thugelhna bu ah a tuang hi.

³²Israel kumpipa Remaliah tapa Pekah kum nih a lal kum in Judah kumpipa Uzziah tapa Jotham a lal pan hi.

³³A lal pattung in kum sawmnih leh nga a upa ahi. Jerusalem ah kum sawmlehguk a lal a; a nu min Jerus, Zadok tanu ahi.

³⁴A pa Uzziah thilhih bangbang hih sam in TOUPA mitmuh in thil hoih a hih hi.

³⁵Himahleh munsangte hihmang ahi tuankei; munsangte ah mite’n kithoih in, gimlim a hallai uhi. TOUPA inn kongpi saknung zaw a bawlhoih hi.

³⁶Huchi in Jotham tanchin dangte, a thilhih tengteng Judah kumpipate lal lai thugelhna bu ah a tuang kei maw?

³⁷Huailai in Suria kumpipa Rezin leh Remulia tapa Pekah Judate sual din TOUPA’N a sawlpan hi.

³⁸Jotham a pi leh pute kiang ah a ihmuta a, a pi pute lak ah a pu David khopi ah a vui ua; a tapa Ahaz a sik in a lalta hi.